Hatutan.com, (13 Dezembru 2021), Díli—Lalenok United FC rekolla pontu 1 iha jogu jornada da-limak Liga Futeból Timor-Leste (LFTL), hafoin impata kontra Karketu Díli FC.

Ekipa Lalenok United FC rekolla pontu 1 iha jogu jornada da-limak Liga Futeból Timor-Leste (LFTL), hafoin impata kontra Karketu Díli FC. Foto/LFTL.

Karketu Díli FC nafatin ukun tabela klasifikasaun provizóriu LFTL ho pontu 11, rezultadu hosi manán 3 no impata 2, enkuantu Lalenok United FC mantein iha pozisaun da-toluk ho pontus 7 hosi jogu haat manan 2, lakon 1 no impata 1.

Notísia iha Relasaun:Aitana FC Rekolla Vitória Dahuluk Kontra As Ponta Leste 2:1

Susesu ne’ebé Lalenok United FC rekolla liu hosi esforsu estra-ordináriu tanba ho de’it jogadór 10 hahú iha 23, hafoin defeza direita simu kartaun mean.

Susesu ne’ebé Lalenok United FC iha, obriga Karketu Díli FC tenke halo esforsu iha jogu ikus kontra As Ponta Leste, hodi save vitória no sai hanesan kampiaun LFTL époka 2021.

Karketu Díli FC iha ambisaun atu konkista vitória iha jornada da-limak ne’e, maibé falla tanba jogadór sira la kobsege aproveita oportunidade ho máximu tanba adversáriu hatudu jogu defensivu ne’ebé di’ak no disipliña.

Karketu Díli FC hahú jogu ho ritmu as hodi hasa’e tensi jogu no lansa kedan ameasa da-huluk liu hosi koordenasaun jogadór-sira iha meiu kampu no liña oin.

Ekipa rua hahú hasa’e tensi jogu no jogadór sira hahú hatudu joga brutu ka ‘kasar’ ba malu. Ekipa Lalenok United FC nia jogadór sira kuaze joga ho emósaun hodi rezulta falta tutuir-malu hasoru jogadór adversáriu.

Tama ba minutu 18, jogadór Lalenok United FC Francisco Savio (24) simu kartaun kinur primeiru, hafoin halo falta hasoru jogadór Karketu Díli FC.

Ho kartaun kinur ne’e, ekipa rua nia jogu hahú manas liu tán. Tama ba minutu 23, Francisco Savio (24) simu kartaun kinur segundu aumesmu tempu kartaun mean hafoin basa jogadór Karketu Díli FC Gaudencio Monteiro (14).

Hafoin kartaun mean ne’e, Karketu Díli FC kuaze atu domina jogu maibé falla aproveita oportunidade tanba atake ne’ebé iha la tuir nia tarjetu no la iha alvu.

Lalenok United FC mantein nia ritmu jogu no halo kontra atake liu hosi avansadu Italo Pimentel (28) no Daniel Adade (11).

Defeza esquerda Lalenok United FC Zacarias Cabral (22) tenke simu mós kartaun kinur iha minutu 27, hafoin halo erru iha nia liña rasik.

Jogu entre ekipa rua nakonu ho emosaun tanba ekipa rua idadak mai ho nia ambisaun atu bele manan jogu ne’e.

Norberto Gonsalves (13) jogadór Karketu Díli FC tenke simu kartaun kinur, hafoin halo falta hasoru jogadór adversáriu Zacarias Cabral (22) iha área grandeal oin iha minutu 37.

Karketu Díli FC halo esforsu hodi halo substituisaun ba jogadór iha liña klaran hodi hasai António Provirio (23) no hatama Gelvanio Alberto (10) iha minutu 38.

Ekipa Lalenok United FC. Foto/LFTL.

Ekipa rua ida-idak mantein nia ritmu jogu no jogadór Santiago da Costa (9), obrigadu tenke simu kartaun kinur iha minutu 45, tanba halo falta iha liña klaran hasoru jogadór adversáriu.

Hafoin kartaun kinur ne’e, ekipa Lalenok United FC kontinua halo presaun ba nia adversáriu liu hosi kontra atake ne’ebé lais.

