Hatutan.com, (16 Dezembru 2021), Díli-Governu no povu Korea du Súl liuhusi nia embaixada iha Timor-Leste,  Kinta (16/12/2021), entrega ekipamentu no fasilidade Taekwondo nian ba Komandu FALINTIL-Forsa Defeza Timor Leste (F-FDTL) ho nia kuantidade sasán iha kaixa 24.

Xefe Estadu Maiór Jenerál F-FDTL, Tenente Jenerál Lere Anan Timur simu ekipamentu Taekwondo nian hosi Embaixadór Korea du Súl iha Timor-Leste, Kim Jeong Ho. Foto/Media F-FDTL

Xefe Estadu Maiór Jenerál F-FDTL, Tenente Jenerál Lere Anan Timur, ne’ebé simu direita oferta ne’e hosi Embaixadór Korea du Súl iha TL, Kim Jeong Ho, hateten komandu F-FDTL hakarak integra desportu Taekwondo iha instituisaun F-FDTL, tanba Taekwondo nu’udár desportu ida ne’ebé hatudu nia karater neutru no ho profisionál.

Lere Anan Timur hateten, bainhira TL nia situasaun sei iha faze tranzisaun laran, komandu F-FDTL halo kedas ona aproximasaun ho forsa Organizasaun Nasaun Unidas (ONU) sira no liu-liu forsa Koreanu sira hodi fó treinamentu Taekwondo ba membru forsa defeza sira.

“Momentu ne’ebá ne’e, ami husu sira maka fó treinu Taekwondo no ami opta ida-ne’e,  kerdizér buat-ne’e hanesan ita bele dehan katak, la’ós planeadu ida, mas di’ak ne’e tanba Taekwondo hanesan ohin dehan, Arte Marsiál ida ne’ebé  neutru tebes, profisionál iha nivel internasionál,”  Lere Anan Timur afirma tan hafoin simu oferta fasilidade Taekwondo nian hosi Estadu Korea do Súl iha auditóriu Kuartél Jenerál F-FDTL, Fatuhada, Díli.

Lere Anan Timur, hateten, bainhira komandu mak hili Grupu Arte Marsiál (GAM) sira hanesan Kmanek Oan Rai Klaran (KORK), Ikatan Keluarga Silat Putera Timor-Leste (IKS-PTL) Kera Sakti (IKS), Persaudaraan Setia Hati Terate (SH), dala-ruma oras ne’e ho liras semo ona, no dala-ruma ba sunu tan ema nia uma. Maibé, labele, tanba ema ne’ebé sai membru F-FDTL tenke neutru no imparsiál.

“Ami hili Taekwondo, hanesan parte instrusaun ida ba ami nia forsa defeza Timor-Leste no Taekwondo ne’ebé mak hala’o iha instrusaun Metinaro, kleur ona. Ha’u fiar ho esforsu embaixadór nian Korea du Súl sei haburas liután Taekwondo iha TL,” Lere Anan Timur hateten.

Biban ne’e, Embaixadór Korea  du Súl iha TL, Kim Jeong Ho, informa, material ne’ebé apoia mak hanesan, body target, hand target, inklui ho matrás, hamutuk kaixa 24.

“Ekipamentu sira ne’ebé ohin ami entrega ne’e, maka ida atu tahan tebe nian ka body target ho hand target ho tán matrás, ida tau iha rai nian ne’e. Ne’ebé sira ne’e uza para atu halo treinamentu,” Kim Jeong Ho, informa.

Tuir planu, iha fulan-Fevereiru 2022, Governu Korea du Súl sei apoia tán farda ba treinu nian ho pár hamutuk 500 ba Komandu F-FDTL no sei oferese direta ba membru sira atu hasa’e abilidade iha desportu Taekwondo.

Jornalista: Rogério Pereira Cárceres