Hatutan.com, (21 Fevereiru 2023), Díli- Klube Primeira divizaun AD SLB Laulara FC garante sei rekolla pontu tolu iha jogu dahuluk kontra ekipa Coração FC iha jogu kontinuasaun Liga Timorense époka 2022-2023.

Lee Mós : Assalam Fc Kompromete Rekolla Vitória iha Jogu Dahuluk Kontra Emanuel Fc

Treinadór AD SLB Laulara FC, Julião Monteiro (klaran) ho nia Asistente na’in-rua partisipa
iha konferénsia imprensa
ne’ebé hala’o iha sede LFTL, Estádiu Munisipál Díli, Tersa (21/02/2023). Foto/Vito Salvadór

Treinadór AD SLB Laulara FC, Julião Monteiro bá jornalista sira iha Estádiu Munisipál Díli, Tersa (21/02/2023) hateten, kona-bá preparasaun klube AD SLB Laulara FC nian bá liga Timorense époka 2022-2023 ho tempu ne’ebé badak hanoin katak AD SLB Laulara FC nia preparasaun ladún másimu ida, tamba ne’e AD SLB Laulara FC sente katak preparasaun ne’ebé klube ho Jogadór sira halo ladún másimu tamba klube enfrenta mós difikuldade ho kampu bá treinu no klube hakarak halo treinu ofisiál iha estádiu munisipál Díli molok joga.

AD SLB Laulara FC iha esforsu atu hetan vitória, maibé ida ne’e seidauk garante atu manan bele mós lakon tamba iha jogu ekipa hotu-hotu iha ambisaun bá vitória. Ekipa adversáriu mos iha ambisaun atu manan tamba ne’e ami hosi parte AD SLB Laulara FC haree katak jogu iha 90 minutu mak sei determina.

Nia afirma ekipa adversáriu ne’ebé AD SLB Laulara FC sei hasoru hanesan ekipa ne’ebé forte, iha preparasaun di’ak, iha kombinasaun jogadór ba kada liña di’ak tamba ne’e AD SLB Laulara FC seidauk garante atu manan, maibé sei halo esforsu atu konkista vitória.

AD SLB Laulara FC maioria mantein ho Jogadór nasionál sira ne’ebé antes ne’e joga ba Klube AD SLB Laulara FC iha époka sira kotuk. Ba époka 2022-2023 AD SLB Laulara FC sei reforsa hosi jogadór estranjeiru na’in-tolu ne’ebé ho pozisaun baliza, defeza eskerda no meiu kampu ka avansadu ida hosi  França.

Jogadór estranjeiru ne’ebé iha na’in-rua ne’ebé hamutuk ho AD SLB Laulara FC kleur ona hanesa Andre ne’ebé ho pozisaun Baliza no Baca ho pozisaun defeza eskerda entretantu meiu kampu ka avansadu Michel hanesan Jogadór estranjeiru foun ne’ebé AD SLB Laulara FC kontratu atu reforsa ekipa iha liña oin ba époka 2022-2023.

Treinadór Coração FC, Januário de Almeida ho nia asistente
treinadór. Foto/Vito Salvadór

Treinadór Coração FC, Januário de Almeida hateten, Coração FC  preparadu bá jogu tuir mai kontra AD SLB Laulara FC, tamba ne’e ritmu preparasaun ne’ebé Coração FC iha mantein ho ida ne’e.

Nia afirma Coração FC nafatin otimista atu rekolla vitória kontra adversáriu sira iha kada jogu ba époka 2022-2023.

“Hanesan treinadór prepara Jogadór atu joga no hetan vitória, fó konfiansa bá Jogadór sira no garante vitória ida ne’e mak ami nia hakarak,” Januário de Almeida hateten.

Kona-bá táktika iha jogu Coração FC sei adapta ho adversáriu nia jogu tamba iha kada jogu ne’ebé ekipa hasoru diferente no konserteza táktika mos diferente.

“Ami mós garante iha ami nia táktika atu asegura ekipa adversáriu iha kada liña ne’ebé iha tamba ne’e ami garante sei hatudu jogu ida di’ak,” Nia subliña.

Atu fó hanoin hikas katak Coração FC iha jornada dahuluk konsege manan nia adversáriu Karketu Díli FC ho skor 2-1.

Jornalista: Vito Salvadór