Hatutan.com, (25 Janeiru 2022), Díli—Primeiru Ministru (PM) Taur Matan Ruak ne’ebé assume mós kargu hanesan Ministru Interiór (MI), hatún despaixu ba Komandu Polísia Nasionál Timor Leste (PNTL), hodi fó orientasaun atu oferese membru hosi Corpo Segurança Pessoal (CSP) na’in tolu atu asegura Konsilleiru Masimu Partidu Kmanek Haburas Unidade Nasionál Timoro Oan (KHUNTO), José dos Santos “Naimori” Bucar.

Formasaun ba membru Corpo Segurança Pessoal (CSP), iha Kuartél Unidade Especial da Policia (UEP), Bairru-Pité, Díli, Tersa (25/01/2022). Foto/Hatutan.com.

Komandante unidade CSP, Inspetór Xefe Polísia, Marcos Lopes Soares hateten, desizaun CSP atu halo mós seguransa ka eskolta ba Naimori, tanba hetan despaixu hosi Komandante Jerál PNTL, Komisáriu Faustino da Costa.

“Orientasaun hodi fó seguransa ba Naimori ne’e, tanba hetan mós despaixu hosi Primeiru Ministru (PM), Taur Matan Ruak, haruka ba iha komandante Jerál PNTL, depois ba iha komandante unidade, hafoin halo kolokasaun membru. Ha’u hanesan operasionál, koloka membru bazeia ba orientasaun komandu,”  Inspetór Xefe Polisia, Marcos Lopes Soares hateten, hafoin abertura formasaun ba membru sira iha kuartél Unidade Especial da Policia (UEP), Bairru-Pité, Díli, Tersa (25/01/2022).

Inspetór Xefe Polísia ne’e, esplika, PNTL nu’udár autoridade seguransa Estadu nian, no tuir lei ne’ebé atribui katak, PNTL iha kna’ar atu asegura kualkér sidadaun, banhira iha despaixu ruma hosi komandu.

“Situasaun agora ladún ameasa, entaun koloka na’in-tolu iha ne’e. Ita nia lei asegura kualkér sidadaun, sé mak iha ameasa, halo karta ba entidades, hetan aprovasaun, despaixu mai, ha’u koloka,” Inspetór Xefe Polisia ne’e, subliña.

Formasaun ba Membru CSP

Formasaun ba membru Corpo Segurança Pessoal (CSP), iha Kuartél Unidade Especial da Policia (UEP), Bairru-Pité, Díli, Tersa (25/01/2022). Foto/Hatutan.com.

Membru CSP hamutuk na’in-24, iha Tersa 25 Janeiru, partisipa iha formasaun kona-bá halo evakuasaun no protesaun ba ema importante sira ka Verry Verry Important Person (VVIP), ne’ebé sira eskolta bá, hodi bele asegura ka hasees hosi fatin risku.

Membru CSP na’in-24 ne’e, kompostu hosi mane na’in 22, no feto na’in-rua, ne’ebé partisipa iha formasaun ne’e, durante fulan-ida.

“Ida ne’e fokus liu ba seguransa pesoál, evakuasaun, proteje, karik buat ruma mosu sira bele evakua ba fatin seguru,” Inspetór Xefe Polísia, Marcos Lopes Soares, hateten.

Komandu PNTL estabelese unidade CSP, dezde tinan 2001 no formasaun dahuluk ne’ebé membru sira hetan mai hosi United Nations Police (UNPOL). Iha formasaun ba primeiru turnu ne’e involve hosi membru na’in 17.

Iha 2004, liuhosi planu estratéjiku komandu PNTL nian, haruka tán membru sira ba tuir formasaun iha nasaun Tailándia.

Hosi 2001 to’o 2010, UNPOL sempre fó formasaun téknika no tátika ba membru CSP, ikus mai membru balun konsege sai ona treinadór.

“Entaun iha 2010 mai oin ne’e, ita nia CSP rasik, fó treinu ba membru foun sira, hodi halo eskoltu ba ita nia boot sira,” Marcos Lopes Soares, informa.

Oras ne’e totál efetivu sira iha unidade CSP hamutuk na’in 265. Membru sira ne’e kolokadu ona ba líder órgaun sira iha soberanu haat mak hanesan, Prezidente Repúblika (PR), Primeiru Ministru (PM), Prezidente Parlamentu Nasionál (PPN) no Prezidente Tribunál Rekursu (PTR), no inklui eis titulár sira.

Alende ne’e, iha membru CSP balun, halo mós seguransa ka eskolta ba ajente sira instituisaun Estadu nian hanesan, Provedór da Provedória dos Direitos Humanos (PDHJ), Komisáriu Comissão Anti Corrupção (CAC), inklui Embaixadór Amérika nian iha Timor-Leste.

Tuir planu komandu CSP nian, kolokasaun membru sira ne’e, haree ba grau ameasa. Agora daudaun orgaun soberanu ne’e iha na’in-lima ba leten.

Membru governu, iha ema na’in-tolu ka haat no Eis titular mós na’in-lima ba leten, tanba ne’e eis titulár hanesan Prezidente Repúblika, Primeiru Ministru, inklui Prezidente Parlamentu, ne’e koloka tuir grau ameasa.

Membru CSP hamutuk na’in-265 ne’e, oras ne’e daudaun asegura hela membru Governu sira iha terrenu.

Iha komandu, iha de’it komandante no segundu komandante, nomós ekipa apoia administrasaun na’in-haat, restu koloka hotu iha terrenu.

Jornalista: Rogério Pereira Cárceres