Hatutan.com, (14 Novembru 2021), Dili—Lalenok United FC kontinua hatudu nia superioridade iha liga Futeból Timor Leste (LFTL) époka ne’e, hafoin manan primeiru jogu kontra adversáriu Assalam FC ho skore 4:2.

Lalenok United FC kontinua hatudu nia superioridade iha LFTL époka ne’e, hafoin manan primeiru jogu kontra adversáriu Assalam FC ho skore 4:2. Foto/LFTL.

Ho vitória ne’e lori Lalenok United FC ba okupa provizóriu iha primeira klasifikasaun tabela primeiru divizaun LFTL jornada dahuluk, tanba rekolla pontu 3 no pozitivu bola 2, enkuantu Karketu Dili FC iha pontu hanesan, maibé pozitivu bola 1 de’it. Tanba ne’e, Lalenok United FC iha direitu hodi kudeta tabela klasifikasaun.

Notísia iha Relasaun:Karketu Dili FC Ukun Provizóriu iha Primeira Klasifikasaun ho Pontu Tolu

Enkuantu Assalam FC tenke tun ba zona mean, hafoin sofre golu 4 no negativu bola rua maske nia konsege responde golu rua ba adversáriu Lalenok United FC iha primeiru jogu.

Lalenok United FC hatudu kedan nia klase hanesan  ekipa kampiun primeira divizaun tinan kotuk liu hosi ameasa no atake ne’ebé halo iha minutu dahuluk bainhira arbitu  Romário S. dos Santos Teti hu apitu sinál jogu hahú.

Lalenok United FC lansa ameasa dahuluk liu hosi nia jogadór estranjeiru ne’ebé hanesan mós estrella ba klubu Italo Pimental (28) no liu de’it minutu ida Lalenok United lansa hikan ameasa ida liu hosi jogadór Danielson Araujo (26) no tama ba minutu 3 Lalenok United FC lidera uluk liu hosi golu Santiago da Costa (9) hodi muda skore ba 1:0.

Assalamu FC nafatin halo esforsu hodi buka oportunidade atu halo impata, maibé Lalenok United FC nafatin domina bola no halo ameasa barak liután ba Assalam FC.

Ho esforsu atu halo balansu ba tátika ekipa adversáriu, Assalam FC kontinua hakas an hodi buka meius atu bele hatama golu.

Aproveita failansu jogadór Lalenok United FC Osório Gusmão (6) iha liña kotuk avansadu Assalam FC Bonarudin Amin (17) aproveita hodi hatama kedan golu no muda skore ba 1:1 iha minutu 13.

Hafoin golu ne’e Lalenok United FC nafatin domina jogu no halo presaun barak ba nia adversáriu, maibé Assalam FC sei bele halo balansu liu hosi esforsu defeza sira nian.

Jogadór Assalam FC Emmanuel Tunnu (28) simu kartaun kinur hafoin halo falta hasoru Italo Pimental (28) iha minutu 31.

Lalenok United FC aumenta nia golu liu hosi Jogadór Daniel Adade (11) iha minutu 38, hafoin aproveita bola barullu iha gradeal laran.

Liu de’it minutu balun, ekipa adversáriu Assalam FC responde kedan golu ida liu hosi jogadór Hasan Costa (7), ne’ebé simu asisténsia hosi Armando Varela (12) iha minutu 40, hodi muda skore ba 2:2.

To’o primeira parte remata, ekipa rua fahe pontus hodi hein batalla iha segunda parte.

Iha segunda parte, ekipa Lalenok United FC halo kedan atake ba nia adversáriu Assalam FC liu hosi jogadór Daniel Adade (11), maibé la konsege marka golu tanba baliza sei iha oportunidade hodi salva.

Ekipa rua kontinua halo jogu tuir orientasaun ne’ebé treinadór sira orienta. Tama ba minutu 58 jogadór Lalenok United FC Danielso  Araújo (26) marka terseiru golu ba nia ekipa hodi muda skore ba 3:2.

Lalenok United FC nafatin halo presaun ba nia adversáriu liu hosi atake ne’ebé iha. Assalam FC halo esforsu máximu atu duni atrazu ne’ebé iha no tama ba minutu 61 ekipa treinadór liu hosi avaliasaun ne’ebé iha halo substituisaun hodi hasai  Andrew Budiono (15) no hatama Júlio Amaral (23), haree ba frakeza ne’ebé iha, Assalam FC kontinua hasai Armando Varela (12) no hatama Adão Doutel (18) iha minutu 63.

Jogu nafatin iha Lalenok United FC nia komandu, nune’e ekipa Assalam FC tenke halo esforsu hodi halo balansu, nune’e bele duni atrazu ne’ebé iha.

Iha minutu 68, Santiago Amaral (9) jogadór Lalenok United FC obrigadu tenke simu kartaun kinur hafoin kontra regra iha jogu nia laran.

Lalenok United FC halo substituisaun ba nia jogadór iha liña klaran, hodi hasai Osorio Gusmão (6) no hatama Melchior Ribeiro (29) iha minutu 73 .

Assalam FC nia jogu nafatin monu, nune’e kontinua halo substituisaun ba jogadór hodi hasai Hasan Costa (7) no hatama Theril Theny (37) iha minutu 77.

Assalam FC kontinua sofre golu iha minutu  78 hafoin Daniel Adade (11) hatama golu hodi lori Lalenok United FC lidera ho skore 4:2.

Hafoin golu ne’e, Assalam FC kontinua halo suntituisaun hodi hadi’a nia liña, tanba ne’e hasai Husen Costa (27) no hatama Delson Ulu (26) iha minutu 83.

Parte Lalenok United FC kontinua ho substituisaun hodi save pontu tolu, tanba ne’e treinadór hasai Italo Pimental (28) no hatama Lorenço Freitas (19) iha minutu 84.

To’o jogu termina, laiha tan golu ruma hodi muda skore iha tabela, nune’e Lalenok United FC fila ho pontus tolu no Assalam FC obrigadu tenke fila ho liman mamuk.

Hafoin jogu, treinadór Assalam FC Adu Marques hateten falla iha komunikasaun, nune’e nia ekipa la halo antesipasaun di’ak ba ekipa adversáriu ikus-mai tenke sofre derrota iha primeiru jogu.

Alem de ne’e, ekipa Assalam FC mós la konsege halo balansu ba jogu maski iha primeira parte impata no tenke sofre tán golu rua iha segunda parte, tanba ne’e ho fuan boot simu derrota ne’e.

Iha sorin seluk, Gaspar Amaral treinadór Lalenok United FC espresa sentimentu kontente ho vitória ne’e, maibé la satisfáz ho performa jogadór sira nian tanba sei falla iha parte balun, nune’e ikus-mai ekipa adversáriu aproveita no halo golu.

Jornalista: Vito Salvadór