Hatutan.com, (23 Abríl 2022), Díli—Komisaun Anti-Korrupsaun (CAC, sigla portugés) rona ona depoimentu husi sasin prinsipál hamutuk na’in-12 husi instituisaun relevante sira kona-bá kazu projetu instalasaun Set-top Box/dexodificador Rádiu Televizaun Timor Leste, Empreza Públiku (RTTL,E.P).

Lee Mós : Kazu projetu instalasaun set-top Box/ Prezidente RTTL,E.P presta deklarasaun iha CAC

Set-top Box/ dexodificador RTTL,E.P ne’ebé rai de’it iha Sede Suku Fatuhada, Dili. Foto/Dok.Hatutan.com

Iha faze inkéritu no investigasaun ne’e, CAC submete tan pedidu bá Ministériu Publiku (MP) nu’udár na’in ba asaun penál atu fó tan tempu  loron-70 ba CAC atu finaliza prosesu investigasaun tanba daudaun ne’e sei iha faze verifikasaun ba objetu iha terrenu no sei rona sasin ne’ebé mai husi benefisiáriu.

Verifikasaun ba objetu iha terrenu  sei foka liu iha munisípiu sira ne’ebé maka hetan sasán ne’e, tanba sei rona sasin balun ne’ebé sai hanesan benefisiáriu ba projetu instalasaun Set-top Box/dexodificador RTTL,E.P hodi hatene loloos prejuízu bá Estadu liu-liu iha prosesu instalasaun.

“Daudaun prosesu investigasaun sei lao no seidauk finaliza, maske rona ona sasin hamutuk na’in-12, maibé ekipa CAC sei ba fali terrenu halo verifikasaun ba objetu  krime, inklui sei halo konfirmasaun ho benefisiáriu balun tanba tuir lista ne’ebé iha katak ema simu dunik sasán ne’e, maibé la halo instalasaun tanba kustu ba instalasaun ne’e iha, ho nune’e, bele hatene instalasaun halo dunik ka lae, nune’e CAC bele konklui ninia investigasaun no bele hatene prejuízu ba Estadu,” Diretór Jerál Investigasaun CAC, José Verdial  haktuir ba Hatutan.com via telefónika, Sábadu (23/4/2022). 

Lee Mós : Projetu Instalasaun Set-top Box RTTL,E.P, CAC Bolu Ona Sasin Na’in-Ualu

Set-top Box/dexodificador RTTL,E.P ne’ebé rai de’it iha Sede Vila Verde, Dili, 26 Janeiru 2022. Foto/Dok.Hatutan.com

Daudaun ne’e CAC koordena ona ho Prokuradór titular hodi konklui no rona tan benefisiáriu na’in hira, tanba presiza rona de’it na’in-rua ka na’in-tolu nune’e labele han tempu.

Tuir delegasaun kompeténsia ne’ebé Ministériu Públiku (MP) fó bá CAC ho tempu loron 45 ne’ebé sei termina iha Segunda (25/04/2022), maibé husi parte CAC hatama ona pedidu ba MP hodi husu prolongasaun tempu hodi fó tan loron-70 bá CAC atu finaliza ninia investigasaun.

Ministériu Públiku delega kompeténsia bá CAC hodi hahú arrola sasin sira atu bá presta deklarasaun iha CAC, kona-bá indísiu krime ne’ebé iha relasaun ho projetu  instalasaun Set-top Box/dexodificador RTTL,E.P.

Hanesan inofrma ona katak projetu instalasaun Set-top Box/dexodificador RTTL,E.P ne’e ho nia kustu $900,000.00, deskonfia Ministru Asuntu Parlamentár no Komunikasaun Sosiál (MAPKOMS), Francisco Martins da Costa  Pereira Jerónimo, nu’udár mós Prezidente Federasaun Futeból Timor Leste (FFTL) estabelese kontratu ho empreza   DILI ETERNAL INNOVATION INFORMATION, Lda nu’udár sósiu husi Melánia da Silva Fernandes Capela nu’udár Sekretaria iha Gabinete Prezidente FFTL.

Lee Mós : Direitu Bá Resposta Husi MAPKOMS Kona-bá Projetu Intalasaun Set-top Box RTTL,E.P

Jornalista: Carmelita Isaac