Hatutan.com, (03 Janeiru 2022), Díli—Hafoin tetu kle’an Dekretu kona-bá Orsamentu Jerál Estadu (OJE) ba tinan 2022, Prezidente Repúblika Francisco Guterres Lú Olo, ho kbiit konstistusionál, promulga Diploma n°55/V ne’ebé dekreta hosi Parlamentu Nasionál (PN), iha 16 Dezembru 2021. 

Avó feto ne’ebé hatutan moris iha Loja ninin. Foto/Hatutan.com.

Tuir Konstituisaun haruka (liuhosi artigu 115, n°1, alínea d) no artigu 145°, n°1), tinan-tinan, Governu mak iha kbiit atu prepara proposta-Lei refere ba Orsamentu Jerál Estadu (OJE).

Notisia iha Relasaun:OJE 2022 Pasa iha Jeneralidade ho Votus Afavór 44, Kontra 0 no Abstensaun 21

Governu hato’o proposta-Lei kona-bá OJE 2022 ba Parlamentu Nasionál iha 15 Outubru 2021, ho montante $1,675.000.000.

Tanba deputadu sira aprova proposta foun liu 100 durante diskusaun espesialidade,  Parlamentu Nasionál hato’o Dekretu kona-bá OJE 2022 ba Prezidente Repúblika, ho montante totál $1,949.043.291 (besik billiaun 1.95).

“Ho promulgasaun hosi Prezidente Repúblika, lei ne’e tama en-vigor iha loron tuir kedan publikasaun iha Jornál Repúblika, ho efeitu hosi 1 Janeiru 2022,” Komunikadu hosi Palásiu Prezidensiál Nicolau Lobato, Díli.

Tama iha Orsamentu Jerál Estadu 2022 reseitas no despezas Estadu nian, inklui fundus no servisu autónomu no orsamentu seguransa sosiál.

Tuir komunikadu imprensa hosi Governu, Orsamentu 2022 sei tau matan ba prioridade nasionál neen: 1) dezenvolvimentu kapitál umanu (edukasaun, formasaun profisionál no saúde); 2) abitasaun no inkluzaun sosiál; 3) setór produtivu sira (agrikultura no turizmu), ambiente no konetividade; 4) dezenvolvimentu setór privadu; 5) dezenvolvimentu rurál no 6) boa governasaun.

Jornalista: Cipriano Colo