Hatutan.com, (08 Novembru 2021), Díli—Família boot no Ezekutivu  Federasaun Futeból Timor-Leste (FFTL), Domingu loraik (07/11/2021), tuku 16:00 Otl to’o tuku 21:00 Otl, halo reuniaun urjente no maratona hodi buka solusaun no desizaun ba kazu  subar amante ne’ebé deskonfia envolve hosi ezekutivu balun FFTL nian ho funsionária balun iha FFTL.

Iha Domingu dadeer, purvolta tuku 06:00 Otl, ezekutivu FFTL ne’e nia família, kompostu hosi  nia espoza, oan-feto no mane, inklui nia-alin rasik nia ferik-oan, kaer-toman pesoál ezekutivu FFTL  ne’e ho nia amante iha resintu FFTL nian.

Iha akontesimentu ne’e, família  hosi ezekutivu FFTL nian ne’e hamriik, baku no rakut, funsionária  FFTL ne’e no baku-rahun karreta marka Nisan ne’ebé funsionária FFTL ne’e nian tanba família deskonfia karreta ne’e rezultadu hosi amante maka pesoál ezekutivu FFTL ne’e sosa ba funsionária ne’e.

Ema lubun iha Bairru Formosa to’o Bairru dos Grillus, halai ba hobur no asiste akontesimentu ne’e. Nune’e halo pesoál ezekutivu FFTL ne’e moe no hamriik tebe nia oan feto nia kabun no tuku monu nia oan mane iha ema barak nia oin.

Família sira la simu no halo barullu iha resintu FFTL. Tanba durante ne’e pesoál ezekutivu FFTL ne’e la tama uma no dezde kedas hahú Covid-19, pesoál ezekutivu FFTL ne’e uza dormitóriu Xanana Sport Centre hodi sai hela fatin ho nia amante ne’ebé nu’udar mós funsionária FFTL nian.      

Vise-Prezidente FFTL, Aleixo Cobra. Foto/Hatutan.com

Ba akontesimentu ne’e, Hatutan.com ba halo konfirmasaun ho Vise-Prezidente FFTL, Aleixo Cobra iha Edifísiu FFTL, Segunda (08/11/2021). Aleixo Cobra konsidera akontesimentu ne’e hamonu imajen no prestíjiu FFTL nian. Nune’e, ezekutivu sira FFTL nian halo ona primeiru enkontru hodi buka solusaun no foti medida disiplinár ba pesoál ezekutivu FFTL ho funsionária FFTL ne’e.

“FFTL halo kedas enkontru alargada ida no bele konsidera enkontru maratona tanba lori oras barak hodi buka dalan atu solusiona problema ne’e,  maibé molok enkontru ne’e hahú família husi pesoál ezekutivu FFTL ne’e halo asaun greve ba iha edifísiu FFTL,” Aleixo Cobra haktuir.

 Maioria eezekutivu hotu iha FFTL la konkorda aktu amante ne’ebé deskonfia pratika hosi pesoal ezekutivu FFTL ne’e ho nia funsionária  tanba akontesimentu ne’e iha resintu FFTL no hamosu opiniaun públiku negativa ba FFTL hanesan sanak hosi organizasaun internasionál futeból nian ka FIFA (Federation International Football Association).

“Akontesimentu ne’e lori moe boot ba FFTL tamba kuaze ema hotu mai asiste no jogadór, inklui treinadór lubuk ida mak haree ho matan akontesimentu ne’e,” Aleixo Cobra nu’udar prezidente Asosiasaun Futeból Díli Leste ne’e hateten.

Iha enkontru ne’e, tuir Aleixo Cobra, seidauk iha desizaun final tamba ezekutivu barak sei uza fuan hodi tetu buat hirak ne’e hotu, maibé iha segundu reuniaun ne’ebé atu halo iha tempu badak  sei iha desizaun atu halo mosaun sensura hodi hatún no hasai pesoál ezekutivu FFTL no ho funsionária ne’e hosi FFTL.

To’o notísia ne’e publika, parte família ba ona iha Polísia Nasional Timor-Leste  hodi hato’o keixa tanba krime pesoál ezekutivu FFTL ne’e baku nia oan mane no nia oan feto iha públiku, inklui karreta Nisan ne’ebé família baku rahun ne’e lori ona ba Polísia hodi submete ba investigasaun no hanesan evidénsia.

Jornalista : Vito Salvadór