Hatutan.com, (01 Dezembru 2021), Dili—Kompañia telekomunikasaun Telkomcel hosi Indonézia hala’o lansamentu ba aplikasaun ‘my loja’, atu fasilita kompradór-sira hola sasan liu hosi métodu online ho fásil, lais no seguru.

Ministru Turizmu, Komérsiu no Indústria (MTKI) José Lucas do Carmo. Foto/Hatutan.com.

Ministru Turizmu, Komérsiu no Indústria (MTKI)  José Lucas do Carmo, iha intervensaun hateten, Telkomcel presija iha nafatin kooperasaun ho ministériu turizmu komérsiu no indústria atu bele garante direitu konsumidór-sira nian, oinsa ho aplikasaun my loja bele fasilita sidadaun-sira asesu ba merkadu online no bele fasilita turista-sira ne’ebé vizita Timor-Leste (TL) bele halo mós kompra online, nune’e husu atu Telkomcel garante mós nia kualidade atendimentu liu hosi halo diskusaun bebeik ho parte hotu hodi fó satisfasaun ba públiku.

“Governu haree importánsia hosi asaun ne’ebé Telekomcel iha, liu hosi aplikasaun my loja. Liu hosi aplikasaun ne’e bele promove empreza mikro no pekena empreza halo negósiu online ho di’ak no ida seluk mak aplikasaun my loja bele promove seitór produtivu-sira,  bele mós promove sítiu turístiku-sira iha  TL,” José Lucas do Carmo, hateten  iha Suai Room, Timor Plaza, Kuarta (01/12/21).

Membru Governu ne’e mós aproveita oportunidade ne’e hodi parabeniza Telkomcel ba esforsu no susesu ne’ebé atinze ona, to’o lansa aplikasaun my loja ne’ebé sei fó benefísiu ba konsumidór-sira, inklui ho distribuidór-sira hanesan loja, grupu artezenatu no mós grupu kooperativa sira iha territóriu nasionál.

“Parabéns ba imi nia esforsu no ita hein katak ema hotu sei asesu ba my loja, liu hosi aplikasaun ne’e mós bele dada turista sira vizita TL, tanba sira fásil atu halo kompras ba nesesidade ne’ebé sira presija,” José Lucas hateten.

Sekretáriu ba Asuntu Ekonómiku no Kooperasaun Tékniku  Kedutaan Besar Repúblika Indonézia (KBRI) Anti Kurnadi, hodi Governu Indonéziu nia naran hato’o apresiasaun ba kompañia Telkomcel ne’ebé ho inisiativa kria aplikasaun my loja, atu tulun konsumidór-sira bele sosa sira nia produtu liu hosi online shooping.

“Apresia ho inisiativa hosi Telkomcel ba lansamentu aplikasaun my loja tanba sei lori benefisiu boot ba povu Timor Leste no mós povu Indonézia iha TL  inklui emprezáriu sira hosi Indonézia,” Anti Kurnadi, apresia.

Representante KBRI ne’e subliña katak, Telkomcel nu’udár empreza estatál ne’ebé durante ne’e hala’o nia servisu komersi’al iha TL no hola mós responsabilidade morál atu kontribui ba dezenvolvimentu iha TL.

“Telkomcel nafatin kontribui ba dezenvolvimentu rekursu umanu iha TL liu hosi fornese bolsu estudu ba estudante sira hodi ba hala’o estudu iha Indonézia,” nia esklarese.

CEO Telkomcel, Yogi Rizkian Bahar. Foto/Hatutan.com.

Nune’e mós CEO Telkomcel, Yogi Rizkian Bahar, hateten atu asegura ekonomia nasaun nian, estadu no Governu presija tau atensaun ba empreza kiik-sira liu hosi hasa’e sira nia rendimentu, tanba dala barak empreza kiik sira labele faan sira nia produtu ba liur ka dook hosi sira nia loja, tanba kestaun rekursu.

“My loja atu tulun no fasilita empreza sira faan sira nia produtu, tanba ne’e ha’u suporta no husu atu loja sira iha TL mai faan sira nia produtu iha my loja,” CEO telkomcel Yogi Rizkian Bahar, konvida.

Loja no supermerkadu ka grupu artezenatu sira bele faan produtu iha my loja ho gratuitamente no presija de’it sertifikasaun lisensa hosi serve atu hatudu legalidade hosi parte kompetente no garante kualidade produtu, hodi haboot mós merkadu online nian no la presija ona aluga fatin, maibé iha uma de’it no lori produtu ba iha konsumidór sira.

My loja hamenus kustu aluger ba empreza-sira, tanba ne’e sei halo sosializasaun atu bele manan konfiansa hosi empreza-sira no mós konsumidór tomak.

Tuir dadus hosi Telkomcel, iha loja hamutuk 50 mak oras-ne’e rejista ona hodi faan sira-nia produtu iha my loja no pursentu 80 empreza Timoroan.

Jornalista: Vito Salvadór