Hatutan.com, (10 Dezembru 2021), Díli—Deputadu Francisco de Vasconselhos  hanesan mós Prezidente bankada Partidu Libertasaun Populár (PLP), ‘bandu’ deputadu sira hosi bankada opozisaun kestiona beibeik iha plenária Parlamentu Nasionál (PN), kona-bá saláriu Prezidente Bee Timor-Leste no Empréza Públika (BTL,E.P), ne’ebé boot liu órgaun soberanu sira liuliu Prezidente Repúblika (PR).

Deputadu Francisco de Vasconselhos, hanesan mós Prezidente bankada Partidu Libertasaun Populár (PLP). Foto/Média PN.

Francisco de Vasconselhos bandu ne’e, tanba deputadu bankada União Democratica Timorense (UDT), Francisco David Carlos, ho Arão Noé de Jesus Amaral, hosi bankada Conselho Nacional Reconstrução Timorense (CNRT), ko’alia beibeik iha plenária kona-bá saláriu ba Prezidente BTL,E.P nian boot liu saláriu Prezidente Repúblika (PR), Francisco Guterres “Lu Olo”.

Notísia iha Relasaun:Saláriu Prezidente EDTL $6.500 no BTL $6.000 Boot Liu Prezidente Repúblika

“Ha’u deskorda ho deputadu David, deputadu Arão, deputadu ne’ebé tán mak loro-loron ko’alia de’it kona-bá BTL,E.P estruturalmente,” Francisco Vasconselhos, hateten iha ámbitu diskusaun espesialidade OJE 2022, iha plenária PN, Sesta (10/12/2021).

Deputadu Vasconselhos fó hanoin katak, tuir loloos, deputadu sira ko’alia kona-bá bee-moos ba komunidade, la’ós kona-bá saláriu. Tanba deputadu sira nia kna’ar atu halo ‘de’it’ fiskalizasaun.

“Ita boot sira ko’alia mak estrutura, nunka ko’alia kona-bá bee. Preokupa mak bee karik loos, fatin barak bee laiha. Kna’ar ida fiskalizasaun mak ida-ne’e. Asesór sira iha ne’e saláriu tinan ba tinan dezde Timor ukun aan rihun$18 ita boot sira nunka ko’alia,” Deputadu Vasconselhos, defende.

Deputadu hosi bankada governu ne’e dehan, governu iha kompeténsia eskluziva atu regulariza ka halo mudansa ba estrutura instituisaun sira, liuhosi dekretu governu no dekretu lei, deputadu sira ba halo de’it mak fiskalizasaun.

Kona-bá petisaun hosi funsionáriu sira ne’ebé antes ne’e servisu iha diresaun jerál água no saneamentu, ba PN, tanba lakon servisu, pertinente atu diskute. Maibe, la’ós tenke haree fali asuntu governu nian kona-bá Bee Timor.

Maske nune’e, deputadu hosi bankada Kmanek Haburas Uniddae Nasional Timoroan (KHUNTO), António Verdiál, dehan, tuir nia perspetiva hosi dimensaun ekonómika no sosiál katak, seidauk tempu atu governu hari’i BTL,E.P nu’udár empreza públika, tanba laiha retornu finanseira ba Estadu.

“Seidauk tempu atu hari’i empreza públika BTL,E.P, tanba retornu finanseiru ba Estadu sei laiha, mínimu teb-tebes tanba saláriu Prezidente no Vise Prezidente boot liu fali Prezidente Repúblika, Prezidente Parlamentu Nasionál, Primeiru Ministru, deputadu sira no membru governu sira hotu,” deputadu KHUNTO, António Verdial, hateten.

Deputadu Partidu Kmanek Haburas Uniddae Nasional Timoroan (KHUNTO), António Verdiál. Foto/Média PN.

Deputadu hosi bankada KHUNTO ne’e haree katak, Serbisu Diresaun Jerál Bee no Saneamentu, ne’ebé hola ona mahon iha Ministériu Obras Públika, maibé nia prestasaun serbisu ne’e ladún di’ak, kompara ho Diresaun Jerál Água no Sanemanetu.

Nune’e, husu ba governu atu iha komitmentu polítika hodi rezolve problema ne’e, hodi ema seluk labele sai vitima.

Observasaun seluk ne’ebé durante ne’e KHUNTO halo, katak iha mós funsionáriu hosi Diresaun Água no Saneamentu, ne’ebé iha tempu klandestina, fó sira-nia kontribuisaun ba Ukun Rasik An, nu’udár mate restu 12 Novembru ne’ebé barak mós hala’o kna’ar iha ne’ebá. Maibe, ohin loron, governante sira halo sira terus fila-fali.

“Liafuan ne’ebé ami rona dehan katak, governante sira  liu-liu ministru Salvadór Pires dos Reis, dudu sira tama tahu laran no sira goza moris iha kalohan leten,” Deputadu Verdial, haktuir.

Deputadu KHUNTO ne’e konsidera mosu injustisa ba funsionáriu sira iha Diresaun Jerál Água no Saneamentu ne’ebé hola mahan iha MOP.

“Favor boot ida, hanesan deputadu, ha’u husu ba ministru MOP atu rezolve lai problema ne’e,” deputadu António Verdial, husu.

Ikus liu, deputadu António Verdial husu ba deputadu hamutuk na’in 65 ne’ebé oras-ne’e reprezenta povu iha Uma-fukun atu tau-hanoin hamutuk, hodi haree ba Orsamentu Jerál Estadu (OJE) 2022 nian, ne’ebé propoin ona ba BTL,E.P ho montante millaun $17.

Prezidente  Bee Timor-Leste, Empreza Públiku (BTL,E.P) nai saláriu mensál  $6.000, ne’ebé konsideradu boot liu saláriu mensál no abonu Prezidente Repúblika nian.  

Tuir Lei Nu.14/2019, 21 Outubru, Kapítulu II (Prezidente Repúblika) iha artigu 4, kona-bá Remunerasaun Prezidente Repúblika nian iha númeru 2 mensiona Prezidente Repúblika simu saláriu mensál $2.500 no iha númeru 3 fó direitu ba Prezidente Repúblika kona-bá direitu abono ba despeza ka allowance ho nia valór 100% hosi nia saláriu báziku  ($2.500) ho nune’e, totál kada mensál Prezidente Repúblika hetan $5.000.

Jornalista: Rogério Cárceres