Hatutan.com, (24 Novembru 2021), Díli—Sekretáriu Estadu Komunikasaun Sosiál (SEKOMS), lansa Rádiu Komunidade ba Ema ho Defisiénsia ho Frekuénsia 102.30 MHZ, iha edifísiu “Ahisaun” Fatuhada, Dili, “dezorganizadu” halo Enkarregadu Negósiu Embaixada Estadus Unidus Amérika (EUA), Tom Daley tenke “halai-fila” hosi oda-matan kotuk.

Ema ho defisiénsia sira halo asaun hodi trava prosesu Serimónia lansamentu rádiu iha AHISAUN, Fatuhada, tanba SEKOMS la tau konsiderasaun ba ema ho defisiénsia ne’ebé sai na’in ba rádiu ne’e. Foto/Hatutan.com.

Serimónia ne’e nakonu ho dezintendimentu tanba SEKOMS la tau konsiderasaun ba ema ho defisiénsia ne’ebé sai na’in ba rádiu ne’e.

Ho diverjénsia ideia ne’ebé iha, obriga membru-sira hosi ema ho defisiénsia haklalak iha resintu ahisaun nian no prezudika serimónia ne’e, ikus mai Enkarregadu Negósiu Embaixada Estadus Unidus Amérika (EUA), Tom Daley  ‘hala’i-fila’ hosi dalan alternativu liu hosi oda-matan kotuk edifísiu nian, tanba trauma ho ema ho defisiénsia barak ne’ebé hakilar no haklalak hodi taka tomak oda-matan boot.

Ajenda prorgama lansamentu ne’ebé Hatutan.com asesu no mós observa direta iha terrenu, Kuarta (24/11/2021), SEKOMS hamutuk ho parseiru dezenvolvimentu-sira hanesan UNICEF no Embaixada EUA, akompaña hosi Diretór Ahisaun Padre Adriano Ola Duli, hahú iha tuku 15:00 otl, maibé tanba mosu dezintendimentu, nune’e serimónia tenke adi’a to’o fali tuku 17:40 otl.

Advertisement

Vise Prezidente Board Rádiu ba Ema ho Defisiénsia, Cesário da Silva ba Hatutan.com rekoñese katak, Enkarregadu Negósiu Embaixada Estadus Unidus Amérika (EUA), Tom Daley  ‘hala’i-fila’ tanba parte sira hosi asosiasaun defisiénsia lamenta ho asaun SEKOMS nian, no  husu atu trava lai prosesu ne’e, hodi buka tempu atu solusiona uluk naksalak sira ne’ebé iha.

“Sim, katuas Enkarregadu EUA ne’e fila tiha duni, no la konsege tuir serimónia ne’e,” Ces’ario da Silva hateten ba Hatutan,com.

Cesário konsidera dezintendimentu ne’ebé akontese ne’e, hanesan erru ida ne’ebé mak boot liu hosi parte SEKOMS nian, tanba laiha koordenasaun ida di’ak entre ekipa tékniku SEKOMS nian rasik ho estrutura rádiu no fim estrutura rádiu hanesan fali bainaka ba nia rádiu rasik.

“Tanba ida-ne’e mak kolega ema ho defisiénsia sira, ne’ebé mak intende prosesu ne’e halo intervensaun ho intensaun atu hapara prosesu ne’e tomak, nune’e bele iha koordenasaun ida ne’ebé di’ak entre parte rua, liuliu na’in ba rádiu mak  tenke sai na’in ba serimónia ne’e,” nia subliña.

Ema ho defisiénsia sira halo asaun hodi trava prosesu Serimónia lansamentu rádiu iha AHISAUN, Fatuhada, tanba SEKOMS la tau konsiderasaun ba ema ho defisiénsia ne’ebé sai na’in ba rádiu ne’e. Foto/Hatutan.com.

Nia hatutan, ida-ne’e mak halo prosesu ne’e la la’o ho di’ak to’o bainaka sira balun mós tenke husik hela fatin serimónia ne’e liuliu Enkarregadu Embaixada EUA nian.

Maski ho situasaun ne’e, ikus-mai konsege duni halo lansamentu iha parte lorokraik, tanba parte estrutura rádiu mak foti tiha podér hodi intervein direta iha prosesu lansamentu ne’e.

