Hatutan.com, (04 Maiu 2022), Díli-Polísia Nasionál Timor-Leste (PNTL)  Munisípiu Dili, kuarta kalan (04/05/2022), halo operasaun la’o ain, hahú husi tuku 20:00-22:00 Otl, nu’udá parte ida atu asegura Dili hakmatek no livre.

Lee Mós : Operasaun Kalan, PNTL Halo Apreensaun ba Motór 14 no Karreta tolu

Membru PNTL husi Unidade Espesiál Polísia (UEP). Foto/Hatutan.com

Iha operasaun ne’e, PNTL halo pasa revista bá transporte sira ne’ebé halo movimentu iha tempu kalan no konsege halo apreensaun ba motorizada hamutuk 51 tanba  balun laiha dokumentu, balun nia dokumentu inválidu no balun fali viola lei kódigu estrada.

Motorizada 51 ne’e, balun prende iha área Hudi-laran no balun fali prende iha área estrada Otél Timor nia oin ka besik Portu Dili.

Komandante Operasaun Munisipiu Dili, Inspetór Xefe Delfin da Silva, hateten operasaun ne’e, atu  asegura komunidade tomak iha kapitál Díli no bainaka internasionál sira, hodi partisipa iha serimónia nasionál Restaurasaun Independénsia no tomada pose bá prezidente eleitu, la’o iha ambiente ida ne’ebé mak pás, dame, haksolok.

“Ami halo vijilánsia, la’o patrullamentu, ohin kalan, ita iha grupu hitu mak sei hala’o iha kalan primeiru ida ne’e,” Inspetór Xefe Polísia, Delfin da Silva hateten, durante fó orientasaun bá membru sira  molok hala’o operasaun. 

 “Forsa Rezerva, ita-boot sira la’o patrulla móvel nune’e mós hodi ezekuta, karik iha akontesimentu ruma iha fatin ruma,” komandante Delfin hateten.

Atividade operasaun la’o ain ne’e, ekipa operasaun PNTL nian sira hahú hosi ponte Comoro III, diresaun sira ba Manleuana, Bua-laran. Hosi área Vera Cruz nian, hahú hosi Igreja Katedrál, Vilaverde, Matadoru, Faról, Tuana-laran, inklui mós ba iha Maskarinhas.

Grupu 3 hosi Postu Administrativu Na’in-Feto ninian, hahú hosi Merkadu Taibessi, área Bekae, Xina Rate. Grupu 4, hahú hosi Cristo Rei, Eskuadra Becora nian oin, Merkadu Becora, Bidau Santana, Bidau Mota-klaran, liubá ba iha área Branca, ho Cristo Rei.

“Ita halo patrulla la’o ain, nune’e mós ho karreta, ita halo mós ho pasa revista, ita-nia alvu sira ba iha ema no transporte sira, liu-liu bá iha sira ne’ebé la’o kalan, karik uza arma branka,”  komandante Delfin da Silva, hateten.

Motorizada hamutuk 51 ne’ebé PNTL halo ona apreensaun ne’e, oras ne’e, asegura hela iha komandu PNTL Caicoli hodi prosesa tuir lei.

Tuir planu, atividade operasaun liuhosi la’o ain, no halo mós pasa revista ne’e, sei konklui iha 18 maiu 2022, molok hakat ba selebra loron nasionál Restaurasaun Independénsia, no Pose ba prezidente repúblika eleitu.

Jornalista: Rogério Pereira Cárceres