Hatutan.com, (28 agostu  2021), Díli—Dadus hosi Sentru Integradu Jestaun Krize (SIJK), hahú hosi loron 21 marsu 2020 to’o sábadu (28/08/2021), Timor-Leste (TL) rejista ona ema ne’ebé mate ho COVID-19 hamutuk na’in 59, no konfirmadu kumulativu hamutuk na’in 16.236 .

Hosi númeru ema mate ho COVID-19 ne’e, maioria rejistadu hosi Munisípiu Dili hamutuk na’in 48, tuir kedan hosi Bobonaro hamutuk na’in lima (5), Viqueque na’in rua (2), Baucau na’in ida (1), Ermera na’in ida (1), Liquiça na’in ida (1), Rejiaun Administrativa Espesiál Oé-Cusse Ambeno na’in ida (1), Ainaro, Aileu, Covalima, Lautém, Manatuto no Manufahi seidauk rejista.

Númeru óbitu (ema mate) ne’ebé rejistadu ikus liu iha sábadu ne’e, feto-ida ho idade 76 hela iha Munisípiu Dili ho kondisaun seidauk vasina, ne’ebé iha loron 28 agostu 2021 diagnóstika iha emerjénsia Ospitál Nasionál Guido Valadares (HNGV) ho Síndroma Insufisiénsia Respiratória Aguda (SIRA).

“Pasiente ne’e hakotu-iis iha madrugada tuku 03:03 tanba parajen respiratória, maibé família rejeita atu halo funerál tuir protokolu saúde,” Koordenadór Forsa-Tarefa ba Prevensaun no Mitigasaun Surtu COVID-19 iha TL, Rui Maria de Araújo, hateten liuhosi komunikadu ne’ebé Hatutan.com asesu, sábadu (28/08/2021).

Parte SIJK mós relata kona-bá evolusaun COVID-19 ohin-nian katak, iha kazu pozitivu rejistadu na’in 276, rekuperadu 125 no ativu 4.523.

Kazu foun ohin-nian 276 kompostu hosi mane146 no feto 130 ho maioria nafatin mai hosi munisípiu Dili ho totál 197, Baucau 30, Covalima 10 no munisípiu seluk hamutuk na’in 39.

Iha deskrisaun hatudu katak, hosi totál kazu detetadu foun ohin, ema ho idade 20-50 iha 18%, entre idade12-59 na’in 217 iha 78,6%, ho idade 60 ba leten na’in-sia (9), no totál kazu konfirmadu ohin, hamutuk 123 ka 44,5% kazu sintomátiku.

Teste ne’ebé Laboratóriu Nasionál Saúde halo hahú hosi horisehik mai ohin hamutuk na’in 655, kompostu hosi teste PCR iha Dili, vijilánsia sentinela 82, rastreiu ba kontaktu na’in 308, rastreiu aleatóriu 145, viajen sai hosi serka sanitária Dili na’in 94, viajen internasionál na’in-ida no follow-up iha kuarentena hamutuk na’in 25.

Totál teste PCR ne’ebé halo iha loron 27 agostu iha munisípiu seluk, RAEOA no HNGV hamutuk 367, kompostu hosi Baucau 151, Ermera neen, Maliana 51, Maubisse 26, RAEOA 15, Suai 38, Viqueque ualu, Lospalos haat no HNGV 68.

Izolamentu Vera Cruz, ohin, hala’o tratamentu ba kazu detetadu na’in 118, kompostu hosi grave na’in 23 ne’ebé na’in-tolu uza ventiladór, na’in-tolu uza Countinous Positive Airway Pressure (CPAP), na’in 17 uza oksijéniu, na’in 60 ho kategoria moderadu no na’in 35 kategoria leve.

Kona-bá númeru kazu moderadu no grave ne’ebé baixa iha Vera Crúz hatudu katak, bainhira ema barak liu detetadu pozitivu, maka barak liután mak sei baixa ho kategoria moderadu no grave.

Informa ba públiku katak, Governu impoin medida saúde públika ho naran konfinamentu domisiliáriu obrigatóriu signifika, obrigatóriamente ema presiza hela iha uma atu prevene virus SARS-CoV-2 inklui variante Delta hada’et barak liu tan iha komunidade nia-leet.

Governu impoin mós medida saúde públika serka sanitária, katak ema labele sirkula livremente, sai ka tama hosi área serka, hodi bele prevene virus SARS-CoV-2 inklui variante Delta labele hada’et-tutan maka’as liu tan ba fatin/rejiaun seluk.

SIJK apela ba populasaun iha TL tomak, maski simu ona vasina, favór respeita nafatin regra prevensaun no ijiene individuál, ne’ebé Governu hatuur ona, atu prevene moras Covid-19 da’et ba mai.

Regra sira-ne’e mak hanesan uza mascara, fase liman beibeik ho sabaun ka dezinfetante ruma,  evita kose liman ba matan, inus ho ibun, bainhira kumprimenta-malu, la presiza ka’er-liman, bensa-liman, rei-malu ka hakoak-malu, evita halibur-malu barak, hamriik ka tur do’ok hosi ema seluk, mínimu metru ida ho balun. 

Apela ba populasaun iha Dili laran no mós iha Munisipiu sira-seluk, atu aprezenta-an iha fasilidade públiku saúde hanesan Sentru Saúde ka Ospitál ne’ebé besik, bainhira sente isin-manas,  kakorok moras, inus-been, mear, hodi bele hetan atendimentu hosi profisionál saúde sira. (ger)