Hatutan.com, (20 Janeiru 2022), Díli—Ekipa Investigadór Comissåo Anti-Corrupcão (CAC) tutelár ba operasaun, ezekuta mandadu buska no apreensaun Tribunál Distritál Oecusse nian iha Kinta-feira (20/01), ohin ofisialmente entrega objetu apreensaun ne’ebé hala’o iha loron Tersa (18/01) semana ne’e, ba prokuradór tutelár liu hosi ofisiál justisa iha edifísiu Prokuradór Distritál Oecusse, Pante Makassar.

Ekipa Investigadór Comissåo Anti-Corrupcão (CAC) tutelár ba operasaun, ezekuta mandadu buska no apreensaun Tribunál Distritál Oecusse, Kinta (20/01) ofisialmente entrega objetu apreensaun ne’ebé hala’o iha loron Tersa (18/01), ba prokuradór tutelár liu hosi ofisiál justisa iha edifísiu Prokuradór Distritál Oecusse, Pante Makassar. Foto/CAC.

“Objetu apreensaun hirak ne’e, investigadór CAC tutelár Natalino Sarmento no Horacio Lopes entrega ba prokuradór ne’ebé kaer kazu ne’e no akompaña hosi Polísia Nasionál Servisu Investigasaun Kriminál (PNSIK) Nasionál nian,” Hatutan.com sita komunikadu.

Notisia iha Relasaun:Investigasaun RAEOA, Suspeitu iha Indísiu Krime Brankamentu Kapitál ho Korrupsaun Ativa  

Iha operasaun buska domisiliaria no apreensaun semana ne’e, investigadór CAC sira halibur no prende objetu krimi hanesan dokumentus komprovativus manan projetu cleaning service iha RAEOA Oecusse, konta bankária, karreta rua (2), telephone, laptop, osan mean, osan cash ho montante boot, dokumentus kompañia nian kona-bá projeitu eletrifikasaun no projetu balun iha RAEOA/ZEESM ne’ebé suspeitu ho ninian espoza nia kompañia manan nu’udár evidénsia no objetivu krimi. 

Hafoin entrega objetu apreensaun sira ba prokuradór, sei hetan validasaun hosi Juiz Distrital Oecusse no entrega fila mai CAC hodi hahú hala’o investigasaun kriminal ba suspeitus no ema sirak ne’ebé intervienente prosesuál nian.

Durante operasaun buska no apreensaun iha loron Tersa-feira (18/1) ne’e, investigadór CAC lidera hosi Diretór Investigasaun Kriminál Emilio Quintas, obrigadu tenki estraga propriedade suspeitu nian balun iha edifisiu kompañia cleaning service nian iha Padimau Pante Makassar tanba savi armari laiha no oras tuir mandadu juiz nian besik termina.

Mandadu Tribunál Rejiaun Administrativa Espesiál Oecusse Ambeno (RAEOA) Oecusse nian ho numeru NUC 0057/21.PDOEC data loron 17/12/2021 ne’e, fó órden mai CAC no kumprimentu efetivu ba mandadu ida ne’e IHA AUTORIZASAUN ba asesu iha dependénsia hotu-hotu, inklui kofre, fatin hirak rai sasan nian, veiklu hirak ne’ebé uza hosi suspeitu, bele fera odamatan, hakat sae hosi moru no neutraliza animal sira, se presija duni, ho observánsia ba dispozisaun iha artigu 169 no 170 hosi KPPTL. 

Suspeitu no familia Jerente Senior Rejiaun Administrativa Espesial Oecusse Ambeno (RAEOA) Oecusse kolabora di’ak halo fasil ekipa investigadór Comissåo Anti-Corrupcão (CAC) nian, konklui operasaun buska no apreensaun iha oras 12 nian laran.

Mandadu ho numeru NUC 0057/21.PDOEC data loron 17/12/2021 ne’e fo orden ba CAC halao operasaun durante oras 12 nian laran iha fatin tolu (3) diferente; rezidensia no garajen kareta Jerente Senior ZEESM iha Sikluli no edifisiu kompañia nian iha Pademau, Pante Makassar.

Ekipa investigadór ne’ebe lidera hosi Diretor Investigasaun Kriminal (UIK) Emilio Quintas akompañia ho Polisia Nasional Servisu Investigasaun Kriminal (PNSIK) Nasional ne’e hahu iha tuku 8;00 OTL dadersan no termina iha tuku 20;00 OTL kalan tuir lei.

Alemde operasaun ne’e hetan kolaborasaun diak hosi suspeitu nain rua ho ninian familia, hetan mós akompañiamentu prokuradór titular no Juiz Dr. Yudi Pamungkas hosi inisiu too termina kalan.

Operasaun buska no apreensaun ida ne’e nu’udár operasaun dahuluk liu CAC halao iha munisipiu sai hosi kapital Dili iha historia CAC nian hafoin estabelese no hahu operasaun iha tinan 2010 liu ba bazeia ba mandatu Lei Numeru 8/2009 15 Jullu.

Jornalista: Carmelita Isaac