Hatutan.com, (08 Agostu 2022), Díli—Komandu Polísia Nasionál Timor Leeste (PNTL) liu hosi Seksaun Tránzitu Munisípiu Díli, hala’o prevensaun seguransa rodoviária iha kapitál Díli liuhosi pasa revista ba viatura hirak ne’ebé halo movimentu iha tempu kalan ne’ebé viola kódigu Estrada haree mós ba sasán kontra bandu sira seluk.

Seksaun Tránzitu Munisípiu Díli halo apreensaun ba karreta ho motór 32 iha Sábadu (08/08/2022). Foto/PNTL.

Komandante PNTL Munisípiu Díli, Superintendente Xefe Polísia, Henrique da Costa haktuir, atividade ne’e halo hodi eduka nafatin sidadaun sira atu respeita kódigu estrada.

Lee Mós: Operasaun Kalan, PNTL Prende Motór 51

“Ohin kalan Seksaun Tránzitu Díli kontinua halo operasaun pasa revista ba karreta no motór sira ne’ebé halo movimentu iha áreia Branca dalan ba Cristo-Rei nian no prende motorizada 26, karreta 6 inklui dokumentus karreta nian tolu ne’ebé viola dekretu Kódigu Estrada,” Hatutan.com sita deklarasaun Henrique da Costa  iha komunikadu, Sábadu foin lalais ne’e.

Operasaun ne’e hetan apoiu hosi Eskuadra PNTL Cristo-Rei, Servisu Investigasaun Kriminál, Servisu Informasaun Polísia no Seksaun Forsa Rezerva, hodi apoiu Seksaun Tránzitu Díli.

Viatura hirak ne’ebé PNTL prende tanba joven sira tula-malu iha motór na’in-tolu  halai makás halo barullu maibé la uza kapasete, lampu no espellu laiha, karta kondusaun laiha, dokumentu inválidu no maioria la monta xapa matríkula.

Tuir planu, infratór sira sei ba selu multa iha Banku mak bele mai foti fali sira nia viaturas, iha Segunda (08/08/2022).

Operasaun ne’e lidera hosi Segundu Komandante PNTL Munisípiu Díli, Superintendente João Sancho Pires no hetan akompañamentu hosi Komandante Eskuadra PNTL Cristo-Rei, Inspetór Polísia Duarte Abilio no apoiu hosi Servisu Informasaun Polísia (SIP) Díli no Forsa Rezerva.

Jornalista: Rogério Pereira Cárceres