Hatutan.com, (22 Setembru 2021), Melbourne—Komunidade ne’ebé horik iha sidade Melbourne, Austrália, to’o agora sei trauma ho dezastre naturaís (rai-nakdoko) ho forsa magnitude  neen (6) iha Melbourne ho sidade sira besik.

Rai-nakdoko iha Melbourne, Austrália, 22 September 2021. Foto/Twitter-Tom Steinfort

Rai-nakdoko, kuarta dadeer (22/09/2021), iha tasi kle’an ho kilómetru 10 iha besik Mansfield iha Victoria. Rai-nakdoko ne’e nia forsa konsege to’o iha Sydney, Canberra ho  Tasmania.

Tuir ajénsia  Victoria State Emergency Service, katak rai-nakdoko ne’e sei la hamosu tsunami.

Edifísiu públiku lubuk ida hetan estragus. Iha foto-foto apartamentu no estrada barak estragus ne’ebé publika iha media sosiál.

Abitante ida hela iha península Bellarine, Ros, hateten ba  ABC Radio Melbourne katak dezastre ida-ne’e hanesan dezastre ne’ebé boot  liu iha istória dezastre rai-nakdoko iha Merbourne.

“Bee iha tanki mos nakdoko hotu. Ha’u la fiar ida-ne’e. Mas, ida-ne’e maka akontese,” Ros hateten.

Abitante seluk, Margot sente rai nia nakdoko ida forsa tebes.  nia hanoin nia oan feto maka halimar bainhira sira-nia uma tomak nakdoko.

“Nakdoko maka’as no kadeira ha’u tuur mós nakdoko hotu. Sasán hotu iha uma-laran book an,” nia hateten.

Prefeitu  Mansfield, Mark Holcombe hateten,  rai-nakdoko ne’e derrepente de’it. durante ne’e laiha istória kona-ba rai-nakdoko akontese iha Mansfield  to’o halo komunidade sira trauma. ABC.NET.AU | NEWS.COM.AU