Hatutan.com, (29 Outubru 2021), Dili—Governu Austrália liuhosi Embaixada iha Timor-Leste (TL), ‘promete’ ona katak, iha tinan 2023 sei oferese tán ró patrullamentu rua mai Komandu Jenerál FALINTIL Forsa DefezaTimor-Leste (F-FDTL), Komponente Navál, atu bele hala’o patrullamentu ba riku-soin iha tasi Timor.

Embaixadór Austrália iha TL, Petter Roberts. Foto/Hatutan.com

“Kooperasaun iha área seguransa marítima, Austrália sei fornese ró patrullamentu rua ba TL iha tinan oin. Alende ne’e, kooperasaun iha área Peace Keeping Operations no treinamentu no kapasidade,” Embaixadór Austrália, Petter Roberts, hateten hafoin sorumutu ho Vise Xefe Estadu Maiór F-FDTL, Brigadeiro Jenerál Calisto Santos ‘Coliati’, iha Kuartél Jenerál Fatuhada, Sesta (29/10/21).

Inisiativa Governu Austrália nian kona-bá atu apoia ró rua mai Komandu F-FDTL iha TL ne’e, parte rua diskute dezde tinan 2017, no Austrália presiza halo preparasaun ho didi’ak ba kondisaun ró rua ne’e, molok haruka mai TL iha 2023.

“Austrália la’ós fornese de’it, maibé sei fornese mós treinamentu nomós diskute kona-bá oinsá bele mantein. Entaun, bainhira Austrália fornese ró rua mai TL, iha mós programa manutensaun, no ida-ne’e importante duni, tanba presiza uza ró sira ne’e ho didi’ak. Tanba ne’e, ida ne’e la’os fornese de’it, maibé komitmentu atu servisu hamutuk atu treinu, no mentein,” Petter Roberts afirma.

Advertisement

Oras-ne’e Austrália nia forsa ativa iha TL, na’in 25 no ida-ne’e programa kooperasaun de’it iha ijiéne, ka servisu hamutuk hodi asesu iha área treinamentu.

Kooperasaun ida-ne’e, programa Austrália nian, nomós iha tempu Covid-19 no inundasaun, servisu hamutuk ho F-FDTL atu responde ba krize rua ne’e.

Governu Austrália mós sei halo kooperasaun ho Komandu Polísia Nasionál Timor-Leste (PNTL), iha área oioin, tanba Austrália sempre prontu atu koopera ho TL hodi ko’alia kona-bá prioridade.

Serimónia asina akordu entre Embaixadór Austrália, Petter Roberts, ho Xefe Estadu Maiór F-FDTL, Brigadeiro Jenerál Calisto Santos ‘Coliati’, iha Kuartél Jenerál Fatuhada, Sesta (29/10/21). Foto/Hatutan.com.

Xefe Estadu Maiór F-FDTL, Brigadeiro Jenerál Calisto Santos ‘Coliati’ haktuir, dezde kedan 2001 iha Munisipiu Aileu, durante halo primeiru rekrutamentu, kuandu hakotu funu TL nian, Governu Austrália hamutuk ho Portugál hodi fó apoiu ba F-FDTL.

“Tanba ne’e mak ohin ami ko’alia kona-bá autoridade marítima oinsá Austrália bele ajuda nomós ko’alia kona-bá ró ne’ebé Austrália prepara atu oferese ba F-FDTL iha Jullu 2023, ho tipu Guardian Class,” Coliati, subliña.

Kona-bá rekursu iha Komandu F-FDTL rasik atu halo operasaun ba ró rua ne’ebé atu fornese hosi Austrália, dezde 2019, komandu prepara ona membru sira hosi Komponente Navál nian, hamutuk Pelutaun rua, kompostu hosi ema na’in 60, ne’ebé ba ona tuir formasaun kona-bá operasaun ró iha Austrália, no balun iha baze navál Hera.

Advertisement

Hosi pelotaun rua ne’ebé partisipa treinamentu ne’e oinsá atu bele halo operasaun ba ró sira ne’e, bainhira simu ona hosi Austrália, hanesan formasaun tékniku eletrisidade, mákina ró nian, no komunikasaun, no eletrónika no buat hotu ne’ebé iha ró laran, ho ida-idak nia espesialidade.

Governu Austrália mós apoia TL liuhosi F-FDTL iha área rekursu umanu, prepara militár sira iha akadémia militár Austrália nomós iha área sira hanesan lojístika, administrasaun nomós área seluk kona-bá kilat.

Komandu F-FDTL, kompostu hosi Componente Terrestre (CT), Componente Apoia Serviço (CAS), Componente Formaçăo e Terreno (CFT), no Componente Navál (CV), inklui Unidade FALINTIL (UF), no Polísia Militár (PM).

Jornalista: Rogério Cárceres

Advertisement