Hatutan.com, (22 Setembru 2021), Díli-Prezidente Repúblika nu’udar mós Komandante Supremu ba Forsas Armada, Francisco Guterres “Lú-Olo”, kontinua tau-matan ba membru FALINTIL-Forsa Defeza Timor-Leste (F-FDTL) sira-nia moris di’ak, sira-nia disiplina no sira-nia servisu hotu-hotu.

Xefe Estadu Maiór Jenerál F-FDTL, Tenente-Jenerál Lere Anan Timur hasoru malu ho PR Francisco Guterres Lú-Olo. Foto/Mídia PR

Prezidente Repúblika (PR) Francisco Guterres “Lú-Olo” haktuir lia-menon ne’e ba Xefe Estadu Maiór Jenerál F-FDTL, Tenente-Jenerál Lere Anan Timur iha enkontru semanál ne’ebé hala’o iha Palásiu Prezidensiál, Díli, Kuarta (22/09/2021).

“Laiha duvida nu’udar Komandante Forsas Armadas, ha’u sei tau matan ba sira-nia benestar (moris di’ak), sira-nia disiplina no sira-nia servisu hotu-hotu,” Tenente-Jenerál Lere Anan Timur haktuir lia-menon PR Lú-Olo nian ne’e ba jornalista sira ne’ebé Hatutan.com sita fali hosi pajina Facebook Presidência da República Democrática de Timor-Leste.

.Liuhosi enkontru ne’e, Tenente-Jenerál Lere Anan Timur informa mós ba PR Lú-Olo kona-ba situasaun Forsas Armadas nian, liuliu relasiona ho kolokasaun F-FDTL iha liña fronteira Timor-Leste ho Indonézia.

Advertisement

Tenente-Jenerál Lere Anan Timur afirma, maske iha diverjénsia ka opiniaun la hanesan husi lider nasionál sira, maibé hakarak ka lakohi, F-FDTL tenke ba fronteira tanba ne’e desizaun Governu nian.

Lere Anan Timur fundamenta katak kualkér Lei Defeza Nasionál no konseitu estratéjiku defeza nasionál ne’e mai husi Konstituisaun, hateten, defeza externa iha Forsa Defeza Timor-Leste nia liman.  Tanba ne’e, laiha dúvida F-FDTL tenke ba iha liña fronteira.

Tenente-Jenerál Lere Anan Timur garante kolokasaun membru F-FDTL iha fronteira sei la kria konflitu entre Unidade Patrullamentu Fronteira (UPF)  tanba prezensa F-FDTL nian atu kompleta malu iha servisu.

“Saida maka UPF nia servisu, husik sira hala’o sira-nia servisu no saida maka F-FDTL nia servisu husik sira hala’o sira -nia servisu,” Lere Anan Timur hateten.

Nia hateten, UPF ho F-FDTL la’ós atu ba jere fronteira, maibé ba atu fó seguransa ba fronteira tanba  atu jere fronteira ne’e iha komisaun integradu ida maka jere fronteira. (bit)

Advertisement