Hatutan.com, (09 Setembru 2022), Díli-Prezidente Eletrisidade Timor-Leste, Empreza Públika (EDTL, EP), Paulo da Silva, hateten nu’udar  dirijente másimu iha EDTL,E.P nia rejeita, la admite no la simu pedidu rekomendasaun diresaun  Partidu Libertasaun Populár (PLP) bá kuadru ka militante PLP nian aplika vaga EDTL,E.P Munisípiu Lautem.

Lee Mós : PLP Rekomenda Militante Aplika Vaga EDTL,E.P Munisípiu Lautem

Prezidente EDTL,E.P, Paulo da Silva. Foto/Media SEKOMS

Paulo da Silva, afirma katak submisaun karta rekomendasaun ne’ebé hato’o hosi diresaun PLP Munisípiu Lautem nian, hodi rekomenda bá nia (nu’udár prezidente ba EDTL,E.P, atu toma konsiderasaun bá militante no kuadru PLP Munisípiu Lautem ne’ebé aplika vaga rekrutamentu pesoál tékniku EDTL,E.P Lautem sei la simu no rejeita total.

“Ha’u la  admite rekomendasaun sira ho modelu hanesan ne’e, no ha’u orienta para pedidu sira ne’ebé hanesan ne’e  rejeita kedas. Ita la autoriza para atu simu pedidu sira hanesan ne’e,” Prezidente EDTL, EP, Paulo da Silva, hateten durante partisipa iha programa “Meet the Press” ne’ebé mak organiza hosi SEKOMS, iha Salaun Prezidénsia Konsellu Ministru (MPCM-Sigla Portugés) iha  Palásiu Governu, Díli, Kinta loraik (08/09/2022).

Advertisement

Paulo da Silva, dehan, bainhira ninia kna’ar iha tinan kotuk 2021, nia parte anunsia kedan bá funsionáriu sira iha EDTL,E.P no mós públiku tomak katak, EDTL,E.P sai hanesan instituisaun tékniku ida, no instituisaun ida mós timoroan sira nian no oportunidade bá timoroan ne’ebé merese hodi la haree bá kór polítiku, rasa no suku.

“Tanba ne’e, ita la haree kona-bá kór partidu, la haree kona-bá rejiaun, la haree kona-bá grupu, mais ne’e serve bá timoroan hotu, eletrisidade laiha kór partidu, eletrisidade laiha grupu, eletrisidade laiha rasa. Tanba ne’e, ami  la autoriza no la tolera. Tanba ne’e, pedidu kualkér forma saida de’it, liga ho sasán sira hanesan ne’e, ami rejeita no sei la konsidera, tanba ne’e prejudika ita nia governasaun, ita nia servisu administrasaun, no kontra regra. Tanba ne’e, ami la autoriza,” Paulo da Silva, afirma tan.

Karta rekomendasaun Diresaun PLP Munisípiu Lautem bá Prezidente EDTL,E.P viral iha Facebook. Foto/Foti iha Facebook

Liuhosi karta ho asuntu rekomendasaun militante PLP Aplika Vaga EDTL,E.P Munisipiu Lautem, 12 fulan-Agostu 2022, ne’ebé asina hosi komisáriu polítika PLP Nasionál, Constantino Escoliano Brandão ho Carsiliano Oliveira, koordenadór PLP Munisípiu Lautem, sai viral tiha iha rede média sosiál Facebook, Paulo da Silva, hateten, iha dokumentu rekomendasaun ne’e rasik, Prezidente PLP laiha rekomendasaun ruma iha ne’ebá, katak prezidente la asina. Tanba ida ne’e, sasán sira hanesan ne’e, EDTL,E.P rejeita.

“Aproveita tempu ne’e, ha’u hakarak informa ba hothotu katak, iha EDTL, E.P, ita la tolera sasán sira hanesan ne’e. Sé mak hanoin atu hato’o pedidu sira hanesan ne’e, deskulpa mais, ne’e sei prejudika fali ema sira ne’ebé sira rekomenda mai. Tanba ne’e, husu para fó atensaun katak, ne’e la di’ak, husu para atu hothotu kompete ho livre, ho direitu, tanba instituisaun ne’e timoroan sira hotu nian, la’os partidu A ou partidu B nian, ou grupu ida ne’e. Ne’ebé, ha’u hanoin ,ida ne’e ma kami aplika iha EDTL, EP,”  Prezidente EDTL,E.P Paulo da Silva hateten.

Jornalista: Rogério Pereira Cárceres

Advertisement