Hatutan.com, (23 Setembru 2021), Díli–Liuhusi enkontru maratona no diskusaun naruk entre Federasaun Futeból Timor Leste  (FFTL), Órgaun Liga Futebol Timor Leste ( LFTL) ho klube sira iha Xanana Sport Centre, Díli, kinta (23/09/2021), hamosu konkordánsia mútua entre parte sira katak,   liga epoka 2021 la’o nafatin ne’ebé tuir kalendáriu sei hala’o iha fulan-Outubru, tinan ne’e.   

Konkordánsia esptre parte sira-ne’e hatudu katak parte sira mezmu iha diferensa maibé iha paixaun ba futeból iha Timor Leste no hakarak hamutuk ho órgaun kompetente sira iha area futeból atu lori dezenvolvimentu iha área futeból ba oin.

Prezidente FFTL, Francisco Jerónimo hateten, enkontru ne’e nu’udar pasu positivu ida ba futeból iha Timor tanba órgaun liga hamutuk ho klube hotu iha konkordánsia atu realiza liga tuir kondisaun ne’ebé iha.

FFTL sei la aumenta subside ba klube sira tuir ezijénsia ne’ebé iha, maibé FFTL apoiu mós klube sira ho pakote COVID-19 hodi bele hakmaan klube sira-nia gastu sira ba treinu durante situasaun pandemia COVID-19.

“Enkontru ida ohin ne’e iha desijaun rua mak importante, primeiru órgaun liga konkorda atu liga epoka ne’e lao no ida seluk mak klube sira konkordánsia ho subsídiu ne’ebé FFTL iha katak primeira divizaun hetan $20,000.00 no segundu divizaun hetan $10,000.00. Husi klube 20 ne’e ita fó mós subsídiu ne’ebé ita hanaran pakote COVID-19 ho montante $5,000.00 ba kada klube,” Francisco Jerónimo lia-tun ba jornalista sira hafoin termina enkontru entre parte sira-ne’e iha Bairru Grillos.

FFTL rekoñese katak situasaun atuál lori mós difikuldade ba  klube hotu tanba ho pandemia COVID-19 halo klube sira enfrenta mós difikuldade atu trata lisensiamentu nu’udar klube profisionál tuir rekizitu ne’ebé FFTL  no tuir prosedimentu FIFA no AFC nian.

Iha  epoka 2021 ne’e FFTL fó toleránsia, maibé iha epoka oin kada klube tenke trata nia lisensiamentu nu’udar klube profisionál,l atu nune’e, bele hetan subsídiu husi FFTL.

Rekizitu  nu’udar klube profisionál atu hetan subsídiu husi FFTL maka klube tenke iha jogadores, iha medikal checkup ba kada jogadór, iha fatin treinu no mós rekizitu seluk ne’ebé tuir padraun FIFA nian.

Iha fatin hanesan, prezidente LFTL, Nilton Gusmão hateten, sorumutuk ne’e hetan ona konsensu ida atu hahú hikas jogu liga ba époka ne’e iha tempu badak. Klube sira aseita no simu kondisaun hotu ne’ebé órgaun liga no FFTL propoin ba sira atu bele hala’o jogu iha situasaun ne’e.

“Ita iha komunikasaun ida ne’ebé di’ak tebes entre órgaun liga, FFTL no klube sira. Ha’u hanoin novidade di’ak liu mak futeból tenke hahú fila fali iha ita-nia rain iha tempu badak,” Nilton Gusmão hateten.

Nia hatutan ho situasaun pandemia COVID-19 órgaun liga sei limita partisipasaun adeptu iha kampu tanba jogu hotu iha liga sei lao tuir protokolu saúde ne’ebé Organizasaun Mundial Saúde (OMS) ho Ministériu Saúde (MS) propoin.

Prezidente Academica FC, Gil da Conceição hateten, maske todan Academica FC nafatin konkorda ho órgaun liga no FFTL atu kontinua liga iha époka ne’e.

 “Acadimica joga iha segundu divizaun la problema. Atividade futeból iha ne’ebé de’it ami prontu partisipa atu bele fasilita estudante no joven sira para sira bele dezenvolve sira-nia kapasidade no talentu joga bola.”

Ho subside ne’ebé iha la naton atu sustenta atividade klube nian iha tempu pandemia maibé Acadimica FC nafatin ho espíritu desportivu prontu enfrenta situasaun saida de’it iha liga tinan ne’e, atu nune’e, bele kontribui dezenvolve futeból iha Timor di’ak liután.

Órgaun liga sei fó tempu loron 20 ba klube sira atu halo rejistrasaun no hafoin ida-ne’e kontinua ho jogu ne’ebé tuir oráriu tentative sei hahú iha fulan-Outubru 2021 no termina iha fulan-Janeiru 2022.

Posibilidade, laiha jogu 12 Novembru époka ne’e

COVID-19 muda buat hotu, iha aspetu polítika, ekonomia sosial, kultura, relijiozu nune’e mós iha aspetu desportivu. Situasaun ekonomia ne’ebé hakiduk halo klube sira mós enfrenta situasaun difisil liga ho finanseiru klube nian.

 “Ha’u hanoin ha’u sei ko’alia fila fali iha internal órgaun liga hamutuk ho komité 12 Novembru. Tanba kalendáriu mós apertadu tanba ne’e ita hanoin atu adia, maibé desizaun seidauk definitivu no sei iha reuniaun iha órgaun liga mak deside,” Nilton Gusmão argumenta.

Hapara Kopa FFTL

Situasaun hanesan mai husi FFTL hodi deside la kontinua kopa FFTL iha époka ne’e tanba problema finanseiru.

“Ba kopa FFTL, tinan ne’e, ami hapara lai, ami halo atividade seluk ho asosiasaun sira tanba osan barak mak ita sakrifika tiha ona ba iha fundu COVID-19,” Francisco Jerónimo, prezidente FFTL akresenta. (bit)