Hatutan.com, (09 Novembru 2021), Dili— Academica FC konkista vitória iha jogu ikus kontra adversáriu Zebra FC ho skore 3:1.

Academica FC konkista vitória iha jogu ikus kontra adversáriu Zebra FC ho skore 3:1. Foto/LFTL.

Vitória ne’e lori hikas Academica FC ba Primeira divizaun époka Liga Futebol Timor Leste (LFTL) tinan 2022.

Notísia iha Relasaun:Lica-Lica Lemorai FC Impede Mehi Nagarjo FC ba Primeira Divizaun

Treinadór Academica FC, Lusinho dos Santos hateten Vitória ne’e nu’udár rezultadu hosi esforsu no treinu hamutuk durante ne’e, tanba sei prepara an hodi enfrenta jogu ikus bainhira sai hanesan kampiaun grupu A.

“Parabéns ba jogadór sira nia esforsu no Vitória ne’ebé oferese ba klubu,” Lusinho Santos, hato;o parabens.

Nune’e mós treinadór Rogério Mook, simu rezultadu ne’ebé iha no husu atu estrutura no ema hotu ne’ebé hadomi Zebra FC mai hamutuk dezenvolve klubu iha époka oin, hodi enfrenta jogu segunda divizaun.

Ekipa rua tun kampu ho fiar an hodi enfrenta jogu ba loraik kmanek ne’e. Zebra FC buka oportunidade atu ultrapasa hikas ba primeira divizaun iha loraik ne’e bainhira manan Academica FC ho golu boot.

Nune’e mós ho Academica FC hakas an atu ho impata de’it nia hetan ona billete ba primeira divizaun époka oin.

Ambisaun ekipa rua sai duni iha kampu bainhira jogu hahú, jogadór sira hosi ekipa rua ho inisiativa buka hada’u bola hodi kontrola jogu nune’e bele halo uluk atake atu bele hada’u oportunidade hatama golu.

Tama ba minutu sanulu uluk, udan komesa tun hodi habokon kampu no obriga jogadór sira tenke halo esforsu hodi pasa bola as, enkuantu bola rai la la’o tanba belit iha bee leten.

Tama ba minutu 27, jogadór Zebra FC Estevão Soares fura uluk golu ida hodi muda skore ba 1:0. Lidera uluk iha jogu ne’e halo Zebra FC nia vontade no espiritu aumenta hodi halo nafatin atake ba Academica FC.

Academica FC konkista vitória iha jogu ikus kontra adversáriu Zebra FC ho skore 3:1. Foto/LFTL.

Udan nafatin makas no difikulta jogadór sira iha kampu laran tanba falla iha passa bola tanba bee iha kampu laran.

Academica FC halo esforsu hudu neutraliza atake hosi Zebra FC no buka hadi’a lina hodi halo gila fali kontra atake maibé laiha ameasa  signifikativu no rezultadu mantein to’o primeira parte remata.

Tama ba segunda parte, ekipa Academica FC hola kedan inisiativa hodi halo atake atu bele duni atrazu no halo impata hodi buka atu rekolla Vitória iha jogu ne’e.  

Ekipa rua nafatin ho ritmu jogu ne’ebé iha hodi buka atu hatama golu. Jogadór Zebra FC Castro Pereira simu kartaun kinur hafoin suta bola mate ne’ebé pertense ba Academica FC.

Tama ba minutu 52 jogadór Juvinal Boavida lansa golu ida ba rede Zebra FC hodi halo impata no muda skore ba 1:1.

Hafoin golu ne’e, Academica FC halo kedan substituisaun hodi hasai Deonisio da Costa no hatama Helder Lopes.

Ekipa rua mantein ho tátika ne’ebé iha no Zebra FC lansa ameasa tutuir malu ba iha Academica FC, maibé defeza hosi Academica FC sei bele antisipa no baliza sei bele salva bola hirak ne’e.

Academika halo kontra atake liu hosi kapitaun Joel Gaio ne’ebé fo bola dook ba avansadu Pascoal Fernandes no iha oportunidade ne’e so’e kedan ba Juvinal Boavida, ne’ebé iha pozisaun mesak hodi lansa kedam suta ida maibé baliza sei salva.

Zebra FC hola inisiativa hodi hasai nia jogadór Roy Al-Fath ne’ebé sofre aleiza no hatama Leonito dos Santo.

Avansadu Academica FC Pascoál Fernandes obrigadu tenke simu kartaun kinur hafoin halo falta hasoru baliza Zebra FC Belmiro Belo.

Zebra FC hahú hikas lansa ameasa ba Academica FC liu hosi Avansadu Estevão  Soares no Ireneu Coreia maibé bola sei dok hosi  alvu.

Ekipa rua koko atu halo balansu ba malu hodi buka oportunidade atu se mak lidera uluk. Academica FC nafatin halo esforsu hodi buka oportunidade atu halo golu no iha minutu 80 jogadór Academica FC Helder Lopes aproveita bola barullu iha area grandeal hodi hatama golu ida hodi muda skore ba 2:1.

Zebra FC halo kedan nia substituisaun hodi buka meius atu halo impata hikas tanba ne’e hasai Leonel Gama no hatama Napoleão Soares.

Liu de’it minutu balun Zebra FC kontinua halo substituisaun hodi hatama Rodolfo Belo no hasai Deonisio da Silva.

Ho substituisaun ne’e Academica FC kontinua haboot nia Vitória liu hosi avansadu Pascoal Fernandes iha minutu 87 hodi muda skore ba 3:1.

Tama ba tempu adisional Academika FC halo substituisaun ikus hodi hatama Martinho Vaz no hasai avansadu Pascoal Fernandes.

Ho rezultadu ne’e halo Zebra FC obrigadu tenke hela iha segunda divizaun no Academica FC avansa ba primeira divizaun époka oin.

Jornalista: Vito Salvadór