Hatutan.com, (22 Novembru 2021), Díli—Hafoin akontese kalamidade iha loron 4 Abríl 2021, ne’ebé rezulta vítima lubuk iha Díli laran no iha Munisípiu sira,  fanu entidade internasionál no nasionál, emprezáriu nasionál, inklui indivíduu balu fó apoiu umanitária direta no indireta ba vítima sira.

Eis-Embaixadór EUA, Embaixador
Blackstone, entrega apoiu orsamentu $100,000 liuhosi SEPS. Foto/Espesiál

Apoiu umanitáriu direita, signifika entidade sira entrega apoiu umanitária ba vítima indusaun iha ida-idak nia hela fatin, inklui mós iha fatin refujiadu, hanesan iha Tasi-Toli (João Paulo II), Dom Bosco Comoro, Kampu Futeból Real Madrid, Manleuana, inklui  mós iha Munisípiu balu.

Apoiu umanitáriu indireta, signifika entidade sira fó apoiu liuhosi kanál Governu nian, liuliu hosi Sekretáriu Estadu Protesaun Sivíl  (SEPS) hodi jere no administra atu oinsá maka distribui ba vítima inundasaun iha territóriu nasionál.    

Tempu ne’ebá,  iha loron 08 fulan-Abríl 2021, Governu ne’ebé lidera hosi Primeiru-Ministru (PM), Taur Matan Ruak,  deklara Estadu kalamidade hodi mobiliza apoiu internasionál. Nune’e, entidade internasionál sira, hanesan ajénsia internasionál no mós Embaixada estranjeiru sira iha Timor-Leste fó apoiu ba situasaun hodi kontribui ba rekuperasaun vítima sira.

Ezemplu balun maka hanesan Embaixada Estadu Unidus Amerika   iha Timor-Leste fó apoiu orsamentu $100,000 ba Sekretáriu Estadu Protesaun Sivíl (SEPS) iha loron 09 fulan-Abríl 2021.

Seluk fali mós Embaixada Japaun fó manta rihun lima no balun mós oferese ai-han, inklui fasilidade no nesesidade bázika seluk.

Governu mós deklara apoiu sira-ne’e liuhosi oda-matan ida de’it, maka Sekretariu Estadu Protesaun Sivíl (SEPS). Nune’e, ajénsia internasionál sira, inklui Embaixada ho apoiu indivíduu sira, hanesan setór privadu nasionál no internasionál, hotu-hotu ba entrega apoiu sira-ne’e iha Edifísiu SEPS iha Caicoli, Díli.  

Informasaun seluk ne’ebé Hatutan.com asesu katak, nasaun lima (5) maka fó apoiu ba vítima inundasaun, 04 Abríl, liuhosi Sekretáriu Estadu Protesaun Sivíl (SEPS). Nasaun lima ne’e, maka hanesan Estadus Unidus Amerika, Xina, Japaun, Indonézia, no mós Austrália.  

Hatutan.com buka informa ba públiku kona-ba dadus ka relatóriu  apoiu sira-ne’e ho nia utilizasaun ba vítima sira to’o ohin loron. Nune’e, Hatutan.com buka hatene iha Diresaun Nasionál Jestaun Risku Dezastre (DNGRD, sigla portugés), Sekretaria Estadu Protesaun Sivíl (SEPS) nian, maibé DNGRD la koopera ho di’ak hodi bele fasilita informasaun no dadus sira-ne’e ho di’ak atu públiku bele hatene.

 Hatutan.com Nia Esforsu Konfirmasaun

Karta Pedidu Entrevista hosi Redasaun Hatutan.com

Iha Kinta (7/10/2021), Hatutan.com atu  halo entrevista ho superior sira iha SEPS hanesan Sekretáriu Estadu Protesaun Sivíl, Joaquim José Gusmão dos Reis Martins ho Diretór Jerál SEPS, Superintendente Asistente Polísia Ismail da Costa Babo, maibé tanba Sekretáriu Estadu  Joaquim Gusmão dos Reis Martins laiha fatin, nune’e Diretór Jerál, Ismail da Costa Babo mós reseita atu fó informasaun ho razaun servisu ne’e DNGRD mak iha liu kompeténsia atu ko’alia.

Hatutan.com kontinua kedas ba iha Edifísiu DNGRD iha  tuku 14:38 Otl, no gabinete DNGRD responde ba Hatutan.com katak Diretór laiha fatin no okupadu ho servisu seluk no hameno hela atu bele ba iha loron tuir mai no laiha data serteza.

Iha Tersa (19/10/2021), Hatutan.com tenta hikas hodi hakat ba edifísiu DNGRD iha Bemori, Díli, maibé parte sira la bele fó entrevista tamba laiha despaixu husi superiór sira iha SEPS hanesan Diretór Jerál, Ismail da Costa Babo.

Iha loron hanesan tuku 14:46 Otl, Hatutan.com hasoru fila-fali gabinete Diretór Jerál SEPS hodi halo esklaresimentu kona-bá DNGRD nia pedidu atu Diretór Jerál halo despaixu molok entrevista kona-ba asuntu ne’ebé Hatutan.com  presiza. Iha momentu ne’e mós Gabinete Diretór Jerál husu atu Hatutan.com halo karta pedidu ida molok Diretór Jerál SEPS halo despaixu.

Iha Sesta (20/10/2021), Hatutan.com ba submete  karta pedidu  entrevista iha gabinete Diretór Jerál SEPS nian no iha fali Segunda (25/10/2021), Hatutan.com ba foti despaixu Diretór Jerál, Superintendente Asistente Polísia Ismail da Costa Babo nian ho númeru rejistu: 1094, númeru ajenda 2047 no númeru dokumentu 04/Hatutan.com/x/2021.

Bazeia ba despaixu ne’e Hatutan.com lori ba aprezenta iha ba gabinete DNGRD iha tuku 09:44 Otl, maibé Diretór DNGRD sei halo viajen ba diaspora ho Sekretáriu Estadu Protesaun Sivíl (SEPS), Joaquim José Gusmão dos Reis Martins,  nune’e gabinete husu atu se bele halo entrevista ho diretór interinu, maibé laiha fatin tamba iha hela atividade seluk ida.

Iha Kinta (28/10/2021), Hatutan.com hakat hikas ba DNGRD iha Bemori atu halo entrevista ho Diretór Interinu DNGRD  maibé iha momentu ne’e diretór interinu nia família (Fen rasik) mate, nune’e la konsege entrevista no husu atu depois  Finadu mak ba fali halo entrevista.

Iha Kinta (4/11/2021), Hatutan.com tenta nafatin atu halo follow-up kona-ba asuntu ne’e, maibé diretór interinu la tama servisu no Hatutan.com simu de’it númeru kontaktu diretór interinu nian, atu nune’e, bele kontaktu molok hasoru hodi entrevista.

Karta Despaixu hosi Diretór Jerál SEPS ba Diretór Nasionál Jestaun Risku Dezastre.

Iha  Kuarta (10/11/2021),  Hatutan.com kontaktu Diretór Interinu ho naran  Matinho de Fatima, iha tuku 08:43 Otl, maibé hatán dehan iha halo hela servisu iha munisípiu no husu atu bele hasoru malu iha Segunda (15/11/2021), iha edifísiu Bemori.

Iha loron refere liu husi kontaktu Hatutan.com ho Diretór Interinu iha konkordánsia atu hasoru malu iha tuku 08:30 iha edifísiu hodi halo entrevista, maibé hafoin too iha edifísiu DNGRD, Bemori, Díli, atu entrevista Diretór interinu Martinho de Fatima, husu atu halo konfirmasaun ho Diretór Jerál molok entrevista ne’e hahú.

Hafoin konversa ho Diretór Jerál, diretór interinu ne’e dehan nia laiha kompeténsia atu fó informasaun tanba diretór sei iha hela diaspora no Diretór Jerál iha hela Munisípiu Ainaro, tanba ne’e, bele mós sai konsumu polítika tanba ne’e hakaruk ba ierarkia ne’ebé iha diretór interinu la fó komentáriu no husu Hatutan.com atu hein desizaun husi superior sira, maibé laiha serteza to’o notísia ne’e publika.

Tuir dadus hosi Ministériu Administrasaun Estatál (MAE) ho Sekretáriu Estadu Protesaun Sivíl (SEPS) katak, rejista liuhosi levantamentu, rejista família afetadu dezastre naturál iha  loron 04 fulan-Abríl 2021, hamutuk 33.177 iha territóriu Timor-Leste (TL).

Dadus ida ne’e iha família 90% mak mai hosi Díli no 10%  hosi munisípiu ne’ebé identifika uma 25.000 mak afetadu, iha uma 24.000 aat kaman, aat natoon 553 no aat totál 554.

SEPS mós hato’o ona pedidu ba Ministériu Finansa (MF), liuhosi fundu kontinjénsia hamutuk millaun $12, atu halo akizisaun ba nesesidade bázika, apoiu umanitáriu ba vítima dezastre naturál iha territóriu.

SEPS mós halo kalkulasaun ba kustu estimativa apoiu rekuperasaun ba rekonstrusaun uma ne’ebé hetan estragu durante dezastre naturál, hamutuk millaun $42.

Jornalista: Vito Salvadór