Hatutan.com, (12 Outubru 2021), Díli-Maske enfrenta sasadik oioin iha prosesu jogu Liga Timor Leste, maibé la sai sasidik ba hala’o liga ne’e rasik. Ho nune’e, tersa (12/10/2021), iha Estádiu Munisipál Díli, Órgaun Liga hamutuk ho entidade relevante sira sei halo abertura ba jogu ne’e.

Oráriu Jogu/Dok. Liga Timor-Leste

Abertura jogu ne’e  sei hala’o iha tuku 16:00 Otl, entre FC Porto Taibesi vs FC Zebra.  Klube segundu divizaun  sei harame fali Estádiu Munisipál Díli ne’ebé durante ne’e laiha atividade. 

 “Hafoin pandemia iha ita-nia rain menus no ita haree katak iha ona espasu natoon atu kontinua hikas ho liga, nune’e  Órgaun Liga hahú kedas organiza  rejistrasaun no halo verifikasaun ba klube sira liuhusi apoiu subsídiu  husi Governu no Asian Football Confederation (AFC) no Federation International Football Association (FIFA) através Federasaun Futeból Timor-Leste (FFTL) atu ita nia kompetisaun tinan ne’e la’o hikas,” Diretór Verifikasaun LFTL José Carvalho ba Hatutan.com iha edifísiu LFTL, Díli.

Sasadik ne’ebé fundamenta liu hodi prejudika atividade jogu hotu maka situasaun pandemia global COVID-19, seluk fali maka dezentendimentu entre FFTL ho Orgaun Liga kona-ba trnaferensia fundu hosi Governu ba Órgaun Liga. Maibé situasaun sira-ne’e hotu konsege hakuur ho di’ak. Liuliu kontribuisaun parte relevante sira-nian, hanesan Sekretáriu Estadu Juventude Desportu (SEJD), FFTL ho kolaborasaun hosi klube futeból sira-nian, maka jogu ne’e realiza duni.

Advertisement

Liga Futeból Timor leste (LFTL) transformasaun hosi Liga Futeból Amadora (LFA) hafoin hetan nia estatutu hanesan liga profisionál timorense liuhusi  kongresu nasionál ne’ebé realiza iha Timor Plaza iha loron 15 fulan-Agostu 2020.

Prosesu barak ne’ebé órgaun liga halo atu bele realiza kompetisaun ba iha primeiru no segundu divizaun, ho hanoin bele kontinua lori espíritu paixaun ba futeból iha Timor Leste sai boot ba bei-beik.

 “Ohin ita  hahú abertura ba jogu segunda divizaun ne’e nu’udar susesu boot ida ne’ebé ita atinzi. Jogu abertura ne’e atu hatudu kompromisu ema hotu nian ba dezenvolvimentu futeból iha Timor Leste” José Carvalho hateten. (bit)

Advertisement