Hatutan.com, (27 Abríl 2022), Díli—Governu liuhosi Sekretária Estadu Komunikasaun Sosiál (SEKOMS), iha kuarta 27 Abril, lansa tán portál governu nian ho naran goodnewsontl.gov.tl, hodi fó sai informasaun pozitiva sira ne’ebé bele tane no defende nafatin dignidade no naran di’ak Timor-Leste nian iha mundu.

Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’.

Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’ hateten, portál informasaun ida-ne’e, la’ós de’it ba governu nian mesak, maibé ba ema hotu-hotu, individu, jornalista ka grupu sira ne’ebé iha informasaun kreativu ne’ebé sira prodúz ho di’ak, bele transmite iha portál ne’e. 

Lee Mós:SEKOMS Sei Ko’alia Fali ho MAPKOMS atu Avansa Projetu Lei Subsídiu ba Mídia

Alende ne’e, juven sira ne’ebé partisipa iha kompetisaun oioin iha esterna, manán prémiu ruma, bele hato’o liuhosi portál ne’e, tanba konteúdu informasaun ne’ebé pozitivu no liu-liu identidade loloos Timroan sira nian.

“Objetivu atu Timor orgullu nafatin ba ninia nasaun, orgullu nafatin ba ninia kreatividade iha ninia nasaun no imajen pozitivu ne’e, ita tenke haklaken nafatin,” Merício Juvinal dos Reis Akara hateten, hafoin halo lansamentu ba portál goodnewstl.gov.tl, iha Palásiu Governu, Dili, Kuarta (27/04/2022).

Objetivu seluk hosi kriasaun ba portál ida ne’e, atu bele kombate hoax, ka lia falsu sira tanba oras-ne’e, lia-falsu sei kontinua la’o iha rai-laran no governu rasik  la presiza ona ba taka tutuir, maibé kontinua habelar tán informasaun pozitivu sira “good news” boa notisia kona-bá Timor neineik ba beibeik ema sei la fiar ona lia-falsu sira.

Serimónia lansamentu portál goodnewsontl.gov.tl iha Palásiu Governu, Dili, Kuarta (27/04/2022). Foto/Hatutan.com.

“Ema haree, ka la’e, ida ne’ebá notisia di’ak iha Maubisse, iha fatin di’ak. Entaun, ita hakarak promove liu ida ne’e, atu ema tenke orgullu nafatin ninia nasaun, sentimentu nasionalízmu, patriotízmu ne’e tenke iha nafatin,” Akara hateten tán.

Plataforna online ida ne’e mós atu bele ajuda halo komunikasaun esterna ka internasional no TL la presiza ona tenke gasta osan ba dere ema nasaun seluk sira ninia odamatan atu ba hato’o dehan, TL nian nasaun di’ak hela.

Informasaun ne’ebé sei rekolla hodi publika iha portál ne’e, mai hosi liña ministériu sira ninia atividade diáriu, hosi média literásia sira, mai hosi ema individu sira ne’ebé ho kreatividade rasik ba produsaun video ruma, no bainhira SEKOMS haree katak, konteudu informasaun pozitivu bele husu autorizasaun hodi publika iha portál ne’e. Tanba Portál ne’e, good news on timor-leste, la’os good news ba governu ka, ba SEKOMS.

Téknikamente, Portál ne’e rasik hetan apoia totál hosi Tictimor, maibé jere hosi Gabinete SEKOMS, hodi oferese ba públiku.

Jornalista: Rogério Pereira Cárceres