Hatutan.com, (29 Juñu 2022), Díli-Liuhusi primeiru interrogatóriu iha Tribunál Distritál Dili (TDD),  Kuarta (29/06/2022), ne’ebé prezide husi juiz Alváro M. Freitas, deside aplika medida koasaun Termu Identidade Rezidénsia (TIR) bá sidadaun estranjeiru na’in-rua ne’ebé deskonfia envolve iha kazu tráfiku umanu.

Lee Mós : MP Alega Prizaun Preventiva Bá Sidadaun Estranjeiru Na’in-rua Ne’ebe Deskonfia Envolve iha Kazu Tráfiku Umanu

Sidadaun estranjeiru na’in-rua ne’ebé deskunfia envolve iha kazu tráfiku umanu. Foto/Hatutan.com

Sidadaun estranjeiru na’in-rua ho inisiál ASG no IGAE ne’e hetan apreensaun husi Polisia Sientífika Investigasaun Kriminál (PCIC, sigla Portugés), Sesta liubá, bainhira ho aviaun tuun iha Aeroportu Internasionál Prezidente Nicolau Lobato, Díli.

Arguidu na’in-rua  ne’e deskonfia envolve iha sindikatu haruka traballadór timoroan bá Abudabi, Uniaun Emiradu Árabe, ne’ebé rezulta inan-feton timoroan na’in-hitu “abandonada” hela iha sidade Abudabi.

Parte Advogadu privadu Pedro Aparicio aseita ho medida koasaun ne’ebé Tribunál aplika bá nia kliente tanba laiha indísiu forte bá envolvimentu arguidu na’in-rua nian iha sindikatu ne’e.

“Tuir despaxu TDD nian bá sira na’in-rua aplika TIR hodi kolabora ho parte Prokuradór nune’e bele kontinua halo investigasaun bá krime ne’ebé hanesan ho arguidu timoroan na’in tolu seluk,” Pedro Aparicio hateten bá jornalista sira iha TDD.

Aplikasaun TIR refere ho konsekuénsia katak bainhira atu bá estranjeiru liu loron 15, muda hela fatin no troka númeru telefone, maka tenke informa bá Ministériu Públiku liu husi Prokuradór. Maibé tanba arguidu na’in rua hanesan sidadaun estranjeiru no mai Timor ne’e atu hela iha Hotel Timor, tanba ne’e sei buka fali Hotel ida bá sira hela maibé sei informa mós bá Tribunál no MP.

Iha primeiru interrogatóriu ne’e, MP promove arguidu na’in rua bá pratika krime tráfico de pessoa, asosiasaun kriminoza ne’ebé previstu iha artigu 163, 188 husi kódigu penal Timor-Leste.

Audiénsia julgamentu iha primeiru interrogatóriu ne’e, prezide husi juis singular Alvaro M. Freitas, MP reprezenta hosi Prokuradór Domingos Gouveia no Arguidu sira hetan asisténsia legál hosi Advogadu Privadu Pedro Aparíçio.

Lee Mós : PCIC Kaptura Sidadaun Estranjeiru Na’in-rua, Deskonfia Envolve iha Sindikatu Tráfiku Umanu

Jornalista : Carmelita Isaac