Hatutan.com, (12 Novembru 2021), Dili— Hafóin Karketu Dili FC halakon adversáriu Aitana FC ho eskore 1:0 iha primeiru jogu jornada dahuluk primeira divizaun époka ne’e, lori kedan Karketu Dili FC ba tuur iha primeira klasifikasaun no Aitana FC obrigadu tenke hela iha zona me’an.

Jogu entre Aitana FC ho Karketu Dili FC. Foto/LFTL.

Vitória ne’e halo Karketu Dili FC optimista liutan atu enfrenta jogu sira tuir mai, hodi save pontu tolu ho vitória hodi asegura ekipa ne’e sai kampiaun iha époka ne’e.

Notísia iha Relasaun:Emanuel FC Hakat ba Finál Segunda Divizaun

Karketu Dili FC no Aitana FC ida-idak defende nia klase nu’udár klubu dahuluk hodi halo jogu ida atrativu no nia adeptus sira ne’ebé akompaña direita jogu iha estádiu munisipál Dili.

Karketu Dili FC hola inisiativa hodi halo kedan atake ba nia adversáriu liu hosi nia Avansadu Gelvanio Alberto (10), maibé bola ne’ebé nia lansa sei dook hosi nia tarjetu.

Aitana FC la hakmatek hodi buka oportunidade liu hosi avansadu Edit Savio (9), maibé seidauk bele produz golu.

Iha jogu nia laran jogadór Aitana FC sempre halo falta hodi fó oportunidade ba ekipa adversáriu domina bola.

Ekipa Aitana liu hosi nia avansadu Rivaldo Coreia (17) hetan oportunidade kmanek iha minutu maibé bola sei salva hosi defeza adversáriu ne’ebé ikus mai falta no rezulta kartaun kinur ba kapitaun Karketu Dili FC Domingos Ramós (5) iha minutu 22.

Haree ba oportunidade ne’ebé ekipa adversáriu hetan, Karketu Dili FC koko halo kedan balansu ba jogu hodi hadau oportunidade atu domina hikas jogu ho kontrolu bola hosi ain ba ain.

Kapitaun Aitana FC Gilson dos Reis (10) obrigadu tenke simu kartaun kinur hafóin halo protestu hasoru desizaun ne’ebé Arbitu Pedro Maia Carvalho fóti hasoru nia ekipa iha minutu 25.

Karketu Dili FC. Foto/LFTL.

Karketu Dili FC nafatin mantein nia ritmu hodi lansa atake ba nia ekipa adversáriu maibé Aitana FC mós nafatin antesipa hodi lansa kontra atake liu hosi oportunidade ne’ebé iha.

Karketu Dili FC kontinua lansa atake ba iha Aitana FC liu hosi avansadu Gaudencio Monteiro (14) iha minutu 45.

To’o tempu primeira parte remata ekipa rua laiha ida mak manan, nune’e sira fahe pontus hodi enfrenta segunda parte.

Tama ba segunda parte ekipa rua sei mantein ho jogadór sira iha primeira parte hodi buka meius hadi’a efetividade iha kada liña atu servisu diak liutan hodi fó vitória ba ekipa.

Karketu Dili FC kontinua hatudu nia superioridade hodi domina jogu liu hosi kolaborasaun diak entre  Valarino Boaventura (7) no Nataniel Reis (8) iha médiu.

Ho estratezia ne’ebé iha Karketu Dili FC kuaze domina jogu no halo atake dalabarak ba iha ekipa adversáriu maibé sorte seidauk iha tanba seidauk bele hatama golu.

Atu halo balansu ba jogu ekipa Aitana FC halo substituisaun ba nia jogadór iha parte klaran hodi hasai Gilbert Lay (7) no hatama Alexandre Nogueira (33) iha minutu 69.

Hafóin liu deit minutu 4 Aitana FC kontinua halo substituisaun iha liña avansadu hodi hasai Rivaldo Coreia (12) no hatama Miguel Ximenes.

Substituisaun ne’e la lori rezultadu tanba Karketu Dili FC domina jogu. Tama ba minutu 79 jogadór Karketu Dili FC Gaudencio Monteiro (14) lansa uluk golu ida hodi muda skore ba 1:0 hafóin simu asisténsia hosi José Guteres da Silva (24).

Hafóin golu ne’e Karketu Dili FC halo kedan substituisaun ba nia jogadór hodi hasai António Profirio (23) no hatama Celso Escurial (15), hodi bele asegura vitória ne’ebé iha.

Tama ba minutu 84 jogadór Karketu Dili FC Valarino Boaventura simu kartaun kinur hafóin halo falta hasoru nia adversáriu.

Karketu Dili FC nafatin domina bola no kontinua halo substituisaun iha minutu hodi hasai Silvestre Gama (21) no hatama Antonio Martins (2).

Angiso Barbosa (16) tenke simu kartaun kinur hafóin halo falta hasoru jogadór Aitana FC Alexandre Nogueira (33) iha minutu 90+2.

Too jogu remata laiha tan golu ruma hodi muda skore iha tabela nune’e vitória ba Karketu Dili FC.

Hafoin jogu asistenten treinadór Aitana FC Galucho Carvalho hateten em prinsípiu hakarak save tres pontu iha jogu ne’e maibé tanba failansu iha liña klaran no kotuk ikus mai tenke lakon no sofre golu ida hosi ekipa adversáriu.

Parte seluk Sekretáriu Jerál Karketu Dili FC agradese ba adeptus Karketu Dili FC nian no parabéns ba jogadór sira tanba bele asegura pontu tolu iha primeiru jogu.

Jornalista: Vito Salvadór