Hatutan.com, (02 Maiu 2023), Díli-Polísia Nasionál Timor-Leste (PNTL) kontinua buka tuir paradeiru hosi autór sira ne’ebé taa kanek joven mane ida iha Suku Cová, Postu Administrativu Balibo, Munisípiu Bobonaro, Domingu (30/04/2023).

Lee Mós : Breaking News: Ema Deskoñesidu Taa Joven Ida iha Cová

Komandante Jerál PNTL, Komisáriu Polísia Henrique da Costa. Foto/Elio dos Santos da Costa.

Komandante Jerál PNTL, Komisáriu Polísia Henrique da Costa hateten, nia parte simu duni informasaun kona-bá kazu tentativa omesídiu ne’e hosi Komandu PNTL Munisípiu Bobonaro ho Unidade Patrullamentu Fronteira (UPF) tanba ne’e, parte komandu orienta ona atu bele buka tuir suspeitu ka autór sira to’o hetan.

“Loos duni katak, iha loron 30 fulan-Abríl, iha dalan, mosu duni insidente ida, taa sidadaun ida kanek iha ne’ebá, no buat ne’ebé ha’u hatete mak ne’e, prosesu agora la’o hela. Ita seidauk bele fó komentáriu barak liután, tanba ne’e sei iha prosesu nia laran. Ita orienta ona parte investigasaun atu bele tuir no prosesu ida ne’e. Mais depois prosesu ne’e konklui, sei informa fali bá ita-boot sira nune’e bele akompaña,” Komisáriu Polísia  Henrique da Costa informa bá jornalista, hafoin surumutu ho Xefe Estadu Maiór F-FDTL, Tenente Jenerál Domingos Raúl “Falur Rate Laek”  iha Kurtel Jenerál F-FDTL, Fatuthada, Díli, Tersa (02/05/2023).

Advertisement

Kronolojia ne’ebé Hatutan.com halibur hosi komunidade sira Cová, Postu Administrativu Balibo, haktuir, akontesimentu ne’e derrepente de’it, sira haree joven oan ne’ebé nia orijen hosi Aldeia Lotan, Suku Batugade, Postu Administrativu Balibo, mosu mai iha área Cová nian ho ran suli maka’as tanba hetan taa.

Informasaun ne’ebé sirkula iha Suku Cová laran to’o mai Balibo katak, joven ne’e halai mesak mai to’o Cová ho ran sulin maka’as iha isin-lolon no liman. Tuir informasaun katak, nia ho nia maluk joven na’in-rua (2) tan mak bá hala’o tranzasaun sosa motór hosi ema balun iha parte Indonézia nian. Parte sira promete malu atu hasoru malu iha   parte tali-laran, Suku Cová nian atu bele entrega osan no simu motór.

Tuir kronolojia ne’ebé vítima haktuir bá komunidade sira bainhira hetan nia ho ran sulin maka’as, katak nia ho nia joven maluk na’in-rua tan mak la’o hamutuk lori ho osan atu bá sosa motór ne’ebé sira promete bá malu tiha ona hodi hasoru malu iha fatin akontesimentu.

Bainhira vítima hasai osan  entrega bá parte sira ne’ebé fa’an motór, derrepente de’it ema sira fa’an motór hasai sasán kro’at atu hanesan samurai taa kedas bá vítima nia liman hodi rezulta liman  parte loos atu kotu (kulit de’it mak sei kaer, maibé liman ruin kotu kedas) no liman fuan-ida hosi  parte karuk nian  kotu kedas.

Haree ema sira fa’an motór ne’e lori sasán kro’at no taa ona vítima, maka vítima nia kolega na’in-rua ne’ebé akompaña atu bá foti motór ho ta’uk halai soe hela vítima hodi salva sira-nia aan.

Advertisement

Hafoin taa tiha vítima, ema deskoñesidu sira ne’e lori fila motór bá área Indonézia nian, hadau vítima nia osan no lori halai mós vítima nia telemovel (handphone).  Vítima dezenraska rasik no esforsu aan mesak la’o to’o iha Cová no husu ajuda bá komunidade sira.

To’o agora vítima sei iha hela tratamentu intensivu iha Sentru Saúde Balibo hodi suku nia kanek iha liman loloon sira.

Jornalista: Rogério Pereira Cárceres

Advertisement