Jogadór Italo Pimentel (28) no Patrick Berko (25) falla ezekuta bola oportunidade tanba la kona alvu. Hafoin failansu ne’e ekipa Lalenok United FC kontinua hadi’a liña no aproveita oportunidade hodi marka golu iha minutu 45+1 liu hosi jogadór Daniel Adade (11) ne’ebé simu asistensia hosi Italo Pimentel (28).

Lalenok United FC ukun ho skore 1:0. Jogadór Karketu Díli FC Gelvanio Alberto (10) obrigadu simu kartaun kinur iha minutu 45+3.

Tama ba segunda parte, ekipa rua nafatin halo kontra atake ba malu hodi hada’u oportunidade atu bele konkista vitória.

Karketu Díli FC maske joga ho jogadór kompletu, maibé falla domina jogu nune’e Lalenok United FC sempre halo ameasa liu hosi jogadór Italo Pimentel (28).

Lalenok United FC halo substituisaun ba nia jogadór iha liña klaran, hodi hasai Santiago da Costa (9) no hatama avansadu Danielson Araujo (26) iha minutu 70.

Karketu Díli FC halo esforsu hodi troka jogadór iha liña avansadu, nune’e hasai Gaudencio Monteiro (14) no hatama Silvestre Gama (21) iha minutu 74.

Ho substituisaun ne’e, Karketu Díli FC seidauk bele domina jogu no kontinua sofre ameasa hosi ekipa Lalenok United FC.

Karketu Díli FC lansa ameasa liu hosi bola kantu, maibé adversáriu konsege antesipa ho di’ak no disiplina iha bola kantu, nune’e Karketu Díli FC nafatin falla halo golu impata.

Karketu Díli FC kontinua halo substituisaun hodi hatama Zenio Soriano (3) no hasai José Silva (24) iha minutu 81.

Ekipa rua nafatin halo atake ba malu, maibé falla halo golu. Patrick Berko (25) jogadór Lalenok United FC simu kartaun kinur, hafoin halo falta hasoru jogadór Karketu Díli FC Boateng Appiah (7) iha minutu 83.

Karketu Díli FC kontinua halo esforsu hodi lansa atake ba Lalenok United FC hodi hadau oportunidade atu halo impata.

Ekipa Lalenok United FC rekolla pontu 1 iha jogu jornada da-limak Liga Futeból Timor-Leste (LFTL), hafoin impata kontra Karketu Díli FC. Foto/LFTL.

Jogadór avansadu sira mantein sira nia esforsu no ikus mai rezulta golu impata iha minutu 88 liu hosi jogadór Gelvanio Alverto (10) aproveita bola ulun ne’ebé defeza adversáriu la konsege antesipa ho di’ak.

Ho golu ne’e, ekipa Karketu Díli FC kontente no halo selebrasaun hodi haklalak iha kampu ninin no hatudu jestu kontente, tanba konsege halo impata.

Nataniel Reis (8) jogadór karketu Díli FC simu kartaun kinur iha minutu 89 hafoin halo selebrasaun ba golu ne’ebé nia ekipa hatama.

Tama ba minutu 90, jogadór Silvestre Gama (21) hosi Karketu Díli FC no Daniel Adade (11) hosi Lalenok United FC tenke simu kartaun kinur hafoin komete erru. To’o jogu termina, ekipa rua obrigadu fahe pontu ho skore 1:1.

Treinadór Lalenok United, Gaspar Amaral hateten, ekipa ne’e iha ambisaun atu konkista vitória ne’e hodi kansela Karketu Díli FC nia festa ba kampiaun, maske la konsege tanba jogadór sira la disiplina ikus mai tenke halo esforsu hotu matéria jogadór ne’ebé ikus mai obrigadu tenke rekolla de’it pontu ida.

Asistente treinador Karketu Díli FC, António Timoteu hateten Lalenok United FC hanesan ekipa kampiaun ba LFTL tinan kotuk nune’e fo impaktu ituan ba jogadór Karketu Díli FC nia mental, nune’e tenke sofre uluk golu maske adversáriu ho de’it jogadór na’in 10.

Jornalista: Vito Salvadór