Hatutan.com, (23 Fevereiru 2022), Díli—Tribunál Distritál Oecuse (TDO) liu hosi alegasaun hosi Ministériu Públiku (MP) ne’ebé reprezenta hosi Prokuradór Mateus Nesi, husu ba TDO atu aplika pena prizaun tinan ida no suspende tinan ida ba Diretora orfonatu Topu Honis arguida Imelda Liliana Tarung ba krime favoresimentu pesoál tanba ba vizita Richard Daschbach ne’ebé momentu ne’ebá sei sai hanesan arguidu, arguida nia vizita bele hamosu perturbasaun hodi halakon provas ba kazu Richard Daschbach.

Razaun MP husu pena suspensaun ne’e, tanba faktus provadu katak arguida ba vizita duni Richard Daschbach iha Dioseze Maliana.

Notisia iha Relasaun:Kazu Topu Honis, Joaquim Fonseca ho Bárbara Nazareth La Fó Relatóriu Bá Ema Seluk

Advertisement

Logotipu Tribunál Distritál

Hosi parte advogadu privadu Miguel Faria husu ba TDO atu absolve nia kliente hosi krime ne’ebé imputa ba nia kliente tanba faktus ne’ebe imputa ba arguida oin seluk no akuzasaun MP bazeia fali ba kazu seluk ne’ebé antes ne’e iha ona desizaun.

Miguel mós husu ba TDO atu atria sertidaun ba advogadu hato’o keixa ba nia kliente no tuir loloos julgamentu hala’o iha Tribunál Suai tanba faktus akontesimentu iha Maliana.

“Faktus oin seluk no MP halo alegasaun bazeia fali ba kazu seluk ne’ebé antes ne’e iha ona desizaun. Tanba ne’e, ha’u husu ba TDO atu atrai mós sertidaun ba advogadu JUS nian ne’ebé halo ona keixa ba kazu ne’e,” Advogadu Privadu Miguel Faria ba Hatutan.com iha TDD, Kuarta (23/02/2022).

Hafoin alegasaun, juiz prezide marka hikas audiénsia julgamentu ba loron seluk hodi rona desizaun.

Antes ne’e, tuir akuzasaun hosi Ministériu Públiku katak arguida laiha relasaun família ho kondenadu Richard Daschbach.

Maibé, moris hamutuk iha orfonatu Topu Honis hanesan Diretora no Richard Daschbach hanesan fundadór ne’ebé iha dependénsia ekonomia familiár, tanba ne’e iha loron 13 fulan Jullu tinan 2019 arguida ho nia kolega na’in-tolu ho naran Yacobus Coa, Lourenço Soares no Justino Coa sai hosi Díli ba vizita Richard Daschbach iha Dioseze Maliana.

Advertisement

Ho vizita ne’e, iha posibilidade atu hamosu perturbasaun ba investigasaun ka julgamentu ne’ebé hala’o hela ba kazu Richard Daschbach.

Hosi vizita ne’e mós bele halakon provas, bele impede ema seluk atu partisipa iha prosedimentu prosesuál, bele hamosu perigu ba akizasaun, konservasaun provas, bele buka meius oi-oin hodi asumi knaar hanesan diretora Topu Honis no bele hamosu perturbasaun ba órden no trankuilidade públiku.

Tanba ne’e, MP akuza arguida ba pratika krime favoresimentu pesoál ne’ebé previstu iha artigu 290 hosi kódigu penál TL.

Audiénsia julgamentu, prezide hosi juis singulár Yudi Pamungkas, MP reprezenta hosi Prokuradór Mateus Nesi no arguida hetan asisténsia legál hosi advogadu privadu Miguel Faria.

Jornalista: Carmelita Isaac

Advertisement