Hatutan.com, (14 Dezembru 2021), Díli—Deputadu sira iha Parlamentu Nasionál (PN), iha tersa 14 Dezembru 2021, aprova ona proposta Orsamentu Jerál Estadu (OJE) ba tinan 2022 iha Fundu COVID-19 nian, iha espesialidade ho votu afavór 48, (𝟕𝟕%), kontra ida, no  abstensaun 13.

Votasaun ba aprovasaun Fundu Covid-19 iha PN, Tersa (14/12/2021). Foto/Média MF.

Orsamentu ne’ebé aprovadu iha Fundu Espesiál COVID-19 ba tinan oin 2022 ne’e, ho valór hamutuk milliaun $37.625.189.

Notísia iha Relasaun:OJE 2022 Pasa iha Jeneralidade ho Votus Afavór 44, Kontra 0 no Abstensaun 21

Orsamentu ho montante ne’e hodi aloka ba Programa Saúde ne’ebé foku ba iha Prevensaun no Mitigasaun Covid-19 ho detalla klasifikasaun ekonómiku, (a) Saláriu no Vensimentu, 0 (zero), (b) Bens no Servisu $31.950.198, (c) Kapitál Menór $2.265.000, (d) Kapitál Dezenvolvimentu $2.300.000, no (e) Transférensia Públiku $1.110.000.

Liuhosi aprovasaun orsamentu ne’e, lori mudansa iha Programa Cesta Bázika, ba iha tinan 2022, no iha programa ne’e, ministériu implementadór sira mak hanesan Ministériu Turísmu Komérsiu no Indústria (MTCI), ho Sekretária Estadu Kooperativa (SEKOOP), ne’ebé sei implementa direta hahú hosi prosesu aprovizionamentu to’o realizasaun pagamentu ba kompaña fornesedór ai-han ba programa Cesta bázika.

Nune’e, responsável ba programa ne’e, la’ós ona kompeténsia ba Ministériu Finansas (MF), iha Sekretariadu Tékniku Fundu COVID-19.

Iha diskusaun ba sesaun plenária ne’e, prezide hosi Prezidente Parlamentu Nasionál (PPN), Aniceto Longuinhos Lopes Guterres, no  akompaña hosi membru sira hosi meza PN, ho prezensa hosi Primeiru-Ministru (PM), Jenerál Taur Matan Ruak, Ministru Finansas (MF), Rui Augosto Gomes, inklui membru oitavu Governu Konstitusionál.

Jornalista: Rogério Cárceres