Hatutan.com, (24 Novembru 2021), Díli-Advogadu privadu Manuel Tilman, konsidera medida koasaun Termu Identidade Rezidénsia (TIR) ne’ebé Tribunal Distritál Dili (TDD) aplika ba arguidu sira husi kompañia ka operadór telekomunikasaun sira, ne’ebé deskonfia envolve iha kazu fornesimentu internet ilegál, hanesan  R2M IT Solution, Guardamor, Metrolink, Telemor, Elite Computer, inklui Prezidente Autoridade Nasionál Komunikasaun  (ANC), João Olivio Freitas, la limite arguidu sira -ia knar ne’ebé antes ne’e sira asume, tanba medida koasaun la’ós penalizasaun.

Notísia iha Relasaun: Kazu Internet Ilegál La Prejudika Atribuisaun Lisensa ba Operadór Telekomunikasaun Sira

Arguidu sira submete ba primeiru interogatóriu iha TDD. Foto/Dok.Espesiál

Medida koasaun Termu Identidade Rezidénsia (TIR) signifika kada semana arguidu sira ba aprezenta aan iha estasaun Polísia ne’ebé besik no  la hasai liberdade kondisionál no direitu ba vida.

“TDD de’it mak bele hasai ema nia liberdade liuhusi aplika medida koasaun prizaun preventiva, maibé sira mós haree ba konsekuénsia ne’ebé grave, tanba ne’e, husi medida koasaun TIR la limite arguidu nia liberdade no sira nafatin asume knar, maibé tenke aprezenta aan iha Estasaun Polísia kada semana tanba ida-ne’e la’ós penalizasaun no atu hasai sira nia Liberdade profisionál ne’e buat seluk ida laiha ligasaun ho pena ne’e,” Manuel Tilman ne’ebé fó asisténsia legal ba jerente prinsipál Guardamor, ba Hatutan.com iha ninia knar fatin, Díli,  Kuarta (24/11/2021).

Iha sorin seluk, Diretór Asia Justice and Rights (AJAR) Timor-Leste,  José Luis Oliveira, esplika medida koasaun ne’ebé Tribunál aplika hanesan TIR, signifika la limite arguidu nia liberdade, bainhira aplika prizaun preventiva mak sira sei ba iha prizaun hodi kumpre, ne’ebé dalaruma husik hela sira nia knar.

Maske nune’e prosesu investigasaun nafatin la’o no arguidu sira tenke kumpri medida koasaun ne’ebé Tribunál aplika hodi aprezenta aan iha Estasaun  Polísia ne’ebé besik.

Jornalista: Carmelita Isaac