Hatutan.com, (15 Dezembru 2021), Bobonaro-Iha diálogu  Prezidente Repúblika (PR), Francisco Guterres “Lú Olo” ho komunidade, Kuarta (15/12/2021), iha Jináziu Maliana,  komunidade Suku Lahomea, Munisípiu Bobonaro,  Apolinário Barros, hato’o lamentasaun kona-bá Ministériu Agrikultura no Peska (MAP)  ne’ebé sosa tiha sira-nia hare maibé to’o agora seidauk selu.

Notísia iha Relasaun: Ministru Pedro Reis Lansa Importasaun Manu-Futu

Komunidade diálogu ho PR Lú Olo iha Jináziu Maliana, 15 Dezembru 2021. Foto/Media PR

“Dignidade Estadu no Governu nian tau iha ne’ebé.  Tanba ne’e, husu ba MAP atu bainhira loos mak bele selu komunidade nia hare ne’ebé MAP mai foti,” Apolinário Barros tenik.

Nia halo ilustrasaun kona-bá slogan “Povu Kuda, Governu Sosa”, maibé tuir nia realidade agora hatudu agora povu kuda, Governu ba sama-leet de’it.

“Dala ida tan ha’u husu ba nai-liurai agrikultór sira nian, lalika bosok beibeik povu, povu ne’e baruk ona,” nia hateten hodi hatudu nia lamentasaun ba promesa MAP nian.

Vise-Ministériu Agrikultura, Abílio Xavier de Araújo,  ne’ebé partisipa mós iha diálogu ne’e halo kedas resposta hodi lia-tun dehan, agrikultura sira iha Munisípiu Bobonaro sira-nia produtu maka’as ka sa’e, to’o kompañia sira ne’ebé sosa sei debe hela sira-nia osan, ne’e tanba produtu barak liu.

“Atu halo loos de’it uitoan, Ministériu Agrikultura ne’e só hamutuk ho povu para prodús hasa’e ai-han, la’ós atu sosa hahán lokal, ida sosa ne’e ministériu seluk, Sentru Lojístika Nasional (CLN sigla Portugés) sira mak sosa,” membru Governu ne’e esplika.

Vise-Ministru Agrikultura ne’e agradese ba preokupasaun, maibé Ministériu Agrikultura hatete dala ida tan, agrikultura la sosan hahán husi  povu agrikultura sira, Ministériu Agrikultura so hamutuk ho agrikultura sira hasa’e produsaun, ida ne’ebé sosa ne’e CLN sira mak sosa, la’ós Ministériu Agrikultór.

Prezidente Repúblika, Francisco Guterres “Lú Olo” reforsa katak, foin semana kotuk liubá Prezidente Repúblika promulga dekretu lei ida husi governu nian, atu bele CLN fahe hahán  ba povu ne’ebé kbiit laek, ho rendimentu ki’ik $1.9

“Portantu sira ne’e  CLN sei bele haree  sira-nia produsaun iha armazén para bele fó apoiu ba ida ne’e. Bainhira ita fó hanesan ne’e fó mós hanesan oportunidade ba produtór sira, para atu bele prodús di’ak liután, tanba CLN sei sosa ita-nia produtu ne’e nafatin iha tempu oin,” informa PR ba povu Bobonaro.

Jornalista: Vito Salvadór