Hatutan.com, (23 Maiu 2022), Díli- Primeiru-Ministru (PM), Taur Matan Ruak, kongratula servisu mídia nasionál, liuliu profisionál jornalista sira ne’ebé hala’o knar hodi divulga informasaun bá públiku durante selebrasaun tinan 20 restaurasaun independénsia no investidura Prezidente Repúblika períodu 2022-2027, José Manuel Ramos-Horta.

Primeiru-Ministru (PM), Taur Matan Ruak. Foto/Hatutan.com

Ministru interinu Asuntu Parlamentár no Komunikasaun Sosiál (MAPKOMS) nu’udár mós Sekretáriu Estadu Komunikasaun Sosial (SEKOMS), Merício Juvinal dos Reis “Akara”, Segunda (23/05/2022), iha rezidénsia ofisial PM nian iha Farol, Díli, haktuir Xefe Governu fó parabéns no apresiasaun boot bá servisu mídia sira-nian, liuliu bá jornslista hotu ne’ebé halao knar ho di’ak durante selebrasaun 20 Maiu no tinan 20 restaurasaun independénsia  ne’ebé hala’o iha Tasi Tolu no iha atividade hotu mídia halo  kobertura ho di’ak.

“Xefe Governu transmite nia apresiasaun bá mídia no jornalista sira tamba ne’e h’au hakarak husu atu ita mantein servisu di’ak sira-ne’e para ba oin ita-nia kualidade sai di’ak liután,” Merício Akara hateten.  

Sekretáriu Estadu informa mós bá Primeriu-Ministru kona-bá progresu servisu mídia nasionál nian ne’ebé hetan valór di’ak iha nivel mundiál ne’ebé hatudu liu husi index  Liberdade Imprensa Mundiál  2022 ne’ebé hatudu Timor-Leste tur iha pozisaun 17 husi nasaun 180.

Advertisement

Ho index Liberdade imprensa ne’ebé iha hatudu katak Timor-Leste nia liberdade imprensa di’ak liután no lori susesu boot liga ho seguransa bá kna’ar mídia sira-nian di’ak no aseguradu no seluk mak aspetu lejizlasaun ne’ebé hatudu laiha impedimentu ruma relasiona ho knar mídia sira nian.

Podér polítiku iha Timor-Leste la halo intervensaun ida grave bá servisu mídia nian liga ho independénsia konsellu redasaun nian iha aspetu sosial, ekonomiku no polítiku.

“Ita orgullu tamba hanesan nasaun ki’ik maibé ita-nia liberdade imprensa iha rejiaun ASEAN nian di’ak liu,” Merício Akara tenik.

Primeiru-Ministru mós husu atu Timor Leste mantein ho index liberdade imprensa ne’ebé  mak di’ak ne’e no buka hadi’a nafatin kualidade, liuliu produtu jornalístika sira no utizasaun terminolojia no linguajen sira atu bele hakonu komunidade ho informasaun ne’ebé kredivel.

Liu husi sorumutuk ne’e  mos Xefe Governu husu atu SEKOMS no ministériu tutela (MAPKOMS) halo esforsu ho meiu hotu atu nafatin halo transmisaun informasaun sira bá povu atu povu nafatin akompaña no hatene saida mak prioridade Governu nian bá povu tamba VIII Governu Konstitusionál nia alvu bá dezenvolvimentu mak ema.

Advertisement

Primeiru-Ministru husu  SEKOMS ne’ebé asume pasta hanesan Ministru MAPKOMS interinu atu koordena servisu sira ho Parlamentu Nasionál, liuliu iha liña koordenasaun ida metin entre órgaun soberanu rua, liuliu iha programa no lei sira ne’ebé Governu propoin bá Parlamentu Nasionál bele hetan atensaun di’ak liután.

Jornalista: Vito Salvador

Advertisement