Hatutan.com, (20 Setembru 2021), Díli—Durante Timor-Leste enfrenta situasaun pandemia COVID-19 hosi 2020-2021, Inspesaun Jerál Traballu (IGT, sigla portugés) rejista  Timor-oan hamutuk 779 no sidadaun  estranjeiru na’in-sia (9) lakon servisu.

Kauza ne’ebé halo Timor-oan  hirak ne’e ho estranjeiru na’in-sia lakon sira-nia servisu tanba kompañia sira laiha kbiit finanseiru hodi sustentabiliza atividade empreza nian.

Inspetór Jerál Traballu, Rofino Lopes dos Reis,  hateten IGT durante ne’e rejista kompañia hamutuk 116 enfrenta problema finanseiru. Husi kompañia hirak-ne’e IGT rejista empreza estranjeiru hamutuk 50.

Inspetór Jerál Traballu, Rofino Lopes dos Reis. Foto/Hatutan.com

Ba jornalista Hatutan.com iha nia servisu fatin, Díli, segunda (20/09/2021), Inspetór Jerál Traballu, Rofino Lopes dos Reis, hateten  IGT  nafatin rejista dadus husi setór privadu balun ne’ebé mós husu atu suspende sira-nia atividade no provizoriamente hapara kontratu ho traballadór sira tanba laiha ona kbiit finanseira ne’ebé natoon atu lori empreza ne’e moris iha tempu pandemia nia laran.

“Situasaun ne’e hatudu  númeru dezempregu  aumenta bainhira kompañia sira deside hapara sira nia atividade,” Rofino Lopes dos Reis tenik.  

Iha artigu 15 lei traballu nian hatatan se uainhira empreza ka kompañia ida enfrenta problema ekonomia bele halo suspensaun temporáriu ba traballadór sira hodi hein to’o situasaun norma mak nia emprega hikas traballadór hirak ne’e.

Durante pandemia COVID-19 númeru empreza ne’ebé taka sira nia atividade barak liu mai husi setór privadu sira ne’ebé halo negósiu iha área kulinária ka restaurante. Razaun kompañia hirak ne’e taka sira nia atividade tanba laiha rendimentu durante Governu aplika regra konfinamentu obrigatóriu no serka sanitaria atu halo prevensaun ba COVID-19.

Ligasaun ho disputa laborál inspektór ne’e hatutan hahú husi janeiru  to’o agostu  2021, IGT rejista kazu hamutuk 29.  Husi kazu hotu ne’ebé rejistu, parte IGT bolu ona kompañia nain no maioria rezolve ona.  

Ekipa IGT garante atu asegura direitu traballadór nian no sei fó sansaun ba kompañia sira ne’ebé viola direitu traballadór nia tuir lei ne’ebé vigora iha Timor-Leste.

“Oras ne’e kazu disputa laborál ne’ebé iha, ita rezolve hotu ona, no ita bolu ona kompañia sira ne’ebé viola direitu traballadór sira-nian atu sira simu sansaun tuir lei traballu ne’ebé hakerek ona iha artigu 98, 99 ne’ebé konjuga mós ho artigu 49 husi dekretu lei númeru 19,” Nia dehan.

Kada fulan empreza foun rejista iha SERVE

Ikus-ikus ne’e, dadus hosi Servisu Rejistrasaun no Verifikasaun Emprezariál (SERVE) hatudu katak kompañia sira komesa fali ona rejistu sira-nia atividade komersiál.  

Diretór Ezekutivu SERVE, Florêncio Sanches, informa númeru empreza  foun sira ne’ebé   rejista iha SERVE entre 500 to’o 800.

SERVE nota katak númeru rejista empreza sa’e hosi tinan ida ba tinan seluk tanba impaktu hosi programa rekuperasaun ekonómika ne’ebé Governu aplika. (bit)