Hatutan.com, (18 Outubru 2021), Díli—Dezde tinan 2017, Governu Timor-Leste (TL), fó fiar ba Joseph Issa hosi nasaun Lebanon, hodi sai hanesan Komisáriu Jerál TL ba Expo Dubai 2020. Joseph Issa oras ne’e daudaun mós hanesan Konsul Onoráriu TL iha Lebanon.

Notísia iha Relasaun : Delegasaun TL ba Expo Dubai, Asosiasaun HAK Konsidera Insulta ba Povu

Iha loron 21 Agostu 2018, Joseph Issa hasoru-malu ho Primeiru Ministru (PM) Taur Matan Ruak, iha Palásiu Governu, Dili, Timor-Leste. Foto/Mídia GPM

Kona-bá novidade no progresu ne’ebé ekipa Expo Dubai  TL nian iha Dubai  dezde abertura to’o ohin,  Jornalista Hatutan.com (HC), Cipriano Colo, halo entrevista eskluzivu via telefónika ho Enviadu Espesiál TL ba Uniaun Emiradu Árabe (UAE) hanesan mós Vise-Komisáriu Jerál Expo 2020 Dubai-Timor Leste, Arif Abdullah Sagran (AS).

HC: Oinsá ho situasaun jerál dezde hahú abertura Expo Dubai to’o ohin loron?

AS: Jerálmente oras-ne’e daudaun, mundu sei enfrenta hela situasaun Covid-19, nune’e espetativa Komisaun Organizadora Expo Dubai, ne’ebé antes ne’e hakarak atu iha fulan neen nia laran bele to’o ema 25 tokon, la konsege atinje. Maski nune’e, vizitante-sira entuziazmu nafatin, inklui sira ne’ebé vizita ba pavillaun TL kada loron to’o ema na’in 500.

Ema barak interesadu ho TL, sira barak mós hakarak sosa produtu TL, no ita-nia pesoál-sira ne’ebé hein pavillaun kontente tebetebes atu bele fó atendimentu, inklui esplika kona-bá identidade Timor-Leste nian.

HC: Hosi produtu TL ne’ebé ita aprezenta iha Expo Dubai, produtu saida de’it mak interesadu liu ba vizitante-sira?

AS: TL nia rikusoin hanesan mármore, potensiál tebes no sai hanesan pontu de atensaun iha setór bisnis, iha dezenvolvimentu ekonomia Timor-Leste nian. Produtu seluk tan ne’ebé sai pontu estensaun mak kafé, nuu no produtu agríkola inklui turizmu no seluk tan.

Alende mins-rai, TL iha potensialidade, tanba asset barak tebes ne’ebé mak sei toba hela no seidauk dezenvolve ho di’ak. Tanba ne’e, ba oin Governu presiza halo investimentu boot ba setór sira ne’ebé la’ós mina no gas, nune’e bele hasa’e reseita Estadu.

HC: Totál produtu hira mak ita aprezenta iha espozisaun ne’e?

AS: Timor-Leste iha produtu hamutuk 88, mai hosi produtu agríkola, minerál, turizmu no seluk tan. Produtu sira-ne’e maioria atrativu tebes atu dada investor-sira hosi nasaun oioin hakarak investe iha TL.

Enviadu Espesiál TL ba Uniaun Emiradu Árabe (UAE) hanesan mós Vise-Komisáriu Jerál Expo 2020 Dubai-Timor Leste, Arif Abdullah Sagran. Foto/Espesiál

HC: Iha ona investor ruma mak interese atu halo investimentu hafoin halo vizita ba ita-nia pavillaun?

AS: Sim, até iha grupu boot ida ne’ebé interesadu hakarak halo investimentu iha TL durante tinan lima ho montante millaun $5. Ida-ne’e sira hato’o ona la’ós verbál de’it, maibé eskrita ba ita nia Governu. Ita hein katak, iha ona regra hosi TL ne’ebé bele fó fleksibilidade no garantidu.

Buat ne’ebé sei sai difikuldade boot ba TL maka Lei no regulamentu sira seidauk garantia totál ba investor estranjeiru-sira atu bele investe iha TL.

HC: Grupu ka empreza ne’e naran saida?

AS: Ida-ne’e la’ós ha’u mak anunsia no ha’u labele fó-sai duni, tanba Governu mak iha kompeténsia atu fó-sai naran.

HC: Rona dehan Komisáriu Jerál TL ba Expo Dubai ne’e ema nasionalidade Lebanon. Informasaun ne’e oinsá?

AS: Hanesan ne’e, dezde 2017 TL fó fiar ba Onoráriu Konsuladu TL iha Lebanon ho naran Joseph Issa  atu bele sai Komisáriu Jerál ba Expo Dubai. Nia hetan fiar hosi Governu Timor-Leste tanba simu karta hosi Primeiru-Ministru atu sai Komisáriu Jerál Expo TL iha Dubai.

HC:  Oinsá ho nia saláriu no remunerasaun ne’e Governu Timor-Leste maka responsabiliza?

AS: La’e, durante nia assume kargu hanesan Komisáriu Jerál ne’e Governu TL la selu buat ida. Nia hala’o serbisu no dedikasaun voluntáriu. Sim, iha kontestu internasionál, Komisáriu ne’e nasaun la selu. Tanba nia mós sai ona Konsuladu Onoráriu  Timor-Leste kleur ona iha Lebanon no to’o oras-ne’e mós nia sei hela nafatin iha Lebanon, maibé tanba distánsia hosi Lebanon ba Dubai besik hela, nune’e fasil no hakat ba Dubai besik-liu.

HC: Atividade saida maka ikusliu ba loron ohin nian iha pavillaun TL?

Bandeira nasionál TL. Foto/MTKI

AS: Ohin, ne’e loron boot ba TL iha Expo Dubai. Ohin loron pavillaun hotu-hotu iha Expo Dubai hasa’e Bandeira nasionál TL. Hahú tuku 09:00 oras Dubai, ita sei hala’o asár Bandeira no kontinua kedan ho diskursu hosi Xefe delegasaun TL reprezenta hosi Ministru Koordenadór Asuntu Ekonómiku (MKAE), Joaquim Amaral, akompaña direta hosi Ministru Estadu Uniaun Emiradu Árabe (UEA), Ahmed Al Sayegh. Sei kontinua ho enkontru bilaterál entre UEA  ho Timor Leste bisnis forum no sei taka ho Timor-Leste kulináriu iha tuku 18:00-21:00 oras Dubai.

Loron tuir mai, 19 fulan-Outubru, sei iha serimónia asinatura Kooperasaun entre TL ho UEA kona-bá Aero Space Agreement ne’ebé reprezenta hosi Ministru Transporte no Komunikasaun TL, José Agostinho da Silva ho UEA.

HC: Públiku preokupa ho delegasaun TL ba Expo Dubai ne’ebé konsidera boot liu, tanba iha ema na’in-120, aumenta tan membru Governu na’in-hitu, inklui ema na’in 14 ne’ebé ba antes ona, no ida-ne’e nesesidade duni?

AS: Ida-ne’e desizaun hosi Governu no ha’u labele fó komentáriu.

Antes ne’e, Iha loron 21 Agostu 2018, Joseph Issa hasoru-malu ho Primeiru Ministru (PM) Taur Matan Ruak, iha Palásiu Governu, Dili, Timor-Leste. (**)

Notísia iha Relasaun : Delegasaun TL “Nadodon” ba Dubai Viola Dekretu Governu kona-bá Viajen Estranjeiru