Hatutan.com, (24 Outubru 2021), Díli— Vitória kontra Fitun Estudante lori hikas esperansa foun ba Academica FC atu hakat ba primeira divizaun iha epoka 2022.

Kontra Atake entre jogadór Academica FC ho Fitun Estudante. Foto/LFTL.

Academica FC hakarak hatudu ba públiku katak, jogu minutu 90 mak determina duni futuru klubu ida nian, esforsu no servisu makás iha ekipa, sei loti mós vitória nu’udár esperansa foun atu hakat ba oin.

Hafoin manán Fitun Estudante iha jogu daruak grupu A, Academica FC kuda kedan grupu A ne’ebé kumanda husi Porto Taibesse, tanba Academika FC iha pontu neen (6) ho pozitivu bola tolu (3).

Bainhira jogu hahú, Fitun Estudante hahú jogu primeira parte ho tensi as, hodi halo atake ba iha parte Academica FC, maibé ho disiplina no mantein ho táktika ne’ebé iha, Academica FC konsege asegura nia ekipa hodi halo auto kontrolu no adapta ho situasaun jogu ne’ebé Fitun Estudante iha.

Academica FC konsege halo jogu di’ak no liu husi jogadór senior no kapitaun ekipa Joel Gaio ne’ebé komanda liña médiu Academica FC nian.

Fitun Estudante buka meius hotu atu bele konkista vitória iha primeira parte hodi asegura nia ekipa husi derrota.

Situasaun ne’e iha duni rezultadu, iha minutu ikus 45+1 Fitun Estudante lidera uluk ho golu ida ne’ebé marka husi jogadór Hilário Ximenes.

Golu ne’e lori vitória ba Fitun Estudante iha primeira parte no laiha tan mudansa ruma iha tabela to’o jogu primeira parte remata.

Tama ba segunda parte Academika FC  hahú hetan nia ritmu, maske nafatin iha presaun husi adversáriu.

Academica FC kontinua buka atu duni atrazu ne’ebé iha hodi halo impata ba jogu, nune’e bele asegura vitória iha minutu sira tuir-mai.

Academica FC nia esforsu hetan naroman bainhira baliza Fitun Estudante halo falta iha nia área rasik.

Academica FC hetan oportunidade di’ak ho bola “dua kali sentuhan” maibé Joel Gaio no Helmerindo Mendes falla ezekuta oportunidade ne’e.

Tama ba minutu 53, Fitun Estudante halo substituisaun ba nia jogadór hodi hasai Estefanos Freitas no hatama Pedro Pires .

Academica FC aproveita oportunidade ne’e hodi lansa kedas golu impata liu husi nia kapitaun Joel Gaio iha minutu hanesan.

Hare ba golu impata ne’ebé iha Fitun Estudante halo tan esforsu hodi troka jogadór iha minutu 55 iha ne’ebé Bernadino Baz sai no Mari Kefi tama.

Academica FC kontinua halo jogu atu bele hetan vitória no iha minutu 65 Pascoal Fernzndes hatama tan golu ida hodi muda skore ba 2:1, Academica FC lidera provizóriu.

Ekipa Academica FC. Foto/LFTL.

Ekipa rua nafatin halo kontra atake ba malu no Academica FC halo substituisan ba nia jogadór hodi dada sai Juvinal Boavida no hatama Deonizio da Costa.

Substituisaun ne’e lori matak malirin ba Academica FC tanba sira kontinua hatama golu liu husi avansadu Alexandre da Cruz hodi muda skore ba 3:1.

Atu duni atrazu ne’ebé iha, Fitun Estudante FC kontinua halo substituisaun hodi hasai Alberto Martins, Hermelo Conceição no Hilário Ximenes hodi hatama Expedito Ximenes, Samuel Pires no Sabino da Cruz, maske nune’e Fitun estudante la konsege muda skore iha tabela tanba Academica FC domina liu jogu.

Tama ba extra time segunda parte, Academica FC halo substituisaun hodi hasai avansadu Alexandre da Cruz no hatama médiu Rivaldo Freitas ho intensaun atu asegura vitória ne’ebé iha.

To’o apitu ikus lian laiha tan golu ruma no Academica FC save vitória ne’e hodi lidera hikas tabela klasifikasaun grupu A.

Hafoin jogu remata, segundu kapitaun Fitun Estudante Nélio Baz hateten, iha primeira parte ekipa Fitun Estudante joga di’ak liu maibé falla iha segunda parte liu-liu iha liña defeza ne’ebé Academica FC konsege aproveita hodi marka golu.

Iha parte seluk treinadór Academica FC Lusinho dos Santos expresa nia sentimentu kontente tanba jogadór sira konsege asegura pontu tolu ne’ebé halo sira sai vensedór provizóriu iha grupu A ho pontu neen (6).

Jornalista: Vito Salvadór