Hatutan.com, (15 Janeiru 2022), Díli—Prezidente Konsellu Kombatentes ba Libertasaun Nasionál, Vidál de Jesus “Riak Leman”, lori naran veteranu tomak, husu ba sidadaun hotu-hotu iha Timor-Leste (TL), atu kontribui ba estabilidade polítika no demokrasia, liu-liu eleisaun Prezidensiál tinan ne’e.

Prezidente Konsellu Kombatentes ba Libertasaun Nasionál, Vidál de Jesus “Riak Leman”. Foto/Hatutan.com.

“Husu ba sidadaun sira, liu-liu ba joven sira, hotu-hotu fó hanoin ba malu, tau neon ba malu, rona-malu, fiar-malu, no hotu-hotu kontribui ba pás no estabilidade,” Vidál de Jesus “Riak Leman”, hateten ba Hatutan.com, iha Salaun Dom Bosco, Comoro, Sábadu (15/01/2022).

Notisia iha Relasaun:Eleisaun ba Prezidente Repúblika Sei Realiza iha 19 Marsu 2022

Riak Leman hatutan, asuntu sira kona-bá politika entrega ba governante sira mak hatene, labele ofende malu, tanba politika la’ós permanente, ohin ida ukun, aban sai, seluk ba ukun fali. Tanba ne’e, pás ho estabilidade ba nasaun ida nian importante tebes.

Eis Vise Sekretáriu Rejiaun III ne’e, husu mós ba nia maluk veteranu hotu-hotu iha territóriu tomak, atu fó fiar no konfiansa ba malu, hodi kontribui ba estabilidade iha rai laran, hodi povu bele moris hakmatek.

“Nu’udár veteranu, ita tenke rona malu, fiar malu, no kontribui ba pás no estabilidade,” Riak Leman, apela tán.

Tuir veteranu “Riak Leman” nia observasaun katak, estabilidade politika iha rai laran, durante ne’e la’o hela iha situasaun normal no garante sidadaun sira sei laiha intensaun aat ba estabilidade iha TL.

Prezidente Repúblika (PR), Francisco Guterres Lú Olo, iha Sábadu 15 Janeiru 2022, dekreta ona kalendáriu ba Eleisaun Prezidensiál sei realiza iha 19 Marsu tinan ne’e.

Jornalista: Rogério Pereira Cárceres