Hatutan.com (03 Dezembru 2021) Dili—Conselho Imprensa (CI) Timor Leste, atribui sertifikadu ba média komunikasaun ne’ebé rejistadu iha tinan 2021, hamutuk lima (5) kompostu hosi Hatutan.com, Rádiu Rakambia, SMNEWS.TL, Rádiu Komunidade Lian Matebian no Rádiu Komunidade Lian Mauloko Maubise.

Ministru Asuntu Parlamentár no Komunikasaun Sosiál (MAPKOMS), Francisco Jerónimo, entrega Sertifikadu ba Jenerál Manajér Hatutan.com Syeilla Surayya S. Ricardo, iha enseramentu Díli Dialogue Forum 2021, ne’ebé hala’o iha salaun Delta Nova, Sesta (03/12/21). Foto/Hatutan.com.

Sertifikadu ne’e entrega direta hosi Ministru Asuntu Parlamentár no Komunikasaun Sosiál (MAPKOMS), Francisco Jerónimo, no simu hosi Jenerál Manajér Hatutan.com Syeilla Surayya S. Ricardo, iha enseramentu Díli Dialogue Forum 2021, ne’ebé hala’o iha salaun Delta Nova, Sesta (03/12/21).

Notísia iha Relasaun:Hatutan.com submete dokumentu rejistu ba Conselho de Imprensa

Atribuisaun sertifikadu ne’e bazeia ba Lei Komunikasaun Sosiál númeru: 05/2015, kapítulu VII, kona-bá Conselho Imprensa (CI) ho nia estatutu, artigu 44 ne’ebé ko’alia mós kona-bá kompeténsia iha alinea o dehan, halo rejistu no promove publikasaun iha Jornal da República órgaun komunikasaun sosiál nian sira.

Iha enseramentu Díli Dialogue Forum 2021  ne’e, CI mós atribui karteira profisionál ba jornalista-sira hamutuk na’in 12, mai hosi média nasionál sira hanesan RTTL,E,.P, Naunil Média, GMN TV, Timor Post, Independent no Hatutan.com.

CI apresia ho órgaun komunikasaun sosiál sira ne’ebé rejistadu, maibé CI nafatain halo akompañamentu no monitorizasaun.

Conselho Imprensa (CI) Timor Leste, atribui sertifikadu ba média komunikasaun ne’ebé rejistadu iha tinan 2021, hamutuk lima (5) kompostu hosi Hatutan.com, Rádiu Rakambia, SMNEWS.TL, Rádiu Komunidade Lian Matebian no Rádiu Komunidade Lian Mauloko Maubise. Foto/Hatutan.com.

“CI sei halo akompañamentu no monitorizasaun regulár ba média sira nia servisu, kada tinan sei halo verifikasaun katak, órgaun komunikasaun sosiál ne’ebé rejistradu sei funsiona ka la’e. Bainhira la la’o ami sei fó hatene ba públiku katak, órgaun komunikasaun sosiál ida-ne’e la funsiona no karik iha jornalista balun hodi média ne’e nia naran ba halo entervista ne’e konsidera jornalista abal-abalan,” Prezidente CI, Virgílio da Silva Guterres hateten iha diskursu.

CI husu jornalista sira atu uza karteira profisionál hodi hatudu profisionalizmu liu hosi servisu ne’ebé idak-idak sei halo iha terrenu, tanba jornalista profisionál mak jornalista ida ne’ebé iha kapasidade téknika, hatene uza kamera, edisaun ba lian, imajen, notísia, entrevista no hasai fotografia.

Husu ba jornalista sira atu kontinua kumpre devér étiku no prinsípiu deontolójiku ne’ebé hakerek iha kode étika jornalista, hodi kontribui ba sosiedade la bele sai provokadór.

Tanba ne’e, nia mós husu ba Asosiasaun Jornalista Timor Leste (AJTL) no Timor Leste Press Union (TLPU) hodi hamutuk asume responsabilidade ba kualidade jornalista iha Timor-Leste.

CI atribui karteira profisionál ba jornalista-sira hamutuk na’in 12, mai hosi média nasionál sira hanesan RTTL,E,.P, Naunil Média, GMN TV, Timor Post, Independent no Hatutan.com. Foto/Hatutan.com.

Diretór Ezekutivu CI, Rigoberto Monteiro, esplika mekanizmu auto-regulasaun ba média iha TL foka liu atu prodús regulamentu no funsionamentu atividade jornalista no regulamentu funsionamentu órgaun média komunikasaun oinsa rejistu média sira, no rádiu ne’ebé liu hosi prosesu naruk to’o iha faze atribuisaun sertifikadu.

Hahú iha tinan 2016 to’o agora, CI atribui ona sertifikadu 34 ba média komunikasaun-sira no atribui ona karteira profisionál ba ema na’in 314.

HATUTAN.com nu’udár meiu komunikasaun sosiál ho karáter multimedia no plataforma online ne’ebé mai hosi órgaun komunikasaun sosiál RAYA MEDIA & ENTERTAINMENT, Unipessoal, Lda ho nia sede iha Rua. Av. de Portugal, Nú 74, Kampung Alor, Díli, Timor-Leste.

HATUTAN.com nu’udár mós meiu komunikasaun sosiál fins lukrativu no fornese informasaun kredível ho loos no momoos, atu hakonu direitu públiku ba informasaun no fundamenta tuir artigu 40^o no 41^o Konstituisaun Repúblika Demokrátika Timor-Leste, kona-bá liberdade espresaun no liberdade imprensa.

Objetivu prinsipál ba estabelesimentu HATUTAN.com atu sai fonte informasaun ida ba povu Timor-Leste, ne’ebé iha kbiit ba elaborasaun produtu informasaun no notísia-sira, hodi fasilita públiku hetan informasaun ho kredível iha eskalaun nasionál, rejionál no internasionál, tuir ninia Filozofia Notísia ba mudansa (news for change) ho Vizaun & Misaun atu forma sosiedade demokrátiku iha Timor-Leste ne’ebé kontribui ba dezenvolvimentu nasionál.

Hatutan.com rejistadu iha Órgaun Reguladora Meius Komunikasaun Sosiál Conselho Imprensa (CI) Timor-Leste ho númeru 04/DRAJ-CI/VI/X/2021.

Jornalista: Carmelita Isaac