Advertisement

“Hosi ami nia parte mak fó fali solusaun ba SEKOMS, tanba SEKOMS rasik, ho nia asesór sira laiha solusaun ida ne’ebé di’ak, no ami mak fo fali solusaun ba sira. Prosesu tomak, sira entrega direta ba estrutura rádiu mak organiza to’o prosesu ne’e la’o di’ak duni,” nia hateten.

Vise Prezidente Board Rádiu ba Ema ho Defisiénsia  ne’e mós mensiona katak, sei iha prosesu balun tán ne’ebé mak parte Aosisiaun sira  sei koa’lia hamutuk ho SEKOMS iha loron tuir-mai.

Nune’e mós Prezidente Konsellu Rádiu ba Ema ho Defisiénsia, Gaspár Afonso hateten, nia parte la ezize atu Governu fó saláriu ba estrutura rádiu ne’e,  maibé Governu tenke kria kondisaun no ta’u iha konsiderasaun adekuada.

Gaspár Afonso lamenta tanba SEKOMS laiha liña koordenasaun di’ak ho parte sira liuliu estrutura Rádiu nian ba lansamentu ida-ne’e.

Prezidente Konsellu Rádiu ne’e la satisfás tanba, SEKOMS halo membru sira hosi organizasaun Halibur Defisiente Matan Timor Leste (HDMTL) no Asosiasaun Defisiente Timo-Leste (ADTL) sai fali bainaka ba sira-nia atividade rasik.

Advertisement

“Rádiu ami-nian, konvite ne’ebé SEKOMS fó-sai no ajenda la mensiona ami iha laran. Tanba ne’e ami halo asaun ne’e hodi hatudu katak, ami la fó an ba ema atu politiza no uza ami ba sira-nia interese,” Gaspár Afonso deklara ho lian makás.

Konvite ne’ebe SEKOMS Prepara.

Hatán ba preokupasaun no lamentasaun ne’e, Diretór Média Lokál, José da Costa hosi SEKOMS konsidera katak, preokupasaun no lamentasaun ema ho defisiénsia-sira relasiona ho futuru intalasaun ba rádiu ne’e parte SEKOMS  rejista hela no husu  parte asosiasaun sira atu koopera hodi atinje lai objetivu loron ohin nian maka lansamentu.

“Kona-bá tékniku no buat kiik sira ne’ebé falla ne’e ami nian mós. Ba ita nia diverjénsia no konversasaun sira ne’ebé la monu ba ita boot sira nia laran,  ami husu deskulpa no mai ita solusiona  hodi ofisializa rádiu ne’e depois ita tuur hamutuk,” Diretór José da Costa, hamaus hela Ema ho defisiénsia sira.

Iha fatin hanesan, Sekretáriu Estadu ba Komunikasaun Sosiál, Merício Juvinál dos Reis ‘Akara’ hateten direitu no liberdade espresaun iha Timor-Leste garantidu tanba ne’e ema hotu iha liberdade atu espresa sira nia sentimentu liu hosi asaun-sira.

“Ha’u la tauk tanba uluk ha’u mós halo nune’e atu defende lia loos. Ha’u fó tempu ba imi atu ko’alia hamutuk hodi buka solusaun, nune’e ita bele tama ba ajenda inaugurasaun nian,” Merício Akara hakarak aselera prosesu inaugurasaun.

Perante Ema ho defisiénsia sira Akara deklara katak, durante nia mandatu sei tau prioridade aas liu ba ema ho defisiésia, nune’e ikus mai kansela tia pedidu husi parte seluk hodi fó prioridade duni ba ema ho defisiénsia, ne’e signifika Governu ida-ne’e tau aas dignidade ema ho difisiénsia hanesan ho maluk sira seluk.

Advertisement

“Bainhira imi lakohi rádio ne’e iha ne’e, ita bele muda ba Atsabe tanba sira mós husu hela,” Nia dezafia tán Ema ho defisiénsia sira.

Hosi diálogu ne’ebé iha, ikus-mai parte rua simu-malu no tama ba serimónia lansamentu, maski sei iha naksalak ruma ne’ebé presija hadi’a iha tempu tuir-mai.

Rádiu komunidade ba Ema ho Defisiénsia instala husi SEKOMS liu hosi Diresaun Média Lokál ho orsamentu transferénsia públika hamutuk $3.200 no ekipamentu sira mai hosi SEKOMS rasik hanesan transmiter no antena.

Frekuénsia rádiu ba Ema ho Defisiénsia, komunidade bele asesu iha frekuénsia 102.30 mhz.

Jornalista: Vito Salvadór

Advertisement