Connect with us
Pakote Ahi

Nasionál

Conselho Imprensa Apresia no Konsidera Prezensa Hatutan.com Importante

Published

on

Hatutan.com, (19 Novembru 2021), DiliConselho Imprensa (CI) Timor-Leste, fó apresiasaun no konsidera prezensa Raya Media & Entertainment ho Hatutan.com importante atu hariku liu tán área Komunikasaun Sosiál iha nasaun foun ne’e.

Ambiente diskusaun no partilla informasaun entre Prezidente CI Virgílio Guterres ho Konsileiru sira hamutuk ho na’in ba Hatutan.com Raúl Lemos no redasaun, nakonu ho amizade iha edifísiu Avenida de Portugal, Nú 74, Díli, Praia dos Coqueiros. Sesta (19/11/21). Foto/CI.

Prezidente CI, Virgílio da Silva Guterres hato’o konsiderasaun ne’e iha salaun enkontru redasaun Hatutan.com iha Avenida de Portugal, Nú 74, Díli, Praia dos Coqueiros, bainhira hetan konvite hamutuk Konsileiru sira, no mós ezekutivu sira atu fahe esperiénsia liuliu kona-bá kompeténsia hosi CI rasik, ba Redasaun Hatutan.com, Sesta (19/11/21).

Tuir CI, Prezensa Hatutan.com importante tanba preferénsia sosiedade ohin loron nian hakarak atu asesu informasaun ne’ebé fó-sai liuhosi média, haree kona-bá sira nia fontes, figura nomós kona-bá moris.

“Sosiedade tenke iha preferénsia ba média, sira nia fontes informasaun, sira nia figura, sira nia vida. Entaun, prezensa Raya media ka Hatutan.com, ho tán rádiu, ne’e sai hanesan pontu de partida ida ne’ebé importante ba komunikasaun sosiál atu promove TL ba mundu,” Virgílio da Silva Guterres “Lamukan”, hateten.

Advertisement

Virgílio Guterres mós dezafia média hotu iha TL liuliu Hatutan.com tenke haka’as an atu ajusta an ho era dijitál, oinsá la’ós atu to’o lais liu, ho buat mamuk ida, maibé tenke lori buat ruma. Hosi simulasaun ne’e, atu média sira bele hato’o informasaun ho lais, maibé tenke lori impaktu pozitvu ruma ba ema no liu-liu bele eduka sosiedade.

“La’os hadau to’o lais, maibé la lori buat ida. Tanba baibain ema dehan, hakarak to’o lalais ne’e, lakohi lori sasan todan. Entaun sé lori hela sasan todan, ok, ita la’o neneik. Problema to’o iha ne’ebá, ema husu ba sasan laiha, mamuk de’it. Ó to’o uluk mamuk duni. Ida ne’e mak sai problema,” Prezidente CI fó-hanoin.

Konsileiru CI, Benevides Correia Barros, fó nia observasaun katak, maski média Hatutan.com foin mak estabelese no

Konsileiru CI, Benevides Correia Barros. Foto/CI.

seidauk to’o tinan, maibé iha kondisaun ka fatin ne’ebé di’ak ba jornalista no funsionáriu sira atu bele hala’o serbisu ho di’ak no dignu.

Benevides konsidera kondisaun hirak-ne’e, bele ajuda fasilita jornalista sira iha vontade no espíritu badinas hodi halo servisu ho di’ak no transmite informasaun ba públiku ho kualidade. 

“Presija duni kondisaun hanesan ne’e. La hateten katak média sira seluk ho kondisaun la di’ak. Maibé pelumenus Hatutan foin eziste fulan haat, maibé kria ona kondisaun ne’ebé di’ak ba funsionáriu tomak. Iha kondisaun ne’ebé kapás tebtebes atu garante prosesu transmisaun informasaun ne’ebé kualidade, tanba iha kondisaun di’ak atu hala’o servisu. Ha’u mós atu dehan katak, imi kontribui ba kualidade informasaun,” Konsileiru Benevides, apresia.

Advertisement

Nia mós fó-hanoin katak, Hatutan.com atu forte liu presija ninia lideransa  ne’ebé forte no ida ne’e sai hanesan fatór importante atu determina funsionamentu instituisaun ida ne’e nian bele la’o ba oin ho di’ak.

