Hatutan.com, (13 Dezembru 2021), Díli– Ministériu Públiku liuhusi Prokuradór Hernani da Costa, alega arguidu JLO nu’udar membru Polísia Nasionál Timor Leste komete krime maus tratus tanba baku beibeik nia eis-kaben ho inisiál LAS.

Ho aktu arguidu JLO nian ne’e halo lezada LAS  tenke hala’o tratamentu iha fatin própriu iha PRADET. Liuhusi julgamentu iha Tribunál Distritál Díli (TDD), Segunda (13/12/2021), MP  aprezenta razaun ho pena pena efetiva ba arguidu no laiha sirkunstánsia tanba faktu provadu no arguidu nia hahalok hatudu la koopera ho Tribunál hodi la marka prezensa iha Tribunál durante prosesu lao.

Defeza ne’ebé fó asisténsia legal ba arguidu husi Defensor Públiku Sergio Quintas, husu ba Tribunál atu konsidera sirkunstánsia hotu ne’ebé iha ho razaun, maske arguidu ho lezada soe-malu ona, maibé iha oan-rua ne’ebé presiza arguidu tau maten, inklui mós arguido nia fen-ki’ik no oan ne’ebé iha ona.

Hafoin rona alegasaun, Tribunál adia hikas julgamentu ba loron seluk hodi rona desizaun ikus ba arguidu.

Tuir akuzasaun husi MP katak husi relasaun arguidu ho lezada hetan oan na’in-rua, durante moris hamutuk hanesan fen ho la’en, arguidu sempre baku lezada bainhira arguidu lanu no husu osan la fó, maske lezada rasik hato’o ona keixa ba Komandu Jerál  PNTL maibé laiha rezultadu.

lha fulan-Maiu 2017, arguidu kontinua halo agresaun ba lezada ho maneira tuku, basa, tebe hodi foti lezada nia ropa soe ba li’ur.

Maske arguidu ho lezada fahe-malu ona, maibé iha loron 10 fulan-Fevereiru 2018, arguidu ba iha lezada nia servisu fatin Timor Plaza hodi baku no tuku lezada nia-ibun to’o ran sai iha lezada nia kolega nia-oin.

Ho hahalok arguido nian ne’e, halo lezada moe no laiha dignidade hodi deside fahe-malu ho arguidu tanba la aguenta ho arguidu nia hahalok.

MP akuza arguidu ba pratika krime maus tratus konjuga ho violénsia doméstika ne’ebé previstu iha artigu 154, 520 husi kódigu penal Timor Leste.

Audiénsia julgamentu preside husi juiz koletivu, Arjentino Luisa Nunes, José Gonçalves, Alvaro Freitas, MP reprezenta husi Prokuradór Hernani da Costa no arguidu hetan asisténsia legal husi Defensor Públiku Sergio Quintas.

Jornalista: Carmelita Isaac