Hatutan.com (29 Novembru 2021), Díli-Tribunál Distritál Díli (TDD), Segunda (29/11/2021), hala’o primeiru julgamentu ba eis Prezidente Parlamentu Nasionál (PPN) atuál Deputadu hosi Bankada CNRT, arguidu Adérito Hugo da Costa, ne’ebé deskunfia komete krime furtu agravadu relasiona ho dada eletrisidade ilegál iha tinan 2016.

Eis Prezidente Parlamentu Nasionál, Aderito Hugo da Costa, marka prezensa iha TDD, Segunda (29/11/2021). Foto/Hatutan.com

Iha primeiru julgamentu ne’e, arguidu Adérito Hugo da Costa,  hateten, nia parte laiha koñesimentu kona-bá ligasaun eletrisidade ilegál iha ninia rezidénsia ne’ebé lokaliza iha Farol, tanba durante nia hela iha uma refere kontadór EDTL segel-metin no bainhira pulsa laiha arguidu sempre fó osan ba sosa.

Maske nune’e, momentu ekipa Eletrisidade Timor-Leste (EDTL) halo inspesaun ba arguidu nia uma iha loron 3 fulan-Maiu 2016, sen iha autorizasaun husi arguidu nu’udár uma nain no bainhira ekipa deteta katak iha ligasaun ilegál, maka EDTL ko’a ka dezliga kontadór hodi bolu motorista Domingos da Costa intriga fixa ho valór $2000.

Rona informasaun husi motorista Domingos da Costa, arguidu mós haruka ba foti osan hodi selu tuir montante ne’ebé iha fixa ho razaun laiha alternativa seluk tanba momentu ne’ebá arguidu presiza eletrisidade ba ninia hela fatin.

Advertisement

Arguidu deklara durante arguidu hela iha uma ne’ebé lokaliza iha Farol ne’e, EDTL rejista arguidu hanesan konsumedores komersiál ne’ebé ninia gasta ba eletrisidade kada fulan boot liu, maske arguidu hanesan utilizadór privadu la’ós komersiál.

Relasiona ho problema ne’e, arguidu reklama ba EDTL no ikus mai EDTL konsege muda arguidu nu’udar konsumidór non komersiál ho ninia uzu kada fulan $18 to’o $37, tanba antes ne’e kada fulan arguidu uza $120. 

Arguidu mós deklara kontadór iha arguidu nia uma deskontrolu, tanba dalaruma mós EDTL fasilita dada fali eletrisidade husi ema seluk nia uma ba fali uma seluk no antes ne’e arguidu hanesan fali utilizadór komersiál.

Hafoin rona arguidu,  Tribunál adia hikas julgamentu ba loron seluk, hodi kontinua rona arguidu no sasin sira.

Akuzasaun husi Ministériu Públiku (MP) katak iha loron 2 fulan-Maiu 2016 bazeia ba relatóriu kontajen enerjia ne’ebé relata husi EDTL hatudu katak arguidu gasta enerjia normal $120.00 kada fulan, maibé realidade lista uza enerjia hahú fulan-Juñu  2016 to’o fulan-Agostu 2017, arguidu gasta enerjia maioria entre $19.00 to’o $37.00 nune’e depois halo tiha komparasaun kontajen ba gastu normal ho montante $120,00, konklui katak hahú periodu Juñu 2016 to’o Agostu 2017 arguidu nia konduta hamosu ona prezuiju ba Estadu ho montante global $9,760.00.

Advertisement

Ho hahalok arguidu, MP akuza arguidu ba pratika krime furtu agravadu ne’ebé previstu iha artigu 251 no artigu 252 husi kódigu penal Timor-Leste.

Audiénsia julgamentu prezide husi juis koletivu Alvaro M. Freitas, Argentino Luíza Nunes, José Gonçalves, MP reprezenta husi Prokuradór Rogério Viegas no arguidu hetan asisténsia legal husi Advogadu Privadu Pedro Aparicio.

Jornalista: Carmelita Isaac

Advertisement