“Atu hametin filozofia ne’ebé iha, lideransa tenke forte no iha kapasidade natón atu halo jestaun bazeia ba prinsípiu média nian,” nia subliña.

Konsileiru Expedito Dias Ximenes. Foto/CI.

Konsileiru Expedito Dias Ximenes iha nia haree katak, média ho plataforma online, buat rua mak importante hanesan atualidade ho kualidade.

Tanba haree ba kompetisaun ne’ebé la’o daudaun oras-ne’e, ema hotu akompaña ho evolusaun dijitál, haree katak média konvensionál to’o tempu ruma tenke hakru’uk ba kualidade saida maka online sira halo ka fó.

Ho realidade ida ne’e maka, situasaun iha TL mós aposta ba ida ne’e, ezemplu televizaun estatál, komersiál ho televizaun sira seluk komesa halai ona mós ba iha website.

Sira la’ós de’it ona hanoin bainhira notísia publika iha tuku 07 ka 08 iha telejornál, maibé bainhira sira ba halo kobertura, sira mós tau daudaun notísia iha online.

Advertisement

“Ida ne’e tanba televizaun sira mós lakohi atu lakon ho Hatutan.com, sira mós lakohi lakon ho online  sira seluk tán. Tanba ne’e ha’u nia parabéns ba maun Raúl ho ekipa tomak, tanba bele kontribui tán saida mak sai eskolla hosi públiku iha nasaun ne’e,” Expedito Dias, parabeniza na’in ba Hatutan.com ho ekipa.

Konsileiru ne’e mós fó-hanoin katak, CI sei kontinua tau-matan ba média sira inklui Hatutan.com, la’ós de’it fó sansaun ho koima, maibé oinsá atu fó-hanoin, bainhira balun viola ka ladún tuir kódigu étika sei fó-hanoin ba Xefe Redasaun no ba jornalista-sira.

Na’in ba média Hatutan.com, Raúl Lemos, apresia tanba CI bele hatán ba konvite ne’ebé fó hodi bele partilla

Na’in ba média Hatutan.com, Raúl Lemos. Foto/CI.

informasaun ba Redasaun Hatutan.com kona-bá knaar loloos hosi CI nian nu’udár órgaun reguladora ba meius Komunikasaun Sosiál sira.

Emprezáriu Timoroan ne’e mós esklarese ba Prezidente CI ho konsileiru sira no ezekutivu sira katak, prezensa média Hatutan.com nian la’ós atu halo kompetisaun ho média sira seluk, maibé atu kompleta malu hodi serbí públiku liu hosi fahe informasaun tuir lema, Laís, Atuál no Konfiável.

“Ami média foun ho komitmentu ida katak, hamutuk ho média sira seluk ita kontribui hodi dezenvolve ita nia nasaun liu hosi informasaun,” Raúl Lemos afirma.

Advertisement

Hatutan.com sempre konta ho apoiu hosi CI, no husu atu CI kontinua monitoriza publikasaun hosi jornalista no produtu Hatutan.com nian tuir padraun jornalizmu ne’ebé iha, husu ajuda CI nian atu fó-hanoin beibeik atu bele dezenvolve aan di’ak liu tán.

Prezidente CI mós hetan entrevista eskluzivu hosi Hatutan Rádiu Podcast (HR), kona-bá natureza no kompeténsia hosi Conselho Imprensa tuir Lei Komunikasaun Sosiál nian. Foto/CI

Xefe Redasaun Hatutan.com, Francisco Simões da Costa, esplika kona-bá lala’ok redasaun katak, Hatutan.com mosu ho filozófia ida mak ‘notísia ba mudansa’.

“Filozofia ida ne’e atu dehan katak, ami nia kobertura la haree ba membru Governu ida ko’a fita. Maibé ami nia kobertura haree liu liu ba prosesu tomak to’o ko’a fita,” Xefe Redasaun ne’e afirma.

Buat seluk ne’ebé Hatutan.com hakarak aposta maka, haree liu bá kualidade. Maske Hatutan.com sei ho ekipa ne’ebé ki’ik, editór na’in-rua ho jornalista na’in-tolu, maibé iha hotu ona karteira profisionál hosi CI.

