Hatutan.com, (31 Dezembru 2021), Díli-Durante tinan tomak 2021, Komandu Polísia Nasionál Timor-Leste komete  infrasaun dixiplinár tuir regulamentu disiplinár ne’ebé aplikavel iha Komandu PNTL.

Notísia iha Relasaun: Ema 56 Mate iha Asidente Tráfegu

Xefe Departamentu Justisa PNTL, Superintendente Xefe Polísia, Agostinho Gomes, komanda formatura hodi fó orden ba membru sira atu servisu ho pontualidade, disiplina no responsabilidade. Foto/Media PNTL

Xefe Departamentu Justisa PNTL, Superintendente Xefe Polísia, Agostinho Gomes da Silva, liuhusi konferénsia imprensa iha Kuartél Jerál PNTL, Caicoli, Díli, Sesta (31/12/2021), informa katak  ho autorizasaun hosi Komandante Jerál PNTL, Komisáriu  Faustino da Costa, maka Departamentu Justisa relata ba  públiku kona-bá esforsu seriedade no sinseridade ne’ebé maka komandu PNTL halo, hodi garantia dixiplina no orden polisiál ba patriota PNTL hotu-hotu, para públiku hatene.

“Iha tinan 2021, departamentu justisa PNTL halo prosesu kazu infrasaun dixiplina, totál  kazu 186. Entre kazu hirak ne’e, kazu infrasaun dixiplina ne’ebé maka konsege finaliza tiha ona, iha kazu 115. Kazu infrasaun dixiplina ne’ebé sei kontinua halo prosesu hela, iha kazu 61,” Agostinho Gomes da Silva hateten.

Hosi kazu 61 ne’ebé sei prosesu hela ne’e, iha kazu 10 mak pendente hela iha Tribunál tanba kazu dixiplina ne’ebé mak hala’o hosi membru sira, iha indísiu ba krime.

Hosi totál kazu 186 ne’e, sira ne’ebé nia prosesu finaliza tiha ona, hamutuk 115, ho nia atinjimentu hanesan tuir mai ne’e;

• Arkivamentu sein pena dixiplina iha kazu 36.
• Aplika pena dixiplina, represaun deskrita iha kazu 46
• Aplika pena dixiplina multa, loron 10 to’o 30, iha kazu 17
• Aplika pena dixiplina suspensaun loron 31 to’o loron 90 iha kazu 11.
• Aplika pena dixiplina suspensaun hosi loron 91 to’o loron 121 iha kazu rua (2).

“Depois, aplika pena dixiplina demisaun iha kazu ida (1). La inklui kazu tolu ne’ebé maka foin daudauk konsellu superior PNTL deside, tanba ne’e, kazu 2019 nian. Ida ami fó sai ne’e, kazu ne’ebé maka akontese no prosesu iha 2021,” Agostinho Gomes da Silva hateten.

Xefe Departamentu Justisa PNTL, Superintendente Xefe Polísia, Agostinho Gomes, komanda formatura hodi fó orden ba membru sira atu servisu ho pontualidade, disiplina no responsabilidade. Foto/Media PNTL

Hosi totál kazu infrasaun dixiplina 186 ne’ebé maka fó sai, membru sira ne’ebé komete krime dixiplinár barak liu, dahuluk mak Komandu Jerál PNTL. Daruak, Komandu Polísia Munisípiu Dili. Datoluk, Unidade Espesiál Polísia (UEP). Dahaat, Unidade Polísia Marítima (UPM), no dalimak, Komandu  Polísia  Munisípiu Baucau.

“Ida ne’e maka presiza fó sai ba públiku para bele hatene, kona-bá saida maka komandante jerál PNTL halo esforsu hodi hadi’a dixiplina patriota PNTL, durante tinan 2021, ho objetivu para atu bele garante dixiplina norma polisiál, nune’e membru sira sai profisionál, hodi hala’o servisu tuir lei no orden ne’ebé maka vigora iha nasaun RDTL,” Superintendente Xefe Polísia, Agostinho Gomes da Silva afirma.

Membru Na’in-34 Lakon Vida

Iha fatin hanesan, Portavós Komandu Jerál PNTL, Superintendente Xefe Polísia, Arnaldo de Araújo, hatutan, durante tinan 2021 nia laran, membru PNTL hamutuk nain 34 mak lakon ona sira-nia vida (mate) tanba sofre moras no membru PNTL ne’ebé agora daudaun hala’o  hela knar hamutuk 4.084.

Alende ne’e, membru sira ne’ebé maka oras sei enfrenta problema moras no halo hela tratamentu hamutuk na’in-21.

“Hein katak, sira ne’ebé moras, komandu jerál sei fó atensaun másimu ba sira, liuhosi ita-nia saúde. Ba tinan oin, iha ona polítika komandu jerál nian, sei hala’o ba iha munisípiu hotu-hotu para hodi bele fó atendimentu médiku ba iha membru sira ne’ebé sira-nia kondisaun saúde moras,” Arnaldo de Araújo haktuir.

 Jornalista: Rogério Cárceres