Hatutan.com, (03 setembru 2021), Díli-Sekretaria Redasaun Hatutan.com, Laurentina Pires ho Gabriel Nelson do Nascimento (videographer), sesta (03/09/2021), submete dokumentu komprovativu ba Conselho de Imprensa de Timor Leste, hodi hetan sertifikadu ofisiál  nu’udar órgaun no meiu komunikasaun sosiál.

Hatutan.com submete dokumentu rejistu meiu no orgaun komunikasaun sosiál ba Conselho de Imprensa iha salaun Conselho de Imprensa, Kintal-Boot, Dili, Sesta (03/09/2021). Foto/CI

Submisaun dokumentu ne’ebé hala’o iha salaun enkontru Conselho de Imprensa nian, iha Kintal-Boot, Dili, ne’e simu diretamente hosi Diresaun Rejistu no Apoiu Jurídiku (DRAJ) Conselho de Imprensa, nune’e fó tempu semana ida atu Conselho Imprensa halo avaliasaun ba dokumentu sira ne’e molok atribui sertifikadu legal ba hatutan.com hanesan órgaun no meiu komunikasaun sosiál.

Dokumentu komprovativu sira ne’ebé Hatutan.com submete tuir rekizitu ba rejistu meiu no órgaun komunikasaun sosiál sira-nian iha Conselho de Imprensa maka hanesan;  

• Sertifikadu lisensa ba atividade ekonómika hosi SERVE,I.P
• Númeru TIN 138875 hosi SERVE,I.P
• Sertidaun Rejistu Komersiál hosi SERVE,I.P
• Sertidaun Dívida hosi Ministériu Finansas Timor Leste
• Estatutu Empreza nian ne’ebé aprovadu
• Estrutura Redasaun Hatutan.com
• Estatutu Editoriál Hatutan.com
• Organograma Hatutan.com

Órgaun no meiu komunikasaun sosiál sira hotu ne’ebé eziste iha Timor-Leste iha obrigasaun tuir Lei Komunikasaun Sosiál artigu 28 (Rejistu)  tenke rejistu ba-iha Conselho de Imprensa.

Hatutan.com hahú nia atividade hanesan meiu komunikasaun sosiál iha loron 20 Agostu 2021, hodi publika informasaun ka notísia sira iha rai-laran, rai-li’ur tuir padraun universal jornalizmu nian, kumpre ba  Kódigu Étika Jornalistika no lejizlasaun sira ne’ebé vigora iha Timor-Leste.

Hatutan.com nu’udar meiu komunikasaun sosiál ida hosi órgaun komunikasaun sosiál RAYA MEDIA & ENTERTAINMENT, Unipessoal, Lda. Daudaun ne’e,  Hatutan.com  iha nia jornalista nain 10, kompostu hosi feto na’in tolu no mane nain hitu. (bit)