Hatutan.com hakarak duni sai kontrolu sosiál ida ne’ebé puru. Sai kontrolu sosiál ida ne’ebé haree ba ezekusaun orsamentu sira hosi kada prosesu tomak ne’ebé Estadu iha, órgaun soberanu sira hala’o iha sira nia servisu.

Tanba buat ne’ebé Hatutan.com haree katak, maski média iha rekursu barak, maibé funsaun kualidade ba investigativu nian, durante ne’e menus tebes.

Advertisement

“Entaun, ami koko ho ami nia rekursu ne’ebé ami iha, ho limitasaun ne’ebé ami iha, ami hakarak aposta ba kualidade liu-liu ba reportajen investigativu. Ami koko ona, iha notísia lubuk ida no ami sei kontinua esforsu atu halo liu tán,” Francisco Belo salienta.

Estatístika Top nasaun 10 ne’ebé vizita portál Hatutan.com.

Jestór Information Comunication and Technology (ICT) Hatutan.com, Eligio Moniz do Rego, esplika mós kona-bá dezenvolvimentu website ne’ebé iha, Hatutan.com hakarak oferese buat ne’ebé fásil ba ema hotu bele asesu ho lais, nune’e mosu ho karákter multimedia.

“Iha kriasaun no dezenvolvimentu website ne’e ita oferese kondisaun ida ne’ebé fásil liu ba públiku atu asesu ho lais,” Elizio do Rego, esplika.

Tuir estatísika hosi Jestór ICT ne’e katak, maski Hatutan.com foin eziste fulan haat hahú hosi Agostu to’o Novembru 2021, maibé iha ona totál leitór hamutuk 132.991, mai hosi rai-laran no nasaun 90 iha mundu.

Totál leitór hirak ne’e mai hosi fulan Agostu iha leitór 4.846, Setembru iha 23.277, Outubru iha 59.469 no loron 19 Novembru  iha 45.399.

Conselho Imprensa (CI) Timor-Leste ne’ebé estabelese iha tinan 2016, hanesan Instituisaun independente ida ne’ebé mak sai reguladór ba média no atu proteje média sira iha TL.

Advertisement

Durante vizita oras tolu iha Edifísiu Hatutan.com, Prezidente CI mós hetan entrevista eskluzivu hosi Hatutan Rádiu Podcast (HR), kona-bá natureza no kompeténsia hosi Conselho Imprensa tuir Lei Komunikasaun Sosiál nian.

Jornalista: Rogér Pereira Cárceres

Kontinua Le'e
Advertisement
1 Komentariu

1 Comment

  1. Edynho

    21/11/2021 at 8:11 PM

    Parabens no susesu nafatin ba HATUTAN.com

Husik Hela Komentariu

Your email address will not be published. Required fields are marked *

Nasionál

Konstrusaun Altar Misa ho Papa Francisco Atinje 80%, Sekretariadu Komisaun Altu Nível iha Motael

Published

on

Hatutan.com, (19 Abríl 2024), Díli—Projetu konstrusaun altar misa hamutuk ho Papa Francisco iha Tasi-tolu, oras ne’e daudaun atinje ona 80%.

(more…)

Kontinua Le'e

Nasionál

KSTL Organiza Asaun Pasífiku Ezije Governu Hasa’e Saláriu Mínimu $115 bá $150

Published

on

Hatutan.com, (19 Abríl 2024), Díli – Konfederasaun Sindikatu Timor-Leste (KSTL) organiza asaun pasifika  da-uluk iha Díli  hodi  ezije Governu hasa’e saláriu mínimu  $115 bá  $150.

(more…)

Kontinua Le'e

Nasionál

Kandidatu Na’in-41 Sei Kompete iha Eleisaun Suku 10

Published

on

Hatutan.com, (18 Abríl 2024), Díli—Totál kandidau ne’ebé admitidu bé 𝐄𝐥𝐞𝐢𝐬𝐚𝐮𝐧 𝐎𝐫𝐠𝐚𝐮𝐧 𝐒𝐮𝐤𝐮 𝟐𝟎𝟐𝟒, ne’ebé sei realiza iha loron 27 fulan abril tinan ne’e hamutuk na’in-41, kompostu hosi 𝐌𝐚𝐧𝐞-𝟑𝟗 𝐧𝐨 𝐅𝐞𝐭𝐨-𝟐.

(more…)

Kontinua Le'e
Advertisement

Trending