Hatutan.com, (18 Outubru 2021), Díli-Empreza Burger King kompromete kontinua tau prioridade ás liubá seguransa kliente sira-nian no submete ona dokumentu relevante sira no kontinua serbisu hamutuk ho Governu durante sira-nia investigasaun.

Notisaun iha Relasaun: AIFAESA Prosesa Burger King Tuir Lei 

Karta Ofisiál hosi Burger King ba Redasaun Hatutan.com

“Ami nia prioridade ás liu mak seguransa ba ami nia kliente no ami submete ona dokumentu relevante sira no kontinua serbisu hamutuk ho Governu durante sira-nia investigasaun no nafatin ho kompromete ba kualidade hahán ne’ebé ás ho seguransa ne’ebé tuir padraun.”

Ne’e maka nota hosi Borger King ne’ebé hato’o direta ba redasaun Hatutan.com, Segunda (18/10/2021), iha Díli, relasiona ho notísia kona-bá  Autoridade Inspesaun Fiskalizasaun Atividade Ekonómiku, Sanitária, no Alimentár (AIFAESA) ne’ebé notífika Burger King tanba komete infrasaun Lei balun maka vigora iha Timor-Leste.

Antas ne’e, AIFAESA enkamiña ona infrasaun empreza Burger King nian ba ekipa jurídiku atu estuda hodi hasai notifikasaun no prosesa tuir Lei maka vigora iha Timor-Leste.

AIFAESA fó medida rigór ne’e ba Burger King relasiona ho inspesaun ne’ebé halo hosi  Departamentu Operasionál  AIFAESA halo ba empreza Burger King ne’ebé deteta na’an manu “ayam potong” iha kaixa hamutuk 14 inklui ho falun ho plástiku hamutuk neen (6) iha Restaurante Burger King Timor Plaza ho Colmera expire ka liu ona prazu.

Jornalista : Carmelita Isaac