Hatutan.com, (14 Marsu 2023), Díli- Klube Primeira divizaun Timor-Leste, AD SLB Laulara rekolla tan pontu tolu importante hafoin iha terseiru jogu halakon nia a Académica FC ho skor 2-0.

Lee Mós : Edit Savio Marka Golu Rua, Lori Emanuel FC Halakon Coração FC 2-1

Joga iha Estádiu Munisipál Díli, Tersa (14/3/2023), AD SLB Laulara no Académica FC hatudu ambisaun atu manan jogu ne’e hodi asegura pozisaun iha tabela klarifikasaun primeira divizaun Liga Futeból Timor-Leste (LFTL) époka 2022-2023.

Foto/LFTL

Ekipa AD SLB Laulara hahú hala’o jogu liuhosi kombinasaun jogadór sira iha liña klaran no soe bola bá iha avansadu hodi halo atake bá Académica FC nune’e parte Académia FC mantein ho estratéjia hodi halo presaun bá Jogadór AD SLB Laulara atu nune’e bele halo balansu bá jogu.

Ekipa rua mantein ho ritmu jogu ne’ebé iha, AD SLB Laulara halo kontra atake iha minutu 6 no Jogadór avansadu Michel Hutabarat (26) konsege marka uluk golu ida hafoin simu asisténsia iha liña oin. Ho golu ne’e halo AD SLB Laulara lidera uluk jogu ne’e ho skor 1-0.

Maske AD SLB Laulara lidera uluk jogu ne’e, Académica FC lalakon espíritu no vontade atu halo jogu hodi lansa kontra atake bá AD SLB Laulara liuhosi tranzisaun ne’ebé iha.

Académica FC hetan oportunidade lubuk ida atu marka golu liuhosi Jogadór Alexandre da Cruz (10) ne’ebé lansa suta direita bá baliza, maibé baliza AD SLB Laulara sei bele salva.

AD SLB Laulara tenta halo jogu liuhosi bola badak no pasajen sira ne’ebé halo liuhosi kombinasaun Jogadór sira iha meiu kampu no avansadu, maibé Académica FC la husik no fó biban bá Jogadór AD SLB Laulara atu kontinua halo atake.

Tama bá minutu 20, avansadu AD SLB Laulara, Alexandro Ima Kefi (21) simu kartaun kinur hafoin halo falta hasoru defeza Académica FC Lexi Junior Atok (26). Académica FC kontinua halo esforsu hodi lansa atake ba adversáriu maibé nafatin falla.

Molok bá deskansa jogadór Académica FC, Erolismo Martins (4) simu kartaun kinur hafoin halo erru iha minutu 45+2. Ekipa AD SLB Laulara no Académica FC kontinua halo jogu no ekipa rua laiha ida mak marka tan golu too primeira parte termina.

Tama ba segunda parte ekipa Académica FC hasae kedas ritmu jogu hodi halo kedas atake bá AD SLB Laulara no hamosu ameasa lubuk ida hodi halo Jogadór defeza AD SLB Laulara ne’ebé komanda husi Filipe Oliveira (24) atrapalla no konsege halo falta hasoru Jogadór adversáriu.

Académica FC liuhosi Jogadór estranjeiru Damianus Putra (12) ne’ebé komanda iha liña klaran tenta nafatin halo jogu hodi domina bola no lansa kontra atake ba adversáriu AD SLB Laulara maibé laiha golu ruma akontese.

Jogadór AD SLB Laulara Cristóvão Fernandes (23) simu kartaun kinur iha minutu 57, liuhosi bola falta ne’ebé iha Jogadór Académica FC Damianus Putra (12) hola kedas oportunidade hodi suta bola falta maibé bola ne’ebé Jogadór ne’e tiru sei dook hosi alvu.

Académica FC mantein disiplina no sempre halo balansu ba AD SLB Laulara sira nia jogu, maibé falla iha pasajen no dalaruma Jogadór sira lakon oportunidade tamba bola ne’ebé pasa sai  hosi alvu.

AD SLB Laulara halo substituisaun hodi hasai Mouzinho de Lima (10) ne’ebé husu atu labele kontinua jogu hodi hatama Alexandro Lemos (9). Liu de’it minutu tolu, ekipa Académica FC mós halo substituisaun hodi hasai Juvinal Boavida (19) no hatama Helder Lopes (17).

Ekipa rua nafatin halo kontra atake bá malu. Académica FC kontinua hetan bola oportunidade lubuk ida, maibé nafatin falla atu halo golu.

Jogadór meiu kampu AD SLB Laulara, Jhon Frith de Oliveira (6) simu kartaun kinur hafoin halo protestu ba desizaun árbitru nian iha minutu 76. Liu de’it minutu ida Jogadór estranjeiru AD SLB Laulara, Baka Yoko Ozi (2) simu kartaun kinur hafoin halo falta hasoru Jogadór adversáriu.

Ekipa Académica FC kontinua halo atake bá adversáriu AD SLB Laulara no sempre halo ameasa liuhosi Jogadór avansadu estranjeiru Nortey Kojo (18), maibé falla iha finalizasaun.

Aproveita oportunidade ne’ebé iha, AD SLB Laulara halo kontra atake lais liu hosi bola oportunidade ne’ebé iha ho nune’e avansadu Alexandro Lemos (9) ne’ebé livre tenta halo kontra atake lais no halo asisténsia bá nia maluk Jogadór Kornelis Portela (11) ne’ebé livre no aproveita oportunidade ne’ebé iha hodi marka segundu golu bá nia ekipa hodi muda skor ba 2-0.

Hafoin golu ne’e Académica FC kontinua halo substituisaun hodi hasai Jogadór Calistro Pereira (22) no hatama Leandro Amaral (16) iha minutu 85.

Tama ba minutu 88 mosu insidente haksesu malu entre Jogadór Joel Gaio (6) no árbitru tamba bola falta ne’ebé iha, kapitaun ekipa Académica FC ne’e diretamente halo pasajen no árbitru konsidera bola halai hela nune’e husu atu tau bola halo para mak foin bele halo pasajen.

La satisfas ho desizaun árbitru nian, kapitaun Académica FC Joel Gaio (6) halo protestu no asaun ne’ebé nia halo árbitru konsidera la merese nune’e fó kartaun kinur, hafoin kinur ne’ebé iha kapitaun ekipa Académica FC kontinua halo protesta no ikus mai árbitru deside fó kartaun mean. Ho situasaun ne’ebé iha Académica FC obrigadu tenke joga ho Jogadór na’in-10 iha kampu laran.

Tama ba minutu 89, AD SLB Laulara kontinua halo substituisaun hodi hasai Michel Hutabarat (26) no hatama Marques de Carvalho (29).

Académica FC maske joga ho Jogadór na’in-10 sanulu nafatin tenta halo atake ba adversáriu hodi duni atrazu ne’ebé iha. Ekipa rua mantein jogu maibé laiha golu ruma akontese tan nune’e AD SLB Laulara kontinua halo substituisaun iha minutu 90+1 hodi hasai Cristóvão Fernandes (23) no hatama Aldo Amaral (19).

To’o jogu termina ekipa AD SLB Laulara mantein lidera jogu ne’e ho skor 2-0 no Académica FC obrigadu tenke simu derrota.

Treinadór Académica FC, Luisinho dos Santos Saco, hateten jogu ekipa rua la’o di’ak, maibé hanesan treinadór la satisfás ho desizaun árbitru nian tamba dezde jogu inísiu too agora árbitru nia desizaun sempre hamosu opiniaun públiku no la profisionál.

“Académica FC lakon ne’e la buat ida, maibé ami nia ekipa la satisfás ho desizaun árbitru nian ne’ebé la profisionál,” Lusinho dos Santos Saco hateten.

Treinadór ne’e subliña árbitru sira ne’ebé lidera jogu la ho profisionál nia impaktu bá jogadór tamba se nune’e bei-beik jogadór sira sei la profisionál tamba árbitru nia desizaun arbiru de’it no la tuir regra.

Treinadór AD SLB Laulara, Julião Monteiro hateten, “hanesan treinadór ha’u ladún satisfás ho saida mak ami nia Jogadór sira hatudu iha kampu laran maske rezultadu ami manan.”

Kona-bá arbitu ne’ebé lidera jogu nian dehan lakohi fó komentáriu tamba desizaun iha tiha ona.

Jornalista: Vito Salvadór