Hatutan.com, (22 Novembru 2021), Díli-Vise-Ministru Interiór (V-MI), António Armindo, husu ba komunidade ne’ebé hela  iha liña fronteira terrestre atu hapara importasaun  kilat-anin tanba bele lori ameasa ba nasaun no povu nia vida.

Vise-Ministru Interiór, António Armindo. Foto/Hatutan.com

António Armindo mós husu ba sidadaun sira ne’ebé mak hela iha liña fronteira atu iha konsiénsia rasik hodi labele la’o tuir dalan ilegál, tanba la’ós ona tempu atu halo nafatin pasajen ilegál ba mai entre TL ho Repúblika Indonézia (RI).

“Ita tenke kumpre ba ita-nia regra hotu-hotu, servisu hamutuk ho ita nia seguransa sira iha konsiénsia rasik katak ida ne’ebé mak ita halo ilegál ne’e ladún di’ak no husu ba sidadaun hotu-hotu atu obedese regulamentu iha ona,” Vise-Ministru Interiór (MI), António Armindo, hateten ba jornalista sira iha kna’ar fatin, Díli, Segunda (22/11/2021).

Nia husu ba sidadaun hotu iha TL presiza hadomi ninia nasaun, no tane aas dignidade no soberania nasaun nian.

Iha Sábadu (20/11/ 2021), Komandu PNTL Munisípiu Bobonaro, hosi ekipa Alfa Forsa Rezerva, halo apreensaun ba kilat-anin ho marka “Sharap  Tiger” hamutuk lolon ualu (8), inklui fogete hamutuk kaixa tolu, ne’ebé tula hosi sidadaun sira  ho mikrolete  ida ho  númeru matrikula 35.604, iha área Tunubibi, Munisipiu Bobonaro.       

Rezolusaun Governu nian iha lei númeru 05/2017, bandu sidadaun utiliza atributu arte marsiál ho arma branka. Nune’e, sidadaun sé de’it mak viola norma legál hirak ne’e, maka Polisia Nasionál Timor-Leste (PNTL), liuhosi Unidade Patrullamentu Fronteira (UPF), sei halo detensaun no kapturasaun hodi submete ba investigasaun.

Ministériu Interiór halo ona mós koordenasaun hodi servisu hamutuk ho autoridade seguransa sira iha territóriu Indonézia nian hodi bele buka tuir no bainhira hetan, forsa nasaun rua sei halo kedas apreensaun no kapturasaun.  

“Ha’u hanoin, saida mak ministériu tenke halo, atu di’ak liu, mak ida, ita aumenta ita nia membru sira ba iha fronteira,” António Armindo hateten.

Jornalista: Rogério Cárceres