Hatutan.com, (06 Maiu 2022), Díli-VIII Governu Konstitusionál liuhosi Konsellu Ministru, Sesta (06/05/2022), aprova ona projetu Dekretu-Lei kona-bá pagamentu subsídiu tinan ikus ho valór $200 bá kada uma-kain iha territóriu Timor-Leste. 

Lee Mós : May Day, Traballadór Sira Husu Governu Hasa’e Saláriu Mínimu Bá $200

Ministru Prezidénsia Konsellu Ministrus, Fidelis Manuel Leite Magalhães. Foto/Gov.TL

Projetu Dekretu-Lei ne’e, aprezenta hosi Vise Primeira Ministra no Ministra Solidariedade Sosiál no Inkluzaun (MSSI), Armanda Berta dos Santos, relasiona ho apoiu pontuál bá uma-kain sira.

Objetivu hosi Dekretu-Lei ida ne’e, atu kria no regula prestasaun bá pagamentu pontuál ida bá uma-kain timoroan sira nian.

“Apoiu bá uma-kain sira hotu, iha tinan ikus 2022. Apoiu ne’e, sei ho montante $200 bá kada uma-kain. Apoiu proposta Dekretu-Lei ne’e, sei hatuur tipu  apoiu, modalidade apoiu maka, universál, katak ba uma-kain hotu-hotu. Ho medida ida ne’e, hakarak atu fó apoiu ekonómiku bá família sira hotu,” Ministru Prezidénsia Konsellu Ministru no portavós Oitavu Governu, Fidelis Manuel Leite Magalhães hateten bá jornalista sira, hafoin reuniaun Konsellu Ministru Estraordináriu  iha Palásiu Governu, Díli.

Atribuisaun pagamentu subsídiu ne’e, diferente ho subsídiu $200 ne’ebé antes ne’e, Governu atribui ona bá família sira iha kada uma-kain. Signifika katak, iha faze ida-ne’e, la define kona-bá alvu, katak, ema sé mak merese atu hetan, ka maske funsionáriu sira ne’ebé nia saláriu mensál to’o $501, sira mós sei benefisia hotu programa ne’e.

“Ohin, ha’u temi ona liafuan iha ne’e, ha’u temi universál, universál ne’e, katak hotu-hotu. Entaun, la’ós bá grupu balu. Ida ne’ebé mak ida halo antes ne’e, ita halo ho alvu. Bá ema ne’ebé ho nivel vensimentu $500 mai kraik. Agora, laiha. Agora bá família hotu-hotu, maka ho montante $200,”  Ministru Fidelis Magalhães hateten tán.

Ninia rekizitu ida maka, bá família hirak ne’ebé antes ne’e, rejistu iha livru rejistu uma-kain nian, ho data ikus liu maka, iha 28 fulan-Fevereiru liubá. Tanba foin lalais, ekipa sira halo ona selesaun no verifikasaun bá dadus sira hotu uma-kain nian.

Polítika Governu nian hodi atribui pagamentu subsídiu ho universálmente ne’e, tanba Governu ho hanoin ida katak, hirak ne’ebé mak iha rendimentu boot liu, dala-ruma, sira mós kontribui bá iha impostu, no ida ne’e mós, apoiu sira nian likidés iha família laran. Maibé, família balu sente lakohi simu karik, bele halo doasaun, ka bele fó fali bá maluk sira ne’ebé mak presiza liu.

Governu mós nota katak, antes ne’e membru família balu komenta dehan, tanba sá mak sira iha osan ne’ebé boot ona mós simu tán.

“Bom, sé lakohi simu, bele fó fali ba ita-nia maluk sira ne’ebé maka presiza liu, hanesan ita-nia aktu  karidade ida ka, ne’ebé ita hakarak halo bá malu,” Fidelis Magalhães tenik.

Orsamentu hosi Ministériu Finansas (MF), ne’ebé utiliza hodi finansia bá programa ne’e, ho valór hamutuk millaun  $60-resin.

“Osan to’o, mais debate espesífiku sira, diskusaun sira kona-bá orsamentu ne’e, ita-boot sira akompaña, depois sei tuir mai, ne’e la’ós asuntu ida ne’ebé mak sai hanesan preokupasaun boot ida, tanba Governu hatene katak, iha osan, maka Governu prepara kondisaun sira bá aprovasaun programa ida-ne’e,” Ministru Fidelis Magalhães hateten.

Jornalista: Rogério Pereira Cárceres