Hatutan.com, (08 Outubru 2021), Díli—Tribunál Distritál Díli (TDD), Sesta (09/10/2021), liuhosi leitura akordaun, fó liberdade ka absolve eis Inspetór Jerál jogu, Ministériu Turizmu (MT),  Miguel Lobato ho Lourenço de Oliveira nu’udár diretór empreza TH, hosi krime korrupsaun ativa ne’ebé previstu iha artigu 294 kódigu penál Timor-Leste (TL).

Arguidu na’in-rua livre tanba laiha faktus forte atu lori sira ba indemizasaun ka pena, maibé ho kondisaun ida katak, osan ho montante $10.000 ne’ebe arguidu na’in-rua fó ona ba Governu, hela ba kofre Estadu.

Advogadu José Guterres kontente no aseita ho desizaun Tribunál-nian, tanba desizaun ne’e konsidera justu ba nia kliente-sira.

Antes ne’e, MP akuza katak, iha 22 Dezembru 2017, tuku 15:00 otl, arguidu Lourenço de Oliveira kontaktu ba Miguel Lobato hodi entrega envelope rua.

Lourenço de Oliveira husu ba Miguel Lobato  atu entrega envelope rua ne’e ba Ministru Turismu, Manuel Vong no Vise Ministru Turizmu, Rui Menezes.

Kada envelope hakerek de’it lia-fuan 5K, maibé la hakerek atu dirije ba se, no Miguel Lobato dehan de’it atu entrega ba Ministru Turizmu, Manuel Florêncio da Canossa Vong no Vise Ministru, Rui Menezes, ho montante osan iha envelope laran $5.000.

Iha loron hanesan, arguidu Miguel Lobato lori envlope rua ba edifísiu Ministériu Turizmu, maibé Ministru ho Vise-Ministru laiha fatin, nune’e arguidu entrega de’it envolpe rua ne’e iha Diretora Gabinete Ministru ho inisiál JLFSCA.

Iha momentu ne’ebá, JLFSCA loke no sura kedan osan, kada envelope ho montante $5.000 ho totál envelope rua $10.000.

Osan ne’ebé arguidu-sira entrega, laiha pedidu ruma hosi Ministériu Turizmu, maibé  arguidu Lourenço de Oliveira fó de’it, dehan atu apoia ba selebrasaun dias natalis.

Bainhira Ministru Manuel Florêncio da Canossa Vong to’o iha Ministériu, simu informasaun hosi JLFSCA katak, iha envelope rua ho osan montante $10.000, entrega hosi arguidu Miguel Lobato, dehan atu entrega ba Ministru no Vise-Ministru, maibé Ministru rezeita atu simu envelope ne’e no Ministru fó órden ba Diretora hodi halo deklarasaun ba iha Ministériu Públiku (MP).

Reasaun ne’e mós akontense ba Vise-Ministru Rui Menezes, bainhira simu informasaun hosi JLFSCA katak, iha envelope rua ho osan montante $10.000, entrega hosi arguidu Miguel Lobato, no nia rezeita atu hatene kestaun ne’e.

Empreza TH hala’o atividade explorasaun jogus de fortuna no azar, hanesan mákina slot mesin.

Tuir artigu 6 no 7 dekretu lei númeru 6/2016, 20 Abríl kona-bá rejime jurídiku lisensiamentu, exportasaun no kontrolu  ba atividade  jogu-sira no diversaun, mákina jogu no mós jogu tradisionál  dehan ‘kompeténsia  Ministru ka Ministru tutela, hodi fó autorizasaun  ba atividade explorasaun jogu sosiál hosi diversaun, mákina jogu no jogu  tradisionál, mediante pareser hosi inspetór jerál jogu, kabe ba  inspetór jogu podér fiskaliza, kontrolu, inspesaun no auditoria ba atividade  explorasaun no prátika jogu sosiál no diversun mákina jogu no mós jogu  tradisionál (tuir artigu 7 númeru 2 alinea c mezma diploma).

Tuir artigu 15, maski diploma ho tema ‘Extinsaun ba autorizasaun no lisensa’ dehan fó autorizasaun ba atividade jogu bele kaduka ho termu prazu no revogasaun ba autorizasaun lisensa ba explorasaun deside hosi Ministru ka Ministru tutela.

Tuir loloos arguidu Miguel Lobato hanesan Inspetór Jogu iha Ministériu Turizmu, tenki ho imparsialidade no mós boa fé, atu hala’o podér ne’ebé lei hatuur no konfia ona ba nia, atu ezerse nune’e bele hala’o kna’ar ho lolo’os tuir artigu iha diploma ne’e.

Maibé, kontráriu tanba nia iha ligasaun di’ak ho arguidu Lourenço de Oliveira, nune’e aseita atu  Lourenço de Oliveira kontaktu hodi entrega hikas osan ba Ministru no Vise-Ministru no arguidu Miguel Lobato hatene didi’ak katak, tuir loloos aktu ne’e labele halo hosi Inspetór Jogu ne’ebé sei kestiona ninia imparsialidade bainhira fó paraser no hala’o podér hanesan hatuur ona iha artigu 7 númeru 2 alinea c, dekretu lei númeru 6/2016.

Arguidu Lourenço de Oliveira prefeitamente hatene kona-bá prosedimentu atu prolonga autorizasaun no lisensiamentu ba atividade explorasaun jogu slot mesina, kabe ba responsável másima Ministériu Turizmu no kontratu ne’ebé arguidu asina ho Governu iha limitasaun tempu no futura Governu através Ministériu Turizmu iha kompeténsia bele suspende ka prolonga.

Maibé, arguidu Lourenço de Oliveira iha intensaun futuru hakarak hetan prolongasaun ba autorizasaun no lisensa  atividade jogu, no hala’o asaun ne’e nune’e bele tau iha kauza imparsialidade hosi Ministru ka Ministru tutela, bainhira atu foti desizaun suspende ka prolonga.

Ho hahalok arguidu na’in-rua nian, MP akuza arguidu ba prátika krime korrupsaun ativa, ne’ebe previstu iha artigu 294 númeru 2 hosi kódigu penál TL.

Audiénsia julgamentu ne’e prezide hosi Juíz singulár Afonso Carmona, MP reprezenta hosi Prokuradora Lídia Soares no arguidu hetan asisténsia legál hosi advogadu privadu, Jose Guterres no Pedro Aparicio. (Car)