Hatutan.com, (04 Jullu 2022), Díli- Prezidente Repúblika (PR), José Ramos-Horta, apoia polítika Governu nian hodi koloka ka tau FALINTIL-Forsa Defeza Timor Leste (F-FDTL) iha fronteira hodi asegura soberania nasaun nian.

Lee Mós : Mensajen Ramos-Horta Bá F-FDTL: Kontinua Garante Pás no Estabilidade

PR José Ramos-Horta. Foto/Hatutan.com

Polítika VIII Governu Konstitusionál liberadu Primeiru-Ministru Taur Matan Ruak mak hametin seguransa iha liña fronteira terrestre liu husi kolokasaun membru F-FDTL hodi kombate tranzasaun ilegál no tráfiku umanu, inklui garante soberania nasaun nian bá interese povu hotu nian.

José Ramos-Horta hateten to’o agora Timor-Leste nia polítika mak primeiru liña iha fronteira no jestaun iha fronteira polísia mak halo liu husi polísia Migrasaun  no Unidade Polísia Fronteira (UPF), maibé F-FDTL sempre apoiu no e hatudu sinál atu asegura Timor-Leste nia soberania konforme doutrina no estratéjia ne’ebé iha.

“Ita hein polítika Governu nian atu haree oinsá apoiu F-FDTL atu servisu di’ak liu tan,” Ramos-Horta hateten ba jornalista sira bainhira hala’o vizita bá Kuartél Jenerál F-FDTL, Segunda (04/07/2022).

Nia hatutan, iha tinan 20 liubá F-FDTL nia baze mak Baucau no Metinaro, maibé agora iha territóriu tomak tuir definisaun ne’ebé Estadu halo tenke marka prezensa forsa nian hodi kolabora ho polísia implementa polítika Governu no Estadu nian bá defende soberania.

“Misaun forsa nian define husi ita-nia Konstituisaun, defeza tenke independente, integridade no soberanu no iha kontestu Timor-Leste nian buat barak ne’ebé ita nia forsa halo apoiu bá PNTL bainhira presiza, liu-liu iha fronteira ne’ebé dala ruma situasaun dezastre ruma akontese,” Horta hateten.

Membru F-FDTL efetivu hamutuk 2.746 no husi númeru ne’e F-FDTL feto hamutuk 282, ekivale bá porsentu 10,22.

Jornalista: Vito Salvador