Hatutan.com (10 Novembru 2021), Díli—Emanuel FC rekolla vitória iha jornada ikus kontra adversáriu Atletico Ultramar FC ho skore 6:0.

Emanuel FC rekolla vitória iha jornada ikus kontra adversáriu Atletico Ultramar FC. Foto/LFTL.

Vitória ne’e lori Emanuel FC lidera tabela klasifikasaun grupu B no hakat ba Finál segunda divizaun époka ne’e.

Notísia iha Relasaun: Academica FC Susessu Hakat ba Primeira Divizaun Époka 2022

Atletico Ultramar obrigadu tenke tun ba sugunda pozisaun iha grupu B no sai hanesan runner-up hodi hamaluk Emanuel FC ba primeira divizaun iha époka oin.

Atletico Ultramar FC no Emanuel FC idaidak defende nia ambisaun iha jogu ne’e. Ekipa rua hahú ho kontra atake ba malu, maibé Emanuel FC iha liu oportunidade barak hodi halo ameasa ne’ebé lori risku ba iha ekipa Atletico Ultramar FC.

Emanuel FC kuaze domina jogu no halo bebeik atake ba iha nia adversáriu maibé seidauk prodúz golu ruma hodi muda skore iha tabela.

Ekipa Atletico Ultramar buka meius atu halo balansu ba jogu liu hosi tatika jogu ne’ebé iha maibé dalaruma falla no Emanuel FC kontinua halo ameasa.

Atletico Ultramar nafatin halo esforsu no simu orientasaun hosi treinadórr iha kampu ninin oinsa atu bele hadi’a jogu hodi asegura ekipa hosi ameasa ne’ebé ekipa adversáriu lansa.

Tama ba minutu 27  jogadór Emanuel FC Alexandre Moreira lansa uluk golu ida liu hosi servisu hamutuk ho Mario Quintão iha área grandeal Atletico Ultramar FC.

Ho golu ne’e halo Emanuel FC lidera uluk ho skore 1:0. Hafoin golu ne’e Emanuel FC kontinua domina bola hodi nafatin lansa ameasa ne’ebé halo Atletico Ultramar FC hela iha presaun nia laran.

Kapitaun Atletico Ultramar FC Ivan Lay simu kartaun kinur hafoin halo falta hasoru jogadór ekipa adversáriu nian.

Tama ba minutu 35 Emanuel FC kontinua aumenta golu liu hosi nia avansadu Alexandre Moreira hodi muda skore ba 2:0.

Liu de’it minutu tolu Avansadu  Filominu Savio hodi muda skore ba 3:0. Liu hosi golu ne’e halo jogadór Emanuel FC fiar an no halo atake barak liutan ba iha ekipa adversáriu.

Tama tempu adisionál Atletico Ultrama halo substituisaun ba nia jogadór hodi hasai Manuel Oliveira no hatama Arsenio Amaral. To’o tempu primeira parte remata Emanuel FC lidera provizóriu ho 3:0.

Tama ba segunda parte Emanuel FC hola inisiativa hodi halo kedan substituisaun ba nia jogadór hodi hasai Kevin Fernandes no hatama Zinedine Lopes, atu bele asegura vitória ne’ebé iha. Emanuel FC sei mantein nia ritmu hodi halo atake ba nia ekipa adversáriu.

Atletico Ultramar FC hahú hetan nia ritmu no hahú halo ameasa no sai hosi presaun hodi buka oportunidade atu bele hatama golu hodi duni atrazu ne’ebé iha.

Defeza Atletico Ultramar FC sofre aleiza no obriga treinadór tenke halo substituisaun hodi hatama Octavio Ximenes.

Atletico Ultramar nafatin halo esforsu no konsege halo balansu ba ekipa adversáriu nia jogu hodi lansa ameasa ba iha Emanuel FC maibé sorte seidauk tan ne’e seidauk produz golu ruma.

Atletico Ultramar kontinua halo substituisaun hodi hasai  Elvis da Silva no hatama  Domingos Amaral.

Sorte aat monu ba Atletico Ultramar FC iha minutu 59 hafoin Emanuel FC liu hosi kontra atake konsege lansa tan golu ida liu hosi  Mario Quintão hodi muda skor ba 4:0.

Emanuel FC hahú domina hikas bola hodi kontra jogu no halo hikas ameasa ba ba nia adversáriu Atletico Ultramar FC.

Tama ba minutu 66 Emanuel FC haboot nia skore liu hosi jogadór Filomeno Sávio hodi muda skore ba 5:0.

Emanuel FC halo substituisaun ba nia médiu hodi hasai Jonatas Pereira no hatama Angelito Tilman. Atletico Ultramar kontinua halo substituisaun ba nia jogadór hodi hasai Ivan Lay no hatama Lesi Romario Atok.

Hafoin substituisaun ne’e jogadór Atletico Ultramar FC Lexy Junior Atok obrigadu tenke simu kartaun mean hafoin halo falta grave hasoru nia adversáriu.

Atu asegura vitória ne’ebé iha Emanuel FC halo substituisaun ba nia jogadór hodi hasai Bernadino Sena, Fretelino dos Santos no Alexandre Moreira hodi hatama Vidal Coreia, Orlando belo no Vivaldo Magno.

Substituisaun ne’e atu asegura vitoria ne’ebé iha. Parte Atletico Ultramar FC halo substituisaun ikus hodi hasai Noel dos Santos no hatama Jorge Godinho.

Aproveita bola falta kapitaun Emanuel FC Zeferino Nheu ne’ebé hetan oportunidade lansa kedas golu ida hodi muda skore ba 6:0.

Jogadór Atletico Ultramar Lesi Romano Atok simu kartaun kinur hafoin halo falta hasoru kapitaun adversáriu.

To’o tempu normál termina vitória ba Emanuel FC no Atletico Ultramar obrigadu tenke hela nu’udár ranner-up.

Eis treinadór Sporting de Timor FC no atuál treinadór Atletico Ultramar FC Moises da Silva, hateten tékniku no preparasaun kuaze diak hotu, maibé falla iha komunikasaun entre jogadór sira, nune’e ikus mai tenke simu derrota ne’e.

Iha parte seluk treinadórr Emanuel FC Emiliano Ribeiro hateten vitória ne’e mai hosi preparasaun no treinu durante ne’e no lori ami sa’e ba primeira divizaun iha tinan oin. Tan ne’e agradese ba Maromak no ba jogadór sira inklui ekipa adversáriu.

Jornalista: Vito Salvadór