Hatutan.com (07 Dezembru) Díli—Timor-Leste (TL) marka tán istória foun iha nia jornada petrolífera, ho asinatura kontratu fahe produsaun ka Production Sharing Contract (PSC) ba bloku PSC TL-OT-21-10, entre Autoridade Nasional Petróliu no Minerais (ANPM) ho Timor Gapa Pualaca Block, Unipessoal, Lda ne’ebé sai hanesan na’in 100% no operadór ba PSC refere.

Prezidente ANPM, Florentino Soares Ferreira ho Managing Director Timor Gap Pualaca Block, Lamberto Fernandes no testamuña hosi Ministru Petróleu no Minerais, Victor da Conceição Soares ho Prezidente no CEO Timor Gap E.P, António Loiola de Sousa, hala’o asinatura kontratu fahe produsaun ka Production Sharing Contract (PSC) ba bloku PSC TL-OT-21-10, iha otél Novo Turismo, Tersa (07/12/2021). Foto/Hatutan.com.

Serimónia asinatura ne’e hala’o hosi Prezidente ANPM, Florentino Soares Ferreira ho Managing Director Timor Gap Pualaca Block, Lamberto Fernandes no testamuña hosi Ministru Petróleu no Minerais, Victor da Conceição Soares ho Prezidente no CEO Timor Gap E.P, António Loiola de Sousa.

ANPM ho Timor Gap, E.P hili loron ohin ho objetivu atu dedika alkansu ida ne’e iha loron istóriku Timor-Leste nian atu fó onra ba erói nasionál hirak ne’ebé sakrifika sira nia vida ba rai no povu Timorense.

ANPM agradese ba Timor Gap maske hanesan Empreza estatál, maibé iha planu traballu ne’ebé realístiku ho komprimisu ne’ebé di’ak liu-liu iha faze esplorasaun, maibé ANPM lori Governu nia naran nafatin superviziona no administra.

Ho perfurasaun ida-ne’e, ANPM garante fó esperansa ba Timor-Leste katak, bele hetan reseitas adisionais hosi perfurasaun ne’e, inklui sira seluk.

“Ohin atu taka tinan ne’e, asina kontratu partilla produsaun ho Empreza estatál, hatudu katak ita-nia empreza forte. Nune’e kontratu ne’e marka istória foun iha jornada Timor Leste liu-liu Timor Gap tanba primeira vez sai hanesan operadór no na’in ba projetu produsaun mina no gas,” Prezidente ANPM Florentino Soares Fereira, hateten ba jornalista-sira hafoin asina kontratu iha otél Novo Turismo, Tersa (07/12/2021).

Esplorasaun iha bloku Poalaca la’ós foin hahú, maibé kleur ona antes Independénsia ne’ebé konsege halo ona perfurasaun ba posu balun.

Prezidente ANPM, Florentino Soares Ferreira ho Managing Director Timor Gap Pualaca Block, Lamberto Fernandes no testamuña hosi Ministru Petróleu no Minerais, Victor da Conceição Soares ho Prezidente no CEO Timor Gap E.P, António Loiola de Sousa, hala’o asinatura kontratu fahe produsaun ka Production Sharing Contract (PSC) ba bloku PSC TL-OT-21-10, iha otél Novo Turismo, Tersa (07/12/2021). Foto/Hatutan.com.

Tanba ne’e, hosi literature barak hatudu iha poténsia ne’ebé presija hatur iha kontratu, nune’e Empreza iha planu traballu hodi bele prodús kualidade mina ne’ebé presija esplora iha dezenvolvimentu.

Timor Gap iha kompromisu ba kualkér atividade ne’ebé halo sempre iha serteza no persentajen hosi kada baril hosi eksplorasaun ne’e.

Ho Estudu ne’ebé Timor Gap haree ho planu vizaun ne’ebé iha, hahú esplorasaun, nune’e bainhira planu tuir iha ambisaun katak hakarak iha fim 2022 ka 2023 karik bele halo perfurasaun ba posu ida, maibé ba esplorasaun mina no gas tenki fura posu mak foin hatene.

Manajer Timor Gap Bloku Pualaca, Lamberto Fernandes esplika, durante loron 60 sei kompleta rekollamentu liu-liu programa servisu ba periudu primeiru ho durasaun tinan tolu, ne’ebé foku liu ba estudu jeokímiku, sésmiku no ikus liu perfurasaun posu ida.

Ida-ne’e hanesan faze esplorasaun ka deskoberta, maibé nafatin ho esperansa hetan mina ne’ebé TL hakarak, maibé presija hatene ninia kuantidade, tanba ne’e halo estudu sésmiku hodi hatene kuantidade.

Aktividade eksplorasaun mina no gas ne’e sei tau iha programa servisu ne’ebé sei submete ba ANPM no sei hahú iha tinan 2022 ho durasaun kontratu tinan hitu, ba periudu dahuluk tinan tolu ne’ebé foka liu ba atividade estudu jeokímiku, estudu sésmiku no planu sei fura posu ida iha Pualaca.

Serimónia ida-ne’e taka ho atividade kari ai-funan iha Portu Dili, hodi hanoin hikas mártires da pátria ne’ebé sai vítima durante loron invazaun.

Jornalista: Carmelita